"އެސްޖެހި ގަނޑުވަރު" ހުޅުމާލޭ ދެވަނަ ފިޔަވަށްސަށް ބަދަލުކުރުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން އެޗް.ޑީ.ސީން ފަށައިފިއެވެ. އެޗް.ޑީ.ސީން ވިދާޅުވީ، އެސްޖެހި ގަނޑުވަރު ބަދަލުކުރުމުގެ މަސައްކަތް ކުރަމުންދަނީ އެތަނުގެ އަސްލު ނުގެއްލޭނެހެންކަމަށެވެ.
"އެސްޖެހި ގަނޑުވަރު" އަކީ ރާއްޖޭގައި އާސާރީ އަދި ވަޑާމުގެ ފަންނުވެރިކަން އެންމެ ފުރިހަމައަށް ފެންނަންހުރި އެއް ޢިމާރާތެވެ. އަދި މިއީ މާލޭގައި ހުރި އެންމެ ޒަމާންވީ އެއް އިމާރާތްވެސްމެއެވެ. މާލޭ ހިތަށްފިނިވާމަގުގައި ހުންނަ އެސްޖެހި ގަނޑުވަރު ނުވަތަ މިހާރުގެ ނަމުންނަމަ އެސްޖެހިގޭގެ އޮނިގަނޑު ވެރިފަރާތުގެ އަތުން ނެގުމަށްފަހު، އެތަން ބަދަލުކުރުމަށް ނިންމާފައިވަނީ ހުޅުމާލޭ ދެވަނަ ފިޔަވަހީގައި ތަރައްޤީކުރާ "ހެރިޓޭޖް ޑިސްޓްރިކްޓް"ގައެވެ. މިއީ ކުރިން ފަރުކޮޅުފުށި ރިސޯޓް ހިންގި ސަރަޙައްދެވެ.
އެޗް.ޑީ.ސީން ވިދާޅުވީ، އެސްޖެހި ގަނޑުވަރަކީ ރާއްޖޭގެ އިމާރާތްކުރުމުގެ ފަންނުވެރިކަމާގުޅިފައިވާ ތާރީޚީ މުހިއްމު އިމާރާތެއްކަމަށެވެ. އަދި އެތަން އެންމެ އެކަށީގެންވާގޮތުގައި މިހާތަނަށް އައިރު ބެލެހެއްޓިފައިނެތްކަން އެ ކޯޕަރޭޝަނުން ވިދާޅުވެއެވެ. މިގަނޑުވަރުގެ ބައިތައް ރޫޅާލުމަށްފަހު ހެރިޓޭޖް ޑިސްޓްރިކްޓުގައި ރޭވުމަށްޓަކާ، ގަނޑުވަރު ބެހެއްޓުމަށް ހަމަޖެހިފައިވާ ސަރަޙައްދުގެ ސައިޓްވަކިކޮށް، ފައުންޑޭޝަންގެ މަސައްކަތްތައް އެޗް.ޑީ.ސީން މިހާރު އަންނަނީ ކުރަމުންނެވެ.
އެސްޖެހި ގަނޑުވަރު ނުވަތަ އެސްޖެހިގެއަކީ އެސްޖެހި ގަނޑުވަރު މާފަތް ކިލޭގެފާނުގެ ގަނޑުވަރުކަމުގައި ބުނެވެއެވެ. އެސްޖެހި ގަނޑުވަރު މާފަތް ކިލޭގެފާނަކީ ސުލްތާން އިމާދުއްދީން 6 ގެ ރަސްކަމުގައި އުޅުއްވި އޭރުގެ މަޝްހޫރު ބޭފުޅެކެވެ. މިގަނޑުވަރު ބިނާކޮށްފައިވާ ސަރަހައްދަކީ ތާރީޚީގޮތުން މާލޭގެ މުހިއްމު ގިނަ ބިނާތަކެއްވެސް ހުރި ސަރަޙައްދެކެވެ.
މި ގަނޑުވަރުގެ ލަކުޑިން ހަދާފައިވާ މަތީފިލާއާއި ދޮރުތަކަށް 119 އަހަރަށްވުރެ ގިނަ ދުވަސްވަނީ ވެފައެވެ. މި ގަނޑުވަރަށް ވަދެވެން ހުންނަ މައިދޮރުގެ މަތީގައ ހަރުކުރެވިފައިވާ ލޯފޮއްޗެއްގައި ލިޔެފައިވާގޮތުން މި ގަނޑުވަރުގައި އެންމެ ފުރަތަމަ މީހުން ދިރިއުޅެންފެށީ 17 އޮކްޓޯބަރ 1872 ގައެވެ.
ރާއްޖޭގެ ތާރީޚު ދިރާސާކުރައްވާ ބޭފުޅުން ވިދާޅުވާގޮތުގައި އެސްޖެހި ގަނޑުވަރު ބިނާކުރެވުނީ 19 ވަނަ ޤަރުނުގެ މެދުތެރޭގައެވެ. މި ގަނޑުވަރު ބިނާކުރުމުގައި ބޭނުންކޮށްފައި ހުރީ އެ ޒަމާނުގައި ލިބެންހުރި އެންމެ މޮޅު ލަކުޑިންނެވެ. އަދި މި ލަކުޑީގައި އަޅާފައިވާ ކުރެހުންތަކަކީ އެ ޒަމާނުގައި އުރިގެން ރާއްޖެއަށް ލައްގާފައިހުރި ބޯޓުފަހަރުގައި ހުރި ކުރެހުންތަކަށް ބަލައި، އެއިން ކޮންމެވެސް ވަރަކަށް ނަކަލުކޮށްގެން އެޅިފައިވާ ކުރެހުންތަކެއްކަމަށް ބުނެއުޅެއެވެ.
އެސްޖެހިގެއަކީ މާލޭގައި ހުރި އާސާރީ ތަންތަނުގެ ތެރެއިން ފާހަގަކޮށްލެވޭ ތަނެކެވެ. އެ ޒަމާނުގެ އެހެން ބިނާއެއް މާލޭގައި މިހާރު ނެތުމުން، މިތަންވަނީ ރާއްޖޭގެ ސަގާފީ ތަރިކައިގެ ދަފްތަރުގައި ހިމަނާފައެވެ.
އެޗް.ޑީ.ސީން މީގެ ކުރިން ވިދާޅުވެފައިވަނީ އެސްޖެހި ގަނޑުވަރު އަލުން ހުޅުވުމަށް ހަމަޖެހިފައިވަނީ ފަންނުވެރިންގެ ޚިޔާލުތައް ފޯރުކޮށްދޭ ގެލަރީއެއްގެ ގޮތުގައި ކަމަށެވެ. އަދި އެސްޖެހިގޭގެ ސަގާފީ ތަރިކަ ތަޖުރިބާކޮށްލުމުގެ ފުރުސަތު އާންމު ރައްޔިތުންނާއި ފަތުރުވެރިންނަށް ލިބިގެންދާނެ ކަމަށްވެސް އެޗް.ޑީ.ސީން ބުނެފައިވެއެވެ.