ރާޖަޕަކްސަގެ ޢާއިލާއިން ރާއްޖޭގެ ރިސޯޓަކުން ވިލާއެއް ގަންނަން އުޅޭކަމަށް ދެކެވޭ ވާހަކަތައް ދޮގުކޮށްފި
ސްރިލަންކާގެ ކުރީގެ ރައީސް އަދި ކުރީގެ ބޮޑުވަޒީރު މަހިންދަ ރާޖަޕަކްސްގެ ޢާއިލާއިން ސޮނޭވާގެ ރިސޯޓަކުން ވިލާއެއް ގަންނަންއުޅޭ ކަމަށްބުނެ ފާތުރާ ވާހަކަތައް ސޮނޭވާއިން ދޮގުކޮށްފިއެވެ.
ސޮނޭވާއިން މިއަދު ނެރުނު ބަޔާނެއްގައި ބުނީ ސޮނޭވާގެ ޕްރޮޕަޓީއަކުން ވިލާއެއް ގަތުމާގުޅޭ އެއްވެސް މަޝްވަރާއެއް ސްރީލަންކާގެ ކުރީގެ ބޮޑުވަޒީރާއި، ސޮނެވާގެ މެނޭޖްމަންޓާއެކު ބާއްވާފައި ނުވާކަމަށެވެ. އަދި ވިލާއެއް ގަތުމާގުޅޭ އެއްވެސް މަޝްވަރާއެއް ރާޖަޕަކްސަގެ ޢާއިލާގެ އެއްވެސް މެންބަރަކާއެކުވެސް ކުރިއަށްގެންގޮސްފައި ނުވާކަމަށް ބަޔާނުގައިވެވެ. މީގެ އިތުރުން ސޮނޭވާގެ ސީ.އީ.އޯ ސޯނޫ ޝިވްދަސަނުއާއި މަހިންދަ ރާޖަޕަކްސްއާއި އެއްވެސް އިރެއްގައި ދިމާވެ، ބައްދަލުވެފައިނުވާކަންވެސް ސޮނޭވާގެ ބަޔާނުގައި ބުނެފައިވެއެވެ.
ރާއްޖޭގައި ހިންގާ އޮންލައިން ބްލޮގެއްގައި ސޮނޭވާއިން ރާއްޖޭގައި ހިންގާ ޕްރައިވެޓް ވިލާއެއް ރާޖަޕަކްސަގެ ޢާއިލާއަށް ވިއްކުމަށް އެއްބެސްވެފައިވާކަމަށް ވަނީ ބުނެފައެވެ. ކަމުގެ ހަޤީޤަތް އޮޅޭގޮތަށް، މިފަދަ ދޮގު ޚަބަރުތައް ބައެއް ފަރާތްތަކުން ފަތުރަމުންދާތީ، އެކަން ސޮނޭވާއިން ވަނީ ކުށްވެރިކޮށްފައެވެ.
Once again the media is sensationalizing things just to attract more readers,this time the #MDV audience as well as the #LKA ones. My father has no intention of leaving #LKA & there is no truth of any plans of him moving to #MDV or buying any villa there.
— Namal Rajapaksa (@RajapaksaNamal) May 24, 2022
ސްރިލަންކާގެ ކުރީގެ ބޮޑުވަޒީރު މަހިންދަ ރާޖަޕަކްސަ ސޮނޭވާއިން ޕްރައިވެޓް ވިލާއެއް ގަންނަންއުޅޭކަމަށް ބުނެ ފަތުރާ ވާހަކަތައް ސޮނޭވާއިން ދޮގުކޮށްފައިވާއިރު، މިކަން ރާޖަޕަކްސަގެ ދަރިކަލުން ނަމާލް ރާޖަޕަކްސަވެސް ވަނީ ދޮގުކުރައްވާފައެވެ.
ނަމާލް ކުރެއްވި ޓުވީޓެއްގައި ވިދާޅުވީ، ޤައުމު ދޫކޮށް ދިއުމުގެ އެއްވެސް ވިސްނުމެއް އޭނާގެ ބައްޕާފުޅު ނުގެންގުޅުއްވާކަމަށެވެ. އަދި ރާއްޖެއަށް ބަދަލުވުމުގެ ވިސްނުމެއް ނުވަތަ ރާއްޖޭން ވިލާއެއް ގަތުމުގެ ވިސްނުމެއްވެސް ނުގެންގުޅުއްވާކަމަށް އޭނާ ވިދާޅުވިއެވެ.
ސްރީލަންކާގައި ސަރުކާރާއި ދެކޮޅަށް ބޭއްވި މުޒާހަރާތައް ކޮންޓްރޯލުން ނެއްޓޭ ހިސާބަށް ދިއުމުން ބޮޑުވަޒީރުކަމުގެ މަޤާމުން މަހިންދަ ރާޖަޕަކްސަ އިސްތިއުފާދެއްވީ މިިމަހުގެ 9 ވަނަ ދުވަހުއެވެ.