ދިވެހިރާއްޖެއާއި ރުވާންޑާއާއި ދެމެދު 5 ދާއިރާއަކުން ގުޅުން ބަދަހިކުރުމުގެ އެއްބަސްވުމުގައި ސޮއިކޮށްފިއެވެ.
މި އެއްބަސްވުމުގައި ދިވެހިރާއްޖެއިން ރުވާންޑާއެކު ސޮއިކޮށްފައިވަނީ އެ ޤައުމުގެ މިނިސްޓްރީ އޮފް ފޮރިން އެފެއާޒް އެންޑް އިންޓަރނޭޝަނަލް ކޯޕަރޭޝަންގައި ބޭއްވި ރަސްމިއްޔާތެއްގައެވެ. ރާއްޖޭގެ ފަރާތުން މި އެއްބަސްވުމުގައި ސޮއިކުރެއްވީ، ފޮރިން މިނިސްޓްރީގެ ސްޓޭޓް މިނިސްޓަރ އަޙްމަދު ޚަލީލެވެ. ރުވާންޑާގެ ފަރާތުން ސޮއިކުރެއްވީ އެ ޤައުމުގެ ފޮރިން މިނިސްޓަރ ވިންސެންޓް ބިރޫޓާއެވެ.
ރާއްޖެއާއި ރުވާންޑާއާއި ދެމެދު ސޮއިކުރެވުނު އެއްބަސްވުމުގެ ދަށުން ގުޅުން ބަދަހިކުރުމަށް ނިންމާފައިވާ ދާއިރާތަކަކީ، ޚާރިޖީ ދާއިރާއާއި، ވައިގެ މަގުން ދަތުރުފަތުރުކުރުމާއި، ފަތުރުވެރިކަމުގެ ދާއިރާއާއި ގުޅުންހުރި ތަރައްޤީއާއި ޕްރޮމޯޝަން އަދި ވިޔަފާރި ހަރަކާތްތަކާއި، މެރިޓައިމް ދާއިރާގެ އިތުރުން، ދަނޑުވެރިކަމުގެ ދާއިރާއިން މަސްވެރިކަމާއި މެރިން ރިސޯސަސްގެ ދާއިރާއެވެ.
ފޮރިން މިނިސްޓްރީން ވިދާޅުވީ، މި އެއްބަސްވުމުގެ ސަބަބުން، ރާއްޖެއާއި ރުވާންޑާއާއި ދެމެދު ޚާރިޖީގުޅުން އިތުރަށް ވަރުގަދަވެ، ދެ ޤައުމުގެ މަސްލަހަތު ހިމެނޭ ބައިނަލްއަޤްވާމީ މައްސަލަތަކުގައި އެކުގައި މަސައްކަތްކުރުމަށް މަގުފަހިވެގެންދާނެކަމަށެވެ. ދިވެހިރާއްޖެއިން
މި އެއްބަސްވުމުގައި ސޮއިކުރެއްވުމަށްފަހު، ސްޓޭޓް މިނިސްޓަރ އަޙްމަދު ޚަލީލު ވަނީ ރުވާންޑާގެ ފޮރިން މިނިސްޓަރާއި ބައްދަލުކުރައްވާފައެވެ. ރުވާންޑާގެ މިނިސްޓްރީ އޮފް ފޮރިން އެފެއާޒްގައި ބޭއްވި މި ބައްދަލުކުރެއްވުމުގައި، ސްޓޭޓް މިނިސްޓަރ ޚަލީލްއާއި މިނިސްޓަރ ބިރޫޓާ ވަނީ ފާއިތުވެދިޔަ އަހަރުތަކުގައި ރާއްޖެއާއި ރުވާންޑާއާ ދެމެދު އޮތް ގުޅުން އިތުރަށް ބަދަހިވެފައިވާކަން ފާހަގަކުރައްވާ، މި ގާތް ގުޅުން ދެމެހެއްޓުމަށް މަސައްކަތްކުރައްވާނެކަމުގެ ޔަޤީންކަން ދެއްވާފައެވެ.
މި މަޝްވަރާތަކުގައި ދެ ޤައުމުންވެސް ވަނީ ދެޤައުމުގެ ދެމެދުގައި ވިޔަފާރިއާއި، ދަނޑުވެރިކަމާއި، ކަނޑުދަތުރުފަތުރާއި، ފަތުރުވެރިކަމުގެ ދާއިރާއިން ކުރެވޭ މުއާމަލާތްތައް ވަރުގަދަކުރުމަށް ހަރުދަނާ ވައިގެ ދަތުރުފަތުރުގެ ނިޒާމެއް އޮތުމުގެ މުހިއްމުކަން ފާހަގަކުރައްވާފައެވެ. މި ބައްދަލުކުރެއްވުމުގައި ސްޓޭޓް މިނިސްޓަރ ޚަލީލްގެ އަރިހުގައި ފޮރިން މިނިސްޓްރީގެ އެޑިޝަނަލް ސެކްރެޓަރީ އަޙްމަދު ޝިއާން އާއި ލަންޑަންގައި ހުންނަ ދިވެހިރާއްޖޭގެ ހައިކޮމިޝަންގެ ކައުންސެލަރ ޔާމީން ޝާހިދު ބައިވެރިވެވަޑައިގެންނެވިއެވެ.
ފޮރިން މިނިސްޓްރީގެ ސްޓޭޓް މިނިސްޓަރ ޚަލީލް ރުވާންޑާއަށް ވަޑައިގެންފައި މިވަނީ މިމަހު ރުވާންޑާގައި ބޭއްވުމަށް ހަމަޖެހިފައިވާ ކޮމަންވެލްތު ޤައުމުތަކުގެ އިސްވެރިންގެ ބައްދަލުވުމުގެ ކުރިން ބޭއްވި ކޮމަންވެލްތު ޤައުމުތަކުގެ ފޮރިން މިނިސްޓަރުންގެ ބައްދަލުވުމުގައި ބައިވެރިވެވަޑައިގަތުމަށެވެ.
ރާއްޖެއިން ރުވާންޑާއާއެކު ސިޔާސީ ގުޅުން ޤާއިމުކޮށްފައިވަނީ 6 ސެޕްޓެމްބަރ 2019 ގައެވެ.