މީގެކުރިން އަމިއްލަ ފަރާތަކުން މަސް ކިރުމުގެ މަސައްކަތް ކުރަމުން އައި، ތ.ފުނައްޑޫ އޮޕަރޭޝަނަށް ގެނައުމުގެ މަސައްކަތް މިފްކޯއާއި ހަވާލުކޮށްފިއެވެ.
އަމިއްލަ ފަރާތަކުން އޮޕަރޭޓުކުރަމުން އައި ފުނައްޑޫގެ މަސައްކަތްތައް ހުއްޓިފައި އޮންނަތާ ގިނަ ދުވަސްތަކެއްވެފައިވާއިރު، އެރަށް ތަރައްޤީކުރުމަށް ނަގާފައިވާ ލޯނެއް ނުދެއްކި އެރަށް ވަނީ ބީއެމްއެލްއަށް ނަގާފައެވެ. މިކަމާއި ގުޅޭގޮތުން މިފްކޯގެ ސީއީއޯ އިސްމާޢިލް ފައުޒީ ވިދާޅުވީ، މިހާރު ސަރުކާރުން ވަނީ ބޭންކަށް ދައްކަންޖެހޭ ފައިސާ ދެއްކުމަށްފަހު އެތަން އޮޕަރޭޝަނަށް ގެނައުމުގެ މަސައްކަތް މިފްކޯއާއި ހަވާލުކޮށްފައި ކަމަށެވެ. އިސްމާއިލް ވިދާޅުވީ އެތަނުގައި ގިނަ މަސައްކަތްތަކެއް ކުރަން އެބަހުރި ކަމަށެވެ.
" ޓެކްނިކަލް ކަންތައްތައް އެބަހުރި ކުރަންޖެހޭ، 1500ޓަނުގެ ކޯލްޑު ސްޓޯރޭޖުވެސް އެބަޖެހޭ މަރާމާތުކުރަން، މަސް ގަތުމަށްވެސް ފްރީޒަރ އެބަ ޖެހޭ މަރާމާތު ކުރަން، ބަނދަރުވެސް ހަލާކުވެފައި ހުރީ، ޓީމެއް އެރަށުގައި އެބަ ހަރަކާތްތެރިވޭ،" އިސްމާއިލް ވިދާޅުވިއެވެ.
އިސްމާއިލް ވިދާޅުވީ ފައިސާގެ ތާށި ކަމެއް ކުރިމަތި ނުވާނަމަ 10 ވަރަކަށް މަސް ދުވަސްތެރޭ އެތަން އޮޕަރޭޝަނަށް ގެނެވޭނެ ކަމަށް ލަފާކުރެވޭ ކަމަށެވެ. ފުނައްޑޫ އޮޕަރޭޝަނަށް ގެނައުން ވެގެންދާނީ ތ. އަތޮޅުގެ މަސްވެރިންނަށް މަސް ކިރުވުމަށް ގިނަ ފަސޭހަތަކެއް ލިބިގެންދާނެ ކަމެއް ކަމަށް އިސްމާޢިލް ވިދާޅުވިއެވެ.
ފުނައްޑޫއަކީ މަސްގަނެ އެކްސްޕޯޓްކުރަން 2004 ވަނަ އަހަރު ތަރައްޤީކުރި ރަށެކެވެ.