ހުޅުމާލޭގައި ހިންގާ ހާންޖީ ރެސްޓޯރެންޓްގައި މީހަކަށް ހަމަލާދީ މަރާލިކަމުގެ ތުހުމަތުގައި ހޯދަމުންދިޔަ ޕާކިސްތާނު މީހާ ހައްޔަރުކުރީ ހުޅުމާލެ ދެވަނަ ފިޔަވަހީގެ ބީޗު ސަރަހައްދުންކަމަށް ފުލުހުން ބުނެފިއެވެ.
އިއްޔެ ހަވީރު ހާންޖީ ރެސްޓޯރެންޓްގައި ތޫނު އެއްޗަކަން ބަންގްލަދޭޝްގެ ވެއިޓަރަކަށް ހަަމަލާދިނުމަށްފަހު، އެ ރެސްޓޯރަންޓްގެ ކައްކާއަކަށް މަސައްކަތްކުރާ ޕާކިސްތާނު މިހާ ވަނީ ފިލާފައެވެ. ފުލުހުން ވިދާޅުވީ އުމުރުން 26 އަހަރުގެ މުހައްމަދު އާބިދު ހައްޔަރުކޮށްފައިވަނީ ރޭ ދަންވަރުގެ ވަގުތެއްގައި ހުޅުމާލޭ ދެވަނަ ފިޔަވަހީގެ އަތިރިމަތި ސަރަހައްދުންކަމަށެވެ.
ހުޅުމާލޭ ނިރޮޅުމަގުގެ 19 ވަނަ ގޯޅީގައި ހުންނަ ހާންޖީ ރެސްޓޯރެންޓް ތެރޭ އިއްޔެ އިރޮއޮއްސުނުއިރު ހިނގި މި ހާދިސާގައި ވަޅިޔަކުން ހަމަލާދިނުމުގެ ސަބަބުން މަރުވެފައިވަނީ އެ ތަނުގައި ވެއިޓަރެއްގެ ވަޒީފާ އަދާކުރަމުންދިޔަ ބަންގްލަދޭޝް ރައްޔިތެކެވެ. އޭނާ މަރުވީ ފަރުވާއަށް ހުޅުމާލޭ ހޮސްޕިޓަލަށް ގެންދިޔަތާ ކުޑައިރުކޮޅެއްގެ ތެރޭގައިކަމަށް އެ ހޮސްޕިޓަލުން ބުނެއެވެ.
ރެސްޓޯރަންޓް ތެރޭގައި ހިނގި ދެ ބަސްވުމެއްގެ ޕާކިސްތާނު ކައްކާ ބަންގްލަދޭޝް މީހާ ހަށިގަނޑުގެ ތިން ތަނަކަށް ވަޅިން ހަމަލާދީފައިވާކަމަށް މަންޒަރު ދުށް ބައެއް މީހުން ވަނީ ބުނެފައެވެ. އަދި މި ދެ މީހުންގެ މެދުގައި މީގެކުރިންވެސް ބައެއް ދެބަސްވުންތައް ހިނގާފައިވާކަމަށް އެތަނުގައި މަސައްކަތް ކުރާ ބައެއް މީހުން ވަނީ ބުނެފައެވެ.
ފިލައިގެން އުޅުނު ޕާކިސްތާނު މީހާ ހައްޔަރުކުރުމަށްފަހު ފުލުހުން ވިދާޅުވީ އޭނާގެ މައްސަލަ ސީރިއަށް މައްސަލައެއްގެ ގޮތުގައި ތަހުޤީޤްކުރަމުންދާކަމަށެވެ.
ރޭ ހިނގި މިހާދިސާގައި މަރުވި ބަންގްލަދޭޝް މީހާ ރެސްޓޯރަންޓް ތެރެއަށް ވެއްޓިފައި އޮތް ވީޑިއޯއެއް ވަނީ އާއްމުވެފައެވެ. މި ވީޑިއޯއިން ފެންނަގޮތުގައި އެމީހާ ލައިގެން އޮތް ޓީޝާޓް އޮތީ ލެއިން ފޯވެފައެވެ. އަދި އެމީހާގެ ފުރާނަ ސަލާމަތްކުރުމަށް އެހެން މީހަކު ސީޕީއާރު ދޭތަންވެސް މި ވީޑިއޯއިން ފެނެއެވެ.