ރާއްޖޭގައި ސަރަޙައްދީ 4 ހެޗަރީއެއް ޤާއިމުކުރުމުގެ ވިސްނުން އެބަހުރިކަމަށް މޯލްޑިވްސް މެރިން ރިސަރޗު އިންސްޓިޓިއުޓުގެ ޑިރެކްޓަރ ޖެނެރަލް ޝާފިއާ ނައީމު ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަަކަދައްކަވަމުން މޯލްޑިވްސް މެރިން ރިސަރޗު އިންސްޓިޓިއުޓުގެ ޑިރެކްޓަރ ޖެނެރަލް ޝާފިއާ ނައީމު ވިދާޅުވީ، ސަރަޙައްދީ 4 ހެޗަރީއެއް ޤާއިމްކުރުމުގެ ބޭނުމަކީ، މާރކެޓަށް ބޭނުންވާ ވަރަށް، އަބަދުވެސް ބާޒާރުގައި އުފެއްދުން ލިބެން ހުންނާނެ ގޮތަކަށް ވިސްނައިގެން މަސައްކަތް ކުރިއަށް ގެންދިއުންކަމަށެވެ.
" ރާއްޖޭގެ އެކި ހިސާބު ހިސާބަށް އަމާޒުކޮށްގެން، ސަރަޙައްދީ 4 ހެޗަރީއެއް ޤާއިމްކުރުމަށްވެސް ޕްލޭންތަކުގައި އެބަހުރި، މީގެ އެއް ބޭނުމަކީ، މިއީ ފާނައަށް އަމާޒުކޮށްގެން ކުރާ މަސައްކަތެއް، ރާއްޖޭގެ ފާނައިގެ މެރިކަލްޗަރ ޕްރޮޑަކްޓުގެ މާރކެޓަށް ބޭނުންވާ ވަރަށް އަބަދުވެސް ޕްރޮޑަކްޓް ލިބެން ހުންނާނެ ގޮތަކަށް މަސައްކަތްތަށް ކުރިއަށް ގެންދިޔުން،" ޝާފިއާ ވިދާޅުވިއެވެ.
ރާއްޖޭގައި މިހާރު މެރިކަލްޗަރ ސިނާއަތް ފުޅާ ކުރުމުގެ މަސައްކަތް ކުރަމުންދަނީ ވޯލްޑު ބޭންކުގެ ސަސްޓެއިނަބަލް ފިޝަރީޒް ޑިވެލޮޕްމަންޓު ޕްރޮޖެކްޓުގެ ދަށުންނެވެ.
މެރިން ރިސަރޗު އިންސްޓިޓިއުޓުން ދަނީ މި ދާއިރާއިން މީހުން ބިނާ ކުރުމުގެ މަސައްކަތްވެސް ކުރަމުންނެވެ. އެގޮތުން ކ. މަނިޔަފުށީގައި މެރިކަލްޗަރ ތަމްރީން ދޭނެ މަރުކަޒެއް ޤާއިމްކުރުމުގެ މަސައްކަތްދަނީ ކުރަމުންނެވެ. މިކަމާއި ގުޅޭގޮތުން މައުލޫމާތުދެއްވަމުން ޝާފިއާ ވިދާޅުވީ މެރިކަލްޗަރގެ ދާއިރާއިން އެކްރެޑިޓުކޮށްފައިވާ ކޯސްތައް ހިންގުމަށް ތައްޔާރުވަމުންދާ ކަމަށެވެ.
" މިއަހަރު މެދުތެރޭގައި ރާއްޖޭގައި ފުރަތަމަ ފަހަރަށް އެކްރެޑިޓުކޮށްފައިވާ މެރިކަލްޗަރ ކޯހެއް ފެށިގެންދާނެ" ޝާފިއާ ވިދާޅުވިއެވެ.
ރާއްޖޭގެ މަސްވެރިކަމަށް އައު ބާވަތްތައް އިތުރުކޮށް، ޑައިވަސިފައިކުރުމަށް މި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މި ސަރުކާރުން މަނިޔަފުށީގައި ތަރައްޤީކުރާ މެރިކަލްޗަރ ޓްރެއިނިންގ ސެންޓަރުން މަރިކަލްޗަރގެ ދާއިރާއިން ތަމްރީންތައް ދީ، މި ދާއިރާ ރާއްޖޭގައި ފުޅާކުރުމަށް އެހީތެރިވެދޭނެ ކަމަށް ސަރުކާރުން ދެކެއެވެ.