ޞިއްޙީ ދާއިރާގެ ތަރައްޤީއަށް މި ސަރުކާރުން އަލަށް ފެށި މަޝްރޫޢުތަކުގެ ކާމިޔާބުން، ޞިއްޙީ ދާއިރާއަށް އިންޤިލާބީ ބަދަލުތަކެއް އަންނަމުންދާކަމަށް ހެލްތު މިނިސްޓަރ އަޙްމަދު ނަސީމް ވިދާޅުވެއްޖެއެވެ.
މިއަހަރުގެ ދުނިޔޭގެ ޞިއްޙަތު ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ނަސީމް ވިދާޅުވީ، ޞިއްޙީ ދާއިރާގެ ސިޔާސަތުތަކާ، މަޝްރޫއުތަކާ ޚިދުމަތްތައް މިހާރު ބައްޓަން ކުރަމުންދަނީ "ކްލައިމެޓް ސްމާރޓް" މި އަމާޒަށްކަމަށެވެ.
ދުނިޔޭގެ ޞިއްޙަތު ދުވަސް ފާހަގަކުރުމަށް ޣިޔާސުއްދީން އިންޓަރނޭޝަނަލް ސްކޫލުގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން ހެލްތު މިނިސްޓަރ އަޙްމަދު ނަސީމް ވިދާޅުވީ، ރައީސުލްޖުމްހޫރިއްޔާ އިބްރަހީމް މުޙައްމަދު ޞާލިޙު، ވެރިކަމާ ޙަވާލުވެވަޑައިގަތުމަށްފަހު، އެންމެ ބޮޑަށް އަހައްމިއްޔަތުކަން ދެއްވާފައިވާ ކަންކަމުގެ ތެރޭގައި، ތިމާވެއްޓާއި އިންސާނުންގެ ޞިއްޙަތު ރައްކާތެރިކުރުން ހިމެނޭކަމަށެވެ.
ވަކިން ޚާއްޞަކޮށް، "ހަށިހެޔޮ ދުޅަހެޔޮ" ރައްޔިތެއް ބިނާ ކުރުމަށާ، ރައްޔިތުންގެ ޞިއްޙީ ރައްކާތެރިކަމާ، ބޭސްފަރުވާގެ ކަންކަން ކަށަވަރުކުރުމަށް، މި ސަރުކާރުން އަލަށް ފެށި މަޝްރޫޢުތަކުގެ ކާމިޔާބުން، ޞިއްޙީ ދާއިރާއަށް އިންޤިލާބީ ބަދަލުތަކެއް އަންނަމުންދާކަން މިނިސްޓަރ ފާހަގަކުރެއްވިއެވެ.
"ރާއްޖޭގެ ނާޒުކު ތިމާވެށި ހިމާޔަތްކޮށް، ރާއްޖޭގައި އުފެދޭ އަދި އުފައްދާ އަދި ރާއްޖެއަށް އެތެރެކުރާ ކާބޯތަކެއްޗާ ބޭހުގެ ރައްކާތެރިކަން ކަށަވަރު ކުރުމަށް ގިނަގުނަ މަސައްކަތްތަކެއް ވަނީ ކުރެވިފައި. މި ގޮތުން، ކަމާބެހޭ ސަރަހައްދީ އަދި ބައިނަލްއަޤްވާމީ އިދާރާތަކުން ކުރާ މަސައްކަތުގައި ބައިވެރިވެ، އެ އިދާރާތަކުގެ ފަންނީ ލަފާއާއި އިރުޝާދާއި އެއްގޮތަށް، އަދި ރާއްޖޭގެ ޙާލަތަށް ރިޢާޔަތްކޮށް، އައު ސިޔާސަތުތައް ވަނީ ކަނޑައެޅި ތަންފީޒުކުރަންފެށިފައި" މިނިސްޓަރ ނަސީމް ވިދާޅުވިއެވެ.
ހެލްތު މިނިސްޓަރ އަޙްމަދު ނަސީމް ވިދާޅުވީ، ކޯވިޑް19 އިން ލިބުނު އެންމެ ޢިބްރަތްތެރި ފިލާވަޅަކީ، ޞިއްޙީ ރައްކާތެރިކަމަކީ ކޮންމެ އިންސާނަކަށްވެސް އެންމެ މުހިއްމު އަސާސީ ޙައްޤުކަންކަމަށެވެ. އަދި ކޯވިޑްގައި ދިވެހިރާއްޖެ ނަމޫނާއަކަށް ވެގެންދިޔައީ، ސަރުކާރާއި އަމިއްލަ ވިޔަފާރިތަކާ، ޖަމްޢިއްޔާ ޖަމާޢަތްތަކާ ރައްޔިތުން އެކުގައި މަސައްކަތް ކުރުމުގެ ސަބަބުންކަމަށެވެ.
މިނިސްޓަރގެ ވާހަކަފުޅުގައި ތިމާވެއްޓާއި ގުޅުންހުރި މައްސަލަތައް ޙައްލުކޮށް ތިމާވެށީގެ ޙާލަތާގުޅިގެން ދިމަވާ ޞިއްޙީ މައްސަލަތަކުން ރައްކާތެރިވުމުގައިވެސް، އަޅުގަނޑުމެން އެންމެން ގުޅިގެން އެކުގައި މަސައްކަތް ކޮށްފިނަމަ ކާމިޔާބުވާނެކަން ވަނީ ފާހަގަކުރައްވާފައެވެ. އަދި ޞިއްޙީ ދާއިރާގެ ސިޔާސަތުތަކާ، މަޝްރޫއުތަކާ ޚިދުމަތްތައް މިހާރު ބައްޓަން ކުރަމުންދަނީ "ކްލައިމެޓް ސްމާރޓް" މި އަމާޒަށްކަމަށް މިނިސްޓަރޔ ވިދާޅުވިއެވެ.
"މާތް ﷲގެ ވާގިފުޅާއެކު، ޞިއްޙީ ދާއިރާގެ ސިޔާސަތުތަކާ، މަޝްރޫއުތަކާ ޚިދުމަތްތައް މިހާރު ބައްޓަން ކުރަމުން މިދަނީ، ޞިއްޙީ ދާޢިރާގެ ޚިދުމަތް ފެހިކުރުމުގެ މަސައްކަތުގެ ތެރެއިން. ހަސްފަތާލުތަކާ ޞިއްޙީ މަރުކަޒުތަކަކީ "ކްލައިމެޓް ސްމާރޓް" ތަންތަން ކަމަށް ހެދުމުގެ އަމާޒުގައި. ޞިއްޚީ ޚިދުމަތް ދިނުމުގައި ބޭނުންކުރާ ޓެކްނޮލޮޖީއަކީ ތިމާވެއްޓާ ރައްޓެހި ޓެކްނޮލޮޖީ ކަމުގައި ވެގެންދާނެ. ޞިއްޙީ ޚިދުމަތްދިނުމުގައި އުފެދޭ މެޑިކަލް އަދި އެހެހެނިހެން ކުނި، ތިމާވެއްޓަށް ރައްކާތެރި ގޮތުގައި ނައްތާލެވިގެންދާނެ" މިނިސްޓަރ ނަސީމް ވިދާޅުވިއެވެ.
ހެލްތު މިނިސްޓަރ ވިދާޅުވީ، ޕްރައިމަރީ ހެލްތުކެއަރގެ ނިޒާމު އާރޯކޮށް އަލުން ފެށުމަށް ސަރުކާރުން ތައްޔާރު ވަމުންދާކަމަށެވެ. އަދި ކެއިން ބުއިމާއި މާޙައުލުގެ ޒަރީއާއިން ކުރިމަތިވާ ޞިއްޙީ މައްސަލަތައް ދެނެގަތުމަށް، ވަކިން ޚާއްޞަކޮށް ކެންސަރު ބައްޔަށް ރާއްޖޭގައި މީހުން ހުށަހެޅޭ ސަބަބުތައް ދެނެގަތުމަށް، ޑަބްލިޔޫ.އެޗް.އޯ އާ ގުޅިގެން ދިރާސާކުރަމުންދާކަމަށް މިނިސްޓަރ ވިދާޅުވިއެވެ.
މި މަސައްކަތްތަކުގެ އެންމެބޮޑު ބޭނުމަކީ، ރައްޔިތުންނާ ގާތުން ޚިދުމަތް ދިނުމާއެކު، ރައްޔިތުންނަކީ، ޞިއްޙީ ކަންކަމަށް ހޭލުންތެރިވެ އެކަންކަމަށް ފަރުވާ ބަހައްޓާ، އަދި ޕެންޑެމިކް ތަކާ، ޤުދުރަތީ އެކިއެކި ކާރިޘާތަކުގައިވެސް، ތިމާވެށި ހިމާޔަތް ކުރުމުގައިވެސް 'ރެޒީލިއެންޓް" ބަޔަކަށް ހެދުންކަމަށް މިނިސްޓަރ ވިދާޅުވިއެވެ.