މާލޭ ސަރަޙައްދުގެ ބޮޑު 3 ސްކޫލެއްގެ ކިޔެވުން އެއްދަންފަޅިއަށް ބަދަލުކުރުމުގެ ޕްލޭން އެބައޮތްކަމަށާއި، އެކަމަށް މަސައްކަތްކުރަމުންދާކަމަށް މިނިސްޓަރ އޮފް އެޑިޔުކޭޝަން ޑރ. ޢާއިޝަތު ޢަލީ ވިދާޅުވެއްޖެއެވެ.
ރައްޔިތުންގެ މަޖިލީހުގެ ޖަލްސާގައި މެދުހެންވޭރު ދާއިރާގެ މެންބަރު ޢަލީ ޢާޡިމް ވަނީ މާލޭގެ ސްކޫލްތައް އެއްދަންފަޅިއަށް ބަދަލުކުރުމުގެ މަސައްކަތް ނިމޭނެ ތާރީޚަކާގުޅޭގޮތުން އެޑިއުކޭޝަން މިނިސްޓަރާއި ސުވާލުކުރައްވާފައެވެ. މި ސުވާލަށް ޖަވާބުދެއްވަމުން މިނިސްޓަރ ޑރ. ޢާއިޝަތު ޢަލީ ވިދާޅުވީ، ސްކޫލްތައް އެއްދަންފަޅިއަށް ބަދަލުކުރުމަކީ އެމް.ޑީ.ޕީގެ ސިޔާސަތެއްކަމަށާއި، އެކަން ތަންފީޒުކުރުމުގެ މަސައްކަތްތައް ކުރަމުންދާކަމަށެވެ.
މިނިސްޓަރ ވިދާޅުވީ، މިކަން ކުރުމުގައި ވަކިން ޚާއްސަކޮށް މާލޭ ސަރަޙައްދުގައި ދިމާވާ އެންމެ ބޮޑު ގޮންޖެހުމަކީ ޖާގައިގެ ދަތިކަންކަމަށެވެ. އެއްދަންފަޅީގެ ސްކޫލެއްގެ ގޮތުގައި ޢިއްޒުއްދީން ސްކޫލް ޤާއިމުކުރެވިފައިވާކަން ފާހަގަކުރައްވާ މިނިސްޓަރ ވިދާޅުވީ، ހުޅުމާލޭގައި އަލަށް ޤާއިމުކުރާ 4 ސްކޫލުވެސް ވެގެންދާނީ އެއްދަންފަޅީގެ ސްކޫލްތަކަކަށްކަމަށެވެ. އަދި މާލޭގެ ބޮޑު 3 ސްކޫލެއް އެއްދަންފަޅިއަށް ބަދަލުކުރުމުގެ ޕްލޭން ގެންގުޅޭކަމަށް މިނިސްޓަރ ވިދާޅުވިއެވެ.
"އަޅުގަނޑުމެންގެ ޕްލޭންގައި އެބަހުރި މަޖީދިއްޔާ، އިސްކަންދަރު، އަދި އަމީނިއްޔާ ސްކޫލް އެއް ދަންފަޅިއަށް ހެދުމަށް. ސީއެޗްއެސްއީ އަޅުގަނޑުމެން މިހާރު ހުޅުމާލޭގައި އެބަ އަޅަން އައު އިމާރާތެއް. ހުޅުމާލެއަށް ބަދަލުކުރެވުނީމަ އަޅުގަނޑުމެންނަށް މާލޭގައި ހުރި ސްކޫލް އެއް ދަންފަޅިއަށް ބަދަލުކުރުމުގެ ފުރުޞަތު ހުޅުވިގެންދާނެ" މިނިސްޓަރ ވިދާޅުވިއެވެ.
އެޑިޔުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވީ، މާލޭގެ އިތުރު 3 ސްކޫލެއް އެއްދަންފަޅިއަށް ބަދަލުކުރުމުގެ ވިސްނުންގެންގުޅުންނަމަވެސް، އެކަމަށް ބޭނުންވާ ބަޖެޓް ލިބި، އެކަން ތަންފީޒުކުރެވޭނެ ސީދާ ދުވަހެއް އަދި ދަންނަވާކަނަށް ނޭނގޭކަމަށެވެ. މިނިސްޓަރ ވަނީ ރާއްޖޭގެ އެކި ސަރަޙައްދުތަކުން ވަރަށް ގިނަ ސްކޫލްތަކެއް މިހާރުވެސް އެއްދަންފަޅިއަށް ބަދަލުކުރެވިފައިވާކަން ފާހަގަކުރައްވާފައެވެ.