ކޮންޓެއިނަރެއްގައި ފޮރުވައިގެން ރާއްޖެއަށް އެތެރެކުރަން އުޅުނު މަސްތުވާތަކެތީގެ މަގުމަތީ އަގު ގާތްގަނޑަކަށް 4 މިލިއަން ރުފިޔާއަށް އަރާކަމަށް މޯލްޑިވްސް ކަސްޓަމްސް ސަރވިސްއިން ވިދާޅުވެއްޖެއެވެ.
މުދާ އުފުލާ ކޮންޓެއިނަރެއްގައި މަސްތުވާތަކެތި ފޮރުވައިގެން ރާއްޖެއަށް އެތެރެކޮށްފައިވަނީ މިދިޔަ މަހުގެ 29 ވަނަ ދުވަހުއެވެ. މިތަކެތި އަތުލައިގަތީ އެމް.ޕީ.އެލްގެ ޕޯޓަށް ހުސްކުރި ކޮންޓެއިނަރ ޝިޕްމަންޓެއްގެ ތެރެއިންނެވެ.
އިންޑިއާގެ ޓުޓިކޮރިންއިން ކަނޑުމަގުން ރާއްޖެގެނެސްފައިވާ މުދާ ޝިޕްމަންޓެއްގައި ޤާނޫނާއި ގަވާއިދާ ޚިލާފު އެއްޗެއް ހުރިކަމަށް ޝައްކުކުރެވިގެން، އެ މުދާ ބަލައި ފާސްކުރުމަށްޓަކާ މާލޭ ވިޔަފާރި ބަނދަރުގައި މިމަހުގެ 9 އިން 11 އަށް ކަސްޓަމްސްއާއި ފުލުހުން ގުޅިގެން ވަނީ ޚާއްޞަ އޮޕަރޭޝަނެއް ހިންގާފައެވެ. ކަސްޓަމްއިން ވިދާޅުވީ މި އޮޕަރޭޝަންގައި މަސްތުވާތަކެތީގެ ބާވަތެއްކަމަށްވާ ހަޝިޝް އޮއިލްގެ 15.5 ކިލޯ އަތުލައިގަނެފައިވާކަމަށެވެ.
މި މައްސަލަ އިތުރަށް ތަޙްޤީޤުކުރުމަށްޓަކާ މިތަކެތި މިހާރު ފުލުހުންނާއި ޙަވާލުކޮށްފައިވާކަމަށް ކަސްޓަމްސްއިން ވިދާޅުވެއެވެ.