ގްރޭޓަރ މާލޭ ސަރަޙައްދުގައި ބަހުގެ ޚިދުމަތް ފޯރުކޮށްދިނުމުގައި ހަރަކާތްތެރިވާނެ ބަސް ޑްރައިވަރުން ހޯދުމަށް އެމް.ޓީ.ސީ.ސީން ހުޅުވާލައިފިއެވެ.
އެމް.ޓީ.ސީ.ސީން ވަނީ އެކުންފުނީގައި ބަސް ޑްރައިވަރުންގެ ގޮތުގައި ވަޒީފާ އަދާކުރުމަށް 35 ޖާގައަށް ހުޅާލާފައެވެ. މި ވަޒީފާއަށް ކުރިމަތިލާ ފަރާތްތަކަކީ ބަސް ދުއްވުމުގެ ލައިސެންސް އޮންނަ ފަރާތްތަކަށް ވާންޖެހޭނެއެވެ. އަދި މި މަޤާމަށް މީހުން ހޮވާނީ ކޮންޓްރެކްޓް އުޞޫލުންކަމަށާއި، ނަމަވެސް މަސައްކަތުގެ ފެންވަރަށް ބަލާ ކޮންޓްރެކްޓުގެ މުއްދަތު އިތުރުކުރެވޭނެކަމަށް އެމް.ޓީ.ސީ.ސީން ވިދާޅުވެއެވެ.
އެމް.ޓީ.ސީ.ސީން ގިނަ ޢަދަދެއްގެ ބަސް ޑްރައިވަރުން ހޯދަން އިޢުލާންކޮށްފައިވާއިރު، މި ވަޒީފާއަށް މުސާރައިގެގޮތުގައި އެލަވެންސްތަކާއެކު 14،800 ރުފިޔާއާއި 18،900 ދެމެދުގެ މުސާރައެއް ލިބޭނެއެވެ. ހަމައެހެންމެ މެޑިކަލް އިންޝުއަރެންސްއާއި، ޕަރފޯމަންސް ބޭސްޑް އިންކްރީމަންޓް، ބޯނަސް އަދި ކެރިއަރ ޑިވެލޮޕްމަންޓް ފުރުޞަތުތައް ފަހިކޮށްދެވިގެންދާނެކަމަށް އެމް.ޓީ.ސީ.ސީން ވިދާޅުވެއެވެ.
ބަސް ޑްރައިވަރުންގެ އިތުރުން، އެމް.ޓީ.ސީ.ސީގެ އާފްޓަރ ސޭލްސް ސަރވިސް ސެންޓަރުގައި މަސައްކަތްކުރާނެ 12 އެސިސްޓެންޓް މެކޭނިކުން ހޯދުމަށްވެސް އެކުންފުނިން ވަނީ ހުޅުވާލާފައެވެ. މި މަޤާމުގެ ޝަރުތުތަކުގެ ތެރޭގައި އިންޖީން މަރާމާތުކުރުމާއި މެއިންޓެނެންސްގެ ދާއިރާއިން ސެޓިފިކެޓް ލެވެލް 3ގެ ސަނަދެއް ޙާޞިލުކޮށްފައިވުން ނުވަތަ ގުޅޭ ދާއިރާއަކުން 2 އަހަރު ދުވަހުގެ މަސައްކަތު ތަޖުރިބާ ލިބިފައިވުން ހިމެނެއެވެ. މި މަގާމަށް ހޮވޭ ފަރާތްތަކަށް މުސާރައިގެ ގޮތުގައި މަހަކު 13،900 އާއި 17،600 ރުފިޔާއާއި ދެމެދުގެ މުސާރައެއް ލިބޭނެއެވެ. މި މަޤާމްތަކަށް ޝަޢުގުވެރިވާ ފަރާތްތަކުން އެކުންފުނީގެ އޮންލައިން ޖޮބް އެޕްލިކޭޝަން ޕޯޓަލް މެދުވެރިކޮށް ކުރިމަތިލެވޭނެކަމަށް އެމް.ޓީ.ސީ.ސީން ވިދާޅުވެއެވެ.
ގްރޭޓަރ މާލޭ ސަރަހައްދުގައި ފޯރުކޮށްދޭ ބަހުގެ ޚިދުމަތުގެ ފެންވަރު ރަނގަޅުކުރުމަށް އެމް.ޓީ.ސީ.ސީން އަންނަނީ ގިނަ މަސައްކަތްތަކެއް ކުރަމުންނެވެ.