ރަޝިއާއިން ދައްކަންޖެހޭ ގިނަ ލޯނުތަކެއް ލޯނު ދައްކަންޖެހޭ ވަގުތު ޖެހުނުއިރުވެސް ނުދެއްކި ޑިފޯލްޓްވެއްޖެއެވެ.
މިއީ 1998 ވަނަ އަހަރުގެ ފަހުން ރަޝިއާ ޑެޓް ޑީފޯލްޓު ވި ފުރަތަމަ ފަހަރެވެ.
ލޯނުތައް ދައްކަންޖެހޭ ވަގުތުގައި ނުދެއްކުނީ ރަޝިއާ-ޔުކްރެއިން ހަނގުރާމައިގެ ސަބަބުން ރަޝިއާއާ ދެކޮޅަށް ހުޅަނގުން އަޅާފައިވާ ފިޔަވަޅުތަކުގެ ސަބަބުން ބައިނަލްއަޤުވާމީ ބޭންކިން ސިސްޓަމްގެ ތެރެއިން ފައިސާ ދައްކަން ދަތިތަކެއް ހުރުމުންނެވެ.
މިދިޔަ އާދީއްތައް ދުވަހަށް ލޯނު ދައްކަންޖެހޭ ވަގުތު ހަމަވިއިރު 100 މިލިއަން އެމެރިކާ ޑޮލަރުގެ ލޯނެއް އޮތް ނަމަވެސް ހުޅަނގުން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން މި ލޯނު ދެއްކޭގޮތް ވަނީ ނުވެފައެވެ. 100 މިލިއަން އެމެރިކާ ޑޮލަރުގެ ތެރޭގައި ހިމެނެނީ ދެ ލޯނެކެވެ. އެއީ ޔޫރޯއިން ދައްކަންޖެހޭ ލޯނަކާއި ޑޮލަރުން ދައްކަންޖެހޭ ލޯނެކެވެ.
ނަމަވެސް ރަޝިއާ ބުނާގޮތުގައި ލޯނު ފައިސާ ޔޫރޯކްލިއާ ބޭންކަށް ފޮނުވާފައިވާ ކަމަށާއި އެ ބޭންކުން އިންވެސްޓަރުންނާއި ފައިސާ ހަވާލުކުރާނެއެވެ. ވީމާ ރަޝިއާ ޑީފޯލްޓް ކުރެވޭނެ އެއްވެސް ތަނެއް ނެތްކަމަށްވެސް ރަޝިއާއިން ބުނެއެވެ. ނަމަވެސް އެ ފައިސާ ވަނީ ޔޫރޯކްލިއާ ބޭންކުގައި ތާށިވެފައިކަމަށް ރިޕޯޓުތައް ބުނެއެވެ.
ލޯނު ނުދެއްކި ރަޝިއާއަށް ޑީފޯލްޓަކަށް ދާން ޖެހުމަކީ ވަރަށް ބޭއިންސާފުން ވެފައި އޮތް ކަމެއްކަމަށް ރަޝިއާއިން ބުނެއެވެ. އަދި ޔޫރޯކްލިއާގައި ފައިސާ ތާށިވުމަކީ އެމީހުންގެ މައްސަލައެއް ނޫންކަމަށްވެސް ރަޝިއާގެ އޮފިޝަލަކު ވަނީ ބުނެފައެވެ.
ޑީފޯލްޓުގެ ސަބަބުން އެ ޤައުމުގެ އިޤްޠިޞާދަށް ވާ ގެއްލުންތައް ދިގުދެމިގެންދާނެކަމަށްވެސް ރަޝިއާގެ މާލީ ވަޒީރު ވަނީ ވިދާޅުވެފައެވެ.