ބޯހިމެނުމުގެ މަސައްކަތަށް ތައްޔާރުވުމުގެގޮތުން "ޕައިލެޓް ސެންސަސް" ޕްރޮގްރާމެއް މިމަހު ފެށުމަށް ތައްޔާރުވަމުންދާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ވިދާޅުވެއްޖެއެވެ. މިޕްރޮގްރާމް މާލެއާއި އަތޮޅުތަކުގައި ކުރިއަށްގެންދިއުމަށް ވަނީ ހަމަޖެހިފައެވެ.
ސްޓެޓިސްޓިކްސް ބިއުރޯއިން ވިދާޅުވީ، "ޕައިލެޓް ސެންސަސް" ޕްރޮގްރާމެއް ކުރިއަށްގެންދިއުމުގެ އެންމެ މުހިއްމު ބޭނުމަކީ ބޯހިމެނުމުގެ މަސައްކަތަށް ތައްޔާރުވެފައިވާ މިންވަރު ވަޒަންކުރުންކަމަށެވެ.
މި ޕައިލެޓް ސެންސަސް ޕްރޮގްރާމުގައި ބޭނުންކުރާނީ އަސްލު ބޯހިމެނުމަށް ތައްޔާރުކޮށްފައިވާ ސުވާލު ކަރުދާސްތައްކަމަށާއި، ބޯހިމެނުމުގެ މަސައްކަތުގައި ބޭނުންކުރާ ޓެބްލެޓްތައްވެސް ޓެސްޓްކުރެވިގެންދާނެ ކަމަށް އެ ބިއުރޯއިން ވިދާޅުވެއެވެ. މި ހަރަކާތުގެ ތެރެއިން ބޯހިމެނުމުގެ މަސައްކަތަށް އެވްރެޖްކޮށް ހޭދަވާނެ ވަގުތާއި، އަތޮޅުތަކުން ބޭނުންވާ ރިޕޯޓްތައް ބޭނުންވާގޮތަށް ލިބޭތޯފަދަ ކަންކަން ޗެކްކުރެވިގެންދާނެކަމަށް އެ އިދާރާއިން ވިދާޅުވެއެވެ.
ޕައިލެޓް ސެންސަސް މާލޭ ސަރަޙައްދުގެ އިތުރުން ކުޅުދުއްފުށި ސިޓީއާއި ހދ. ނޮޅިވަރަމްގައިވެސް ހިންގުމަށް ވަނީ ހަމަޖެހިފައެވެ. މި ޕްރޮގްރާމް ފެށުމަށްޓަކާ މާލޭ ސަރަހައްދުގައި ހަރަކާތްތެރިވާ އެނިއުމަރޭޓަރުން ތަމްރީންކުރުމުގެ ޕްރޮގްރާމެއް މިމަހުގެ 5 އިން 9 އަކަށް ކުރިއަށްގެންގޮސްފައިވެއެވެ. އަދި ކުޅުދުއްފުއްޓާއި ނޮޅިވަރަމްގައި ހަރަކާތްތެރިވާ އެނިއުމަރޭޓަރުން ތަމްރީންކުރުން މިމަހުގެ 8 އިން 12 އަށް ކުރިއަށްދާނެކަމަށް ސްޓެޓިސްޓިކްސް ބިއުރޯއިން ވިދާޅުވެއެވެ.
މާލޭގައި ޕައިލެޓް ސެންސަސް ކުރިއަށްދާނީ މިމަހުގެ 14 އިން 26 އަށެވެ. ކުޅުދުއްފުށީގައި މިމަހުގެ 14 އިން 23 އަށް އަދި ނޮޅިވަރަމްގައި މިމަހުގެ 14 އިން 21 އަށް ކުރިއަށްދާނެއެވެ. މާލޭގައި ޕައިލެޓް ސެންސަސް ކުރިއަށްދާނީ ހެންވޭރު، މައްޗަންގޯޅި، ބާޒާރުމަތީ ސަރަޙައްދު، އަދި ހުޅުމާލޭގައެވެ. ހަމައެހެންމެ ސިނާޢީ މަސައްކަތްކުރާ ތަންތަނުގެ ތެރެއިން ތިލަފުށީގައި ޕައިލެޓް ސެންސަސް ހިންގާނެއެވެ. މީގެ އިތުރުން އެއް ރިސޯޓުގައިވެސް މި ހަރަކާތް ހިންގާނެއެވެ. މާލޭގައި މި މަސައްކަތް ކުރާ ކޮންމެ ސަރަހައްދަކުންވެސް 4 ބްލޮކަކުން މަޢުލޫމާތު އެއްކުރާނެކަމަށް ސްޓެޓިސްޓިކްސް ބިއުރޯއިން ވިދާޅުވެއެވެ.
ސްޓެޓިސްޓިކްސް ބިއުރޯއިން ވިދާޅުވީ، ޕައިލެޓް ސެންސަސް ޕްރޮގްރާމުގެ ދަށުން ގޭބިސީތަކުންނާއި މަސައްކަތްކުރާ ތަންތަނުން ބޭނުންވާ މަޢުލޫމާތު އެއްކުރުމަށް މާލެއާއި އަތޮޅުތަކުގައި އެ ބިއުރޯގެ ޓީމްތަކުން ހަރަކާތްތެރިވާނީ ހެނދުނު 08:30 އިން ފެށިގެން އިރުއޮއްސި 18:00 ޖެހުމާއި ހަމައަށްކަމަށެވެ. މި ޓީމްތަކުން ކޮންމެ ގޭބިސީއެއްގައިވެސް އެވްރެޖްކޮށް ހޭދަކުރާނީ އެއްގަޑިއިރާއި ތިރީސް މިނެޓުގެ ވަގުތެއްކަމަށް ސްޓެޓިސްޓިކްސް ބިއުރޯއިން ވިދާޅުވެއެވެ.
މިއީ ބޯހިމެނުމުގެ މަސައްކަތަށް ތައްޔާރުވުމުގެގޮތުން ކުރިއަށްގެންދެވޭ ވަރަށް މުހިއްމު ހަރަކާތެއްކަމުން، ޕައިލެޓް ސެންސަސް ޕްރޮގްރާމަށް އާއްމުންގެ ފުރިހަމަ އެއްބާރުލުން ބޭނުންވާނެކަމަށް ސްޓެޓިސްޓިކްސް ބިއުރޯއިން ވިދާޅުވެއެވެ.
ރާއްޖޭގެ އާބާދީއާއި ދިރިއުޅޭ ތަންތަނުގެ ބޯހިމެނުމާއި އިޤްތިޞާދީ މަސައްކަތްތަކުގެ ބޯހިމެނުން ކުރިއަށް ގެންދިޔުމަށް ނިންމާފައިވަނީ މިއަހަރުގެ ސެޕްޓެމްބަރުމަހުގެ 13 އިން 14 އަށް އަދި 17 އިން 25 އަށެވެ. ރާއްޖޭގެ އާބާދީއާއި ބޯހިމެނުމުގެ ބައެއް މަޢުލޫމާތުތައް އޮކްޓޯބަރު 6 ވަނަ ދުވަހު ޢާއްމުކުރާނެއެވެ. އަދި މުޅި ސަރވޭގެ މަޢުލޫމާތު ހާމަކުރާނީ ޤައުމީ ތަފާސްހިސާބުތަކުގެ ދުވަސްކަމަށްވާ އޮކްޓޯބަރު 20 ގައެވެ.