ބޯހިޔާވަހިކަމުގެ މައްސަލައަކީ މުޅިރާއްޖެއަށްވެސް ކުރިމަތިވެފައިވާ އެންމެބޮޑު އިޖްތިމާޢީ އެއް މައްސަލައެވެ. ވަކިން ޚާއްސަކޮށް މާލޭ ސަރަޙައްދުގައި މިއީ ރައްޔިތުންގެ އިންތިހާ ކަންބޮޑުވުން އެކަމަކާ ގުޅިފައިވާ މައްސަލައެކެވެ.
ރާއްޖޭގެ ނިސްބަތުންވެސް ބޯހިޔާވަހިކަމުގެ އެންމެ ގިނަ މަޝްރޫޢުތައް މިވަގުތު ކުރިއަށްދަނީ މާލޭ ސަރަޙައްދުގައެވެ. އެގޮތުން ސޯޝަލް ހައުސިންގއާއި އަމިއްލަ ފަރާތްތަކާ ޙަވާލުކޮށްގެން ތަރައްޤީކުރާ ލަގްޒަރީ ފްލެޓްތަކުގެ މަސައްކަތް އެކި މަރުހަލާތަކުގައި އެބަކުރިއަށްދެއެވެ.
މީގެ ތެރެއިން އާއްމުންނަށް އެންމެ އަވަހަށް ހުޅުވާލުމަށް ތައްޔާރުވަމުންދާ ފްލެޓްތަކަކީ ވިނަރެސް ހައުސިންގ މަޝްރޫޢުގެ ތެރެއިން ތަރައްޤީކުރާ ފްލެޓްތަކެވެ.
ވިނަރެސް ހައުސިން މަޝްރޫޢަކީ ސަރުކާރުން އެޗް.ޑީ.ސީއާ ގުޅިގެން ކުރިއަށްގެންދާ މެދުފަންތީގެ ބޯހިޔާވަހިކަމުގެ މަޝްރޫޢުއެކެވެ. 13 ބުރީގެ 10 ޓަވަރު ހިމެނޭހެން ތަރައްޤީކޮށްފައިވާ ވިނަރެސް މަޝްރޫޢުގައި 1344 ފްލެޓު ހިމެނެއެވެ. މިއީ މުޅިންވެސް 3 ކޮޓަރީގެ ފްލެޓްތަކެކެވެ.
މި ފެލްޓްތައް ތަރައްޤީކޮށްފައިވަނީ ހުޅުމާލޭ ފޭސް ދޭއްގެ ހިތިގަސްމަގުގައެވެ. މި މަޝްރޫޢުގެ މަސައްކަތް ނިމުމަކާ، ގާތްވެފައިވާއިރު، މިމަހުގެ ތެރޭގައި ފްލެޓްތަކަށް ކުރިމަތިލުމަށް ހުޅުވާލުމަށް އެޗް.ޑީ.ސީން މިހާރު އަންނަނީ ތައްޔާރުވަމުންނެވެ.
މި މަޝްރޫޢުގެ ދަށުން ފްލެޓްތައް ތަރައްޤީކޮށްފައިވަނީ 4 ކޮންސެޕްޓަކަށެވެ. އެއީ އިނާ ވިއު، އައުޓާ ވިއު، މެރީނާ ވިއު އަދި ސްޓޭންޑާޑް ވިއު އެޕާޓްމެންޓްތަކެވެ. މެރީނާ ވިއު ފްލެޓްތަކުގައި ހިމެނެނީ 172 އެޕާޓްމަންޓެވެ. އައުޓާ ވިއުގައި 372 އެޕާޓްމެންޓް ހިމެނެއެވެ. އިނާ ވިއުގައި ހިމެނެނީ 352 އެޕާޓްމަންޓެވެ. އަދި ސްޓޭންޑާޑް ވިއުގައި 448 އެޕާޓްމެންޓް ހިމެނެއެވެ.
މި މަޝްރޫޢުގައި 2 ވައްތަރެއްގެ އެޕާޓްމަންޓް ލޭއައުޓް ނުވަތަ ފްލޯ ޕްލޭން ހިމެނެއެވެ. އެއީ ޓައިޕް A1 އަދި ޓައިޕް A2 އެވެ.
ވިނަރެސް ފްލެޓްތަކުގެ ތެރެއިން އިނާ ވިއު، އައުޓާ ވިއު އަދި މެރީނާ ވިއުގެ ލޭއައުޓަކީ ޓައިޕް A1 އެވެ. މި އެޕާޓްމަންޓްތަކުގެ ބޮޑިމިނުގައި 902 އަކަފޫޓު ހުންނާނެއެވެ.
މިއިން ކޮންމެ އެޕާޓްމަންޓެއްގައިވެސް 3 ކޮޓަރިއާއި، 3 ފާޚާނާއާއި، އަދި ބެލްކަންޏެއް ހުންނާނެއެވެ. ސްޓޭންޑާޑް ވިއު އެޕާޓްމެންޓްތަކުގެ ލޭއައުޓަކީ ޓައިޕް A2 އެވެ. މި އެޕާޓްމަންޓްތަކުގެ ބޮޑުމިނުގައި 883 އަކަފޫޓް ހުންނާނެއެވެ. މިއިން ކޮންމެ އެޕާޓްމަންޓަކީވެސް 3 ކޮޓަރިއާއި، 3 ފާޚާނާ އަދި ބެލްކަންޏެއް ހިމެނޭ އެޕާޓްމަންޓްތަކެކެވެ.
މި މަޝްރޫޢުގެ ދެވަނަ ފަންގިފިލާގެ އެޕާޓްމެންޓްތައް ތަރައްޤީކޮށްފައިވަނީ ޓެރެސްއެއްވެސް ހިމެނޭގޮތަށެވެ. އެގޮތުން، ދެވަނަ ފަންގިފިލާގައި ހިމެނޭ މެރީނާ ވިއު އަދި އައުޓާ ވިއު އެޕާޓްމަންޓްތަކަކީ 1395.64 އަކަފޫޓުގެ ބޮޑު އެޕާޓްމަންޓްތަކެކެވެ.
މި އެޕާޓްމަންޓްތަކުގެ ލޭއައުޓަކީ ޓައިޕް A1 އެވެ. މި އެޕާޓްމަންޓްތަކުގައި 3 ކޮޓަރި، 3 ފާޚާނާ އަދި ބެލްކަންޏެއްގެ އިތުރުން ޓެރެސްއެއްވެސް ހުންނާނެއެވެ.
ދެވަނަ ފަންގިފިލާގައި ހިމެނޭ މެރީނާ ވިއު އަދި އައުޓާ ވިއު އެޕާޓްމަންޓްތަކުގެ ސައިޒަށްވުރެ އިނާ ވިއު އެޕާޓްމަންޓްތަކުގެ ސައިޒު ކުޑައެވެ.
ޓައިޕް A1 ލޭއައުޓަށް ހަދާފައިވާ މި އެޕާޓްމަންޓްތަކުގެ ސައިޒަކީ 1312.65 އަކަފޫޓެވެ. މިއީވެސް 3 ކޮޓަރީއާއި 3 ފާޚާނާއާއި ޓެރަސް ހިމެނޭ އެޕާޓްމަންޓްތަކެކެވެ. ނަމަވެސް މި އެޕާޓްމަންޓްތަކަކު ބެލްކަންޏެއް ނުހިމެނެއެވެ. ދެވަނަ ފަންގިފިލާގައި ލޭއައުޓް ޓައިޕް A2 އަށް ހަދާފައިވާ އިނާ ވިއު އެޕާޓްމަންޓްތަކުގެ ބޮޑުމިނަކީ 1234.83 އަކަފޫޓު ހުންނާނެއެވެ. މި އެޕާޓްމަންޓްތަކުގައި 3 ކޮޓަރި، 3 ފާޚާނާ، އަދި ބެލްކަންޏެއްގެ އިތުރުން ޓެރަސްއެއް ހިމެނެއެވެ.
ވިނަރެސް ފެލްޓްތަކުގެ ދެވަނަ ފަންގިފިލާގައި ހިމެނޭ ސްޓޭންޑެޑް ވިއު އެޕާޓްމަންޓްތަކުގައި ބެލްކަންޏެއް ހިމަނާފައެއްނުވެއެވެ. އެގޮތުން ލޭއުޓް ޓައިޕް A1 އެޕާޓްމަންޓްތަކުގެ ބޮޑުމިނުގައި 1216.21 އަކަފޫޓު ހުންނައިރު، ލޭއައުޓް ޓައިޕް A2 އެޕާޓްމަންޓްތަކުގެ ބޮޑުމިނުގައި 1334.83 އަކަފޫޓު ހުންނާނެއެވެ. ސްޓޭންޑެޑް ވިއުގެ މި ދެ ލޭއައުޓުގައިވެސް 3 ކޮޓަރި، 3 ފާޚާނާ އަދި ޓެރަސްއެއް ހުންނާނެއެވެ.
ވިނަރެސް މަޝްރޫއުގެ ދަށުން އިމާރާތް ކޮށްފައިވާ ކޮންމެ ޓަވަރެއްގައިވެސް ޕާކިންގ، ސެކިއުރިޓީ، ސީ.ސީ.ޓީ.ވީ، ފަޔަރ އެންޑް ސޭފްޓީ، ގާބޭޖް ޝޫޓް ހުންނާނެއެވެ. އަދި ކޮންމެ ޓަވަރެއްގައި ހަތަރު ލިފްޓުގެ ޚިދުމަތް ލިބެންހުންނާނެއެވެ. މިއިން ކޮންމެ ޓަވަރެއްގެވެސް ފުރަތަމަ 2 ފަންގިފިލާ ޚާއްސަކޮށްފައިވަނީ ކޮމަރޝަލް ސްޕޭސްގެގޮތުގައެވެ. އެހެންކަމުން މީހުން ދިރިއުޅޭ އެޕާޓްމަންޓްތައް ހުންނާނީ 3 ވަނަ ފަންގިފިލާއިން ފެށިގެން މައްޗަށެވެ.
ކޮމަރޝަލް ސްޕޭސްތަކުގައި ފިހާރަތަކާއި، އޮފީސްތަކާއި، ކެފޭ ރެސްޓޯރެންޓާއި، ޖިމްތަކާއި، އޭ.ޓީ.އެމް ޤާއިމުކުރެވިގެންދާނެއެވެ. އަދި ޑިމާންޑަށް ބަލާ އިތުރު ޚިދުމަތްތައްވެސް ތަޢާރަފުކުރެވޭނެކަމަށް އެޗް.ޑީ.ސީން ވިދާޅުވެއެވެ.
ވިނަރެސް ފްލެޓްތައް އާއްމުންނަށް ދޫކުރަނީ ފިނިޝިންގގެ މަސައްކަތްތައް ފުރިހަމަކުރުމަށްފަހުއެވެ. އެގޮތުން ހުރިހާ ފްލެޓެއްގައިވެސް ތަށިމުށި ޖަހާފައި ހުންނާނެކަމަށާއި، ލިވިންގ ރޫމާއި ކޮޓަރިތަކުގައި އޭސީ ހަރުކުރެވިފައި ހުންނާނެކަމަށް އެޗް.ޑީ.ސީން ވިދާޅުވެއެވެ. އަދި ބަދިގެ ކައުންޓަރާއި ކަބަޑު ސެޓު ހަރުކޮށްފައި ހުންނާނެކަމަށާއި، ފާޚާނާތަކުގައި ފިކްސްޗަރޒް ހަރުކޮށްފައި ހުންނާނެކަމަށްވެސް އެކޯރޕަރޭޝަނުން ވިދާޅުވެއެވެ.
ހަމައެހެންމެ ބެލްކަނި ހުންނަނީ ދޮންނަމެޝިން ބެހެއްޓޭގޮތަށް ތައްޔާރުކުރެވިފައިކަމަށްވެސް އެޗް.ޑީ.ސީން ވިދާޅުވެއެވެ.
ވިނަރެސް ފްލެޓްގެ އަގު އުޅެނީ 2.5 މިލިއަނާއި 3.047 މިލިއަން ރުފިޔާއާ ދެމެދުގައެވެ. މި ފްލެޓްތަކަށް ކުރިމަތިލުމަށް އާއްމުންނަށް ހުޅުވާލުމަށް އެޗް.ޑީ.ސީން ތައްޔާރުވަމުން އަންނައިރު، އެކުންފުނިން ވަނީ ފްލެޓްތަކަށް ކުރިމަތިލާ މީހުންގެ ފުރިހަމަވާންޖެހޭ ޝަރުތުތަކާއި، ފައިސާ ދެއްކުމުގައި ޚިޔާރުކުރެވިދާނެ ގޮތްތަކުގެ މަޢުލޫމާތު ހާމަކޮށްފައެވެ. އަދި މި ފްލެޓްތައް ބަލާލުމަށް ބޭނުންވާ ފަރާތްތަކަށް އެ ފުރުޞަތު އަންނަ އޯގަސްޓުގެ ނިޔަލަށްވަނީ ހުޅުވާލާފައެވެ.