ގަލޮޅުގައި ހުރި ގަރާޖެއްގައި އަލިފާނުގެ ޙާދިސާއެއް ހިނގައިފިއެވެ.
މި ޙާދިސާ ހިނގާފައިވަނީ ގަލޮޅު ނިއު ކޮލަމްބިއާ ނަމަކަށް ކިޔާ ގެއަކާ އިންވެގެންހުރި ގަރާޖެއްގައިކަމަށެވެ. ގަރާޖުގައި އަލިފާން ރޯވެގެން އެމް.އެން.ޑީ.އެފްއަށް ރިޕޯޓްކޮށްފައިވަނީ މިއަދު ހަވީރު 16:26 ހާއިރެވެ. އަދި އެމް.އެން.ޑީ.އެފްގެ ފަޔަރ އެންޑް ރެސްކިއު ޓީމުން އެ ސަރަޙައްދަށްގޮސް ކުރި މަސައްކަތުން އަލިފާންގަނޑު ކޮންޓްރޯލްކޮށްފައިވަނީ 16:53 ހާއިރުކަމަށް އެމް.އެން.ޑީ.އެފުން ވިދާޅުވެއެވެ.
ގަރާޖުގައި އަލިފާން ރޯވާން މެދުވެރިވި ސީދާ ސަބަބެއް އަދި ސާފުވެފައެއްނުވެއެވެ.
މި ޙާދިސާގައި އެއްވެސް މީހަކަށް ގެއްލުމެއް ލިބިފައެއްނުވެއެވެ. އެހެންނަމަވެސް އަލިފާނުގެ ސަބަބުން ގަރާޖުގައި ހިފައިގެންގުޅޭ ސާމާނަށާއި، އިމާރާތައް ބޮޑެތި ގެއްލުންތަކެއް ވަނީ ލިބިފައެވެ. ހަމައެހެންމެ ގަރާޖް ކުރިމަތީ ޕާކުކޮށްފައި ހުރި ބައެއް ވެހިކަލްތަކަށްވެސް ބޮޑެތި ގެއްލުންތަކެއް ލިބިފައިވެއެވެ.
މި ޙާދިސާއާއި ގުޅިގެން އިތުރަށް ބަލަންޖެހޭ ކަންކަން ބަލަމުންދާކަމަށް އެމް.އެން.ޑީ.އެފުން ވިދާޅުވެއެވެ.