ހުޅުމާލޭ ދެވަނަ ފިޔަވަހީގައި ތަރައްޤީކުރާ ވިނަރެސް ފްލެޓްތަކުގެ މަސައްކަތް އަންނަ އޯގަސްޓްމަހަށް ނިންމުމަށް މަސައްކަތްކުރަމުންދާކަމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީން ވިދާޅުވެއްޖެއެވެ. ވިނަރެސް މަޝްރޫޢުގެ ދަށުން ތަރައްޤީކުރަމުންދަނީ މެދުފަންތީގެ އެޕާޓްމަންޓްތަކެކެވެ.
ވިނަރެސް ހައުސިން މަޝްރޫޢަކީ ސަރުކާރުން އެޗް.ޑީ.ސީއާ ގުޅިގެން ކުރިއަށްގެންދާ މެދުފަންތީގެ ބޯހިޔާވަހިކަމުގެ މަޝްރޫޢެކެވެ. 10 ޓަވަރު ހިމެނޭހެން ތަރައްޤީކޮށްފައިވާ ވިނަރެސް މަޝްރޫޢުގައި 1344 ފްލެޓު ހިމެނެއެވެ. މިއީ މުޅިންވެސް 3 ކޮޓަރީގެ ފްލެޓްތަކެކެވެ.
މި ފެލްޓްތައް ތަރައްޤީކޮށްފައިވަނީ ހުޅުމާލޭ ފޭސް ދޭއްގެ ހިތިގަސްމަގުގައެވެ. މި މަޝްރޫޢުގެ މަސައްކަތް ކުރިއަށްދާގޮތާ ގުޅޭގޮތުން ޕީ.އެސް.އެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން އެޗް.ޑީ.ސީގެ ސީނިއަރ ސޭލްސް އޮފިސަރ އައިމިނަތު ފަނާން ހަބީބް ވިދާޅުވީ، ފްލެޓްތަކުގެ މަސައްކަތް މިހާރު ނިމުމަކާ ގާތްވެފައިވާކަމަށާއި، މިވަގުތު ކުރިއަށްދަނީ ފްލެޓްތަކުގެ އެތެރޭގެ ފިނިޝިންގގެ މަސައްކަތްކަމަށެވެ. އަދި އަމާޒަކީ އަންނަ އޯގަސްޓްމަހަށް ވިނަރެސްގެ ހުރިހާ މަސައްކަތެއް ނިންމާލުންކަމަށް ފަނާން ވިދާޅުވިއެވެ.
ވިނަރެސް ފްލެޓްތައް ބަލާލަން ބޭނުންވާ އާއްމުންނަށް މިހާރު އެ ފުރުޞަތު ހުޅުވާލާފައިވާއިރު، މި ޓުއަރތަކަށް އާއްމުންގެ ފަރާތުން ބޮޑު ތަރުހީބެއް ލިބެމުންދާކަން ފަނާން ފާހަގަކުރެއްވިއެވެ.
"މިހާރު ހަމަ ފިނިޝިންގގެ މަސައްކަތްތައް އަނެއްހެން ކުރިއަށްދަނީ. އަޅުގަނޑުމެންނަށް މިހާރު ޕްރޮޖެކްޓް ނިމޭނެކަމަށް އަންދާޒާކުރެވޭ ތާރީޚަކީ މިއަހަރުގެ އޯގަސްޓް ނިމޭ ހިސާބުގައި. މިހާތަނަށް އައިރު 1500 އަށްވުރެ ގިނަ ބޭފުޅުން މި ފްލެޓްތައް ބަލާލުމަށް އައިސްފި. ފީޑްބެކް ވަރަށް ރަނގަޅަށް އުޅެނީ" ފަނާން ވިދާޅުވިއެވެ.
މި މަޝްރޫޢުގެ މަސައްކަތް ނިމުމަކާ، ގާތްވެފައިވާއިރު، މިމަހުގެ ތެރޭގައި ފްލެޓްތަކަށް ކުރިމަތިލުމަށް ހުޅުވާލުމަށް ސަރުކާރުން މިހާރު އަންނަނީ ތައްޔާރުވަމުންނެވެ. ވިނަރެސް ފްލެޓްތައް އާއްމުންނަށް ދޫކުރުމުގެ މަސައްކަތް ކުރުމަށް ހަމަޖެހިފައިވަނީ ޕްލޭނިންގ މިނިސްޓްރީއާއި އެޗް.ޑީ.ސީ ގުޅިގެންނެވެ. އެގޮތުން މިނިސްޓްރީން ފޯމުތައް ޕްރޮސެސްކުރުމަށްފަހު ޝަރުތު ހަމަވާ ފަރާތްތަކުގެ ފައިނޭންޝަލް ސްކްރީނިންގ ހެދުމަށް އެޗް.ޑީ.ސީއަށް ފޮނުވޭނެއެވެ. އެއަށްފަހު ފައިނޭންޝަލް ސްކްރީނިންގއިން އެޕްރޫވްވާ ފަރާތްތަކަށް ފްލެޓްތައް އެވޯޑްކުރުމުގެ މަސައްކަތް ކުރެވިގެންދާނެއެވެ.
ވިނަރެސްއަށް ކުރުމަތިލާން ހުޅުވާލުމަށްވަމުންދާ ތައްޔާރީތަކާގުޅޭގޮތުން މަޢުލޫމާތުދެއްވަމުން ޕްލޭނިންގ މިނިސްޓްރީގެ ސީނިއަރ އެގްޒެކެޓިވް ޑިރެކްޓަރ މުޙައްމަދު އާރިފް ވިދާޅުވީ، ފްލެޓްތަކަށް ފޯމު ހުށަހެޅުމަށް ޚާއްސަ ޕޯޓަލެއް ތަރައްޤީކުރުމުގެ މަސައްކަތް ކުރަމުންދާކަމަށާއި، މިހާރު ކުރިއަށްދަނީ މި ޕޯޓަލް ޓެސްޓްކުރުމުގެ މަސައްކަތްކަމަށެވެ. އަދި ކުޑަ ދުވަސްކޮޅެއްގެ ތެރޭގައި އާއްމުންނަށް މި ފްލެޓްތަކަށް ކުރިމަތިލާން ހުޅުވާލެވޭނެކަމަށް އާރިފް ވިދާޅުވިއެވެ.
"ސަރުކާރުގެ ކިއުގައި ނުޖެހި ފްލެޓަށް އެދުމުގެ ސިޔާސަތުގެ ދަށުން އަޅުގަނޑުމެން ވިނަރެސްއަށް ހުޅުވާލާނީ މިނިސްޓްރީން ތައްޔާރުކުރަމުން މިދާ ޕޯޓަލް މެދުވެރިކޮށް. ވީހާވެސް ބޮޑަކަށް އާއްމުންނަށް ލުއިފަސޭހަވާނެފަދަ ގޮތަކަށް ޕޯޓަލް ތަރައްޤީކުރާނީ. ޑޮކިއުމަންޓް އެޓޭޗްކުރުމާއި ފޯމު ހިފައިގެން އައުމާ މިފަދަ ކަންކަން ހުއްޓޭކަހަލަ ގޮތަކަށް ޑީއެންއާރާއި ސަރުކާރުގެ އެހެނިހެން އިދާރާތަކާގުޅިގެން ވީހާވެސް ބޮޑަކަށް އަޅުގަނޑުމެން އެމީހަކު ޕޯޓަލުން އެޕްލައިކުރީމަ ދެން އަޅުގަނޑުމެން މި ހިންގަންޖެހޭ ވެރިފިކޭޝަންތައް ހިންގައިގެން އެންމެ ނީޑީ މީހާ ދެނެގަންނާނީ" އާރިފް ވިދާޅުވިއެވެ.
ވިނަރެސް މަޝްރޫޢުގެ ދަށުން ފްލެޓްތައް ތަރައްޤީކޮށްފައިވަނީ 4 ކޮންސެޕްޓަކަށެވެ. އެއީ އިނާ ވިއު، އައުޓާ ވިއު، މެރީނާ ވިއު އަދި ސްޓޭންޑާޑް ވިއު އެޕާޓްމެންޓްތަކެވެ. މެރީނާ ވިއު ފްލެޓްތަކުގައި ހިމެނެނީ 172 އެޕާޓްމަންޓެވެ. އައުޓާ ވިއުގައި 372 އެޕާޓްމެންޓް ހިމެނެއެވެ. އިނާ ވިއުގައި ހިމެނެނީ 352 އެޕާޓްމަންޓެވެ. އަދި ސްޓޭންޑާޑް ވިއުގައި 448 އެޕާޓްމެންޓް ހިމެނެއެވެ.
މި ފްލެޓްތައް އާއްމުންނަށް ދޫކުރަނީ ފިނިޝިންގގެ މަސައްކަތްތައް ފުރިހަމަކުރުމަށްފަހުއެވެ. އެގޮތުން ހުރިހާ ފްލެޓެއްގައިވެސް ތަށިމުށި ޖަހާފައި ހުންނާނެކަމަށާއި، ލިވިންގ ރޫމާއި ކޮޓަރިތަކުގައި އޭސީ ހަރުކުރެވިފައި ހުންނާނެކަމަށް އެޗް.ޑީ.ސީން ވިދާޅުވެއެވެ. އަދި ބަދިގެ ކައުންޓަރާއި ކަބަޑު ސެޓު ހަރުކޮށްފައި ހުންނާނެކަމަށާއި، ފާޚާނާތަކުގައި ފިކްސްޗަރޒް ހަރުކޮށްފައި ހުންނާނެކަމަށްވެސް އެޗްޑީސީން ވިދާޅުވެއެވެ. ހަމައެހެންމެ ބެލްކަނި ހުންނަނީ ދޮންނަމެޝިން ބެހެއްޓޭގޮތަށް ތައްޔާރުކުރެވިފައިކަމަށްވެސް އެޗް.ޑީ.ސީން ވިދާޅުވެއެވެ.