ތައިރޮކްސިން ސޯޑިއަމްގެ ވަގު ބޭސްތަކެއް ދައުރުވަމުންދާތީ ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ، އެމް.އެފް.ޑީ.އޭއިން އަންގައިފިއެވެ.
އިންޑިއާގެ އެކްމޭ ޖެނެރިކްސް އެލް.އެލް.ޓީ ކުންފުނިން އުފައްދާ މި ބޭހަކީ ތައިރޮއިޑް މައްސަލަ ހުންނަ މީހުން ބޭނުންކުރަމުން އަންނަ ބޭހެކެވެ.
އެމް.އެފް.ޑީ.އޭއިން ވިދާޅުވީ، ތައިރޮލްސިން ސޯޑިއަމްގެ ތައިރޮނޮމް 100 މައިކްރޯގްރާމުގެ ބޭހުގެ ވަގު ވައްތަރެއް ނުވަތަ ކައުންޓަރފީޑް ޕްރޮޑަކްޓެއް ފެނިފައިވާކަމަށް އިންޑިއާގެ ތެލަންގަނާ ޑްރަގްސް ކޮންޓްރޯލް އެޑްމިނިސްޓްރޭޝަނުން އަންގާފައިވާކަމަށެވެ. މި ބޭހުގެ ކައުންޓަރފީޓް ބެޗްތަކާއި ބެހޭ މަޢުލޫމާތު އެ އޮތޯރިޓީން ވަނީ އާއްމުކޮށްފައެވެ.
މިކަމާގުޅިގެން މި ބެޗްތައް ރާއްޖެ އެތެރެކުރުމާ ބޭނުންކުރުން އެމް.އެފް.ޑީ.އޭއިން ވަނީ މަނާކޮށްފައެވެ. އަދި މިބޭހާ ބެހޭ އެއްވެސް މަޢުލޫމާތެއް ލިބިއްޖެނަމަ ލަސްނުކޮށް އެ އޮތޯރިޓީގެ ހޮޓްލައިން ނަންބަރު 7200321 އަކަށް ގުޅުއްވާ މަޢުލޫމާތު ހިއްސާކުރުމަށް އެ އޮތޯރިޓީން ވަނީ އިލްތިމާސްކުރައްވާފައެވެ.
އެމް.އެފް.ޑީ.އޭއިން ވިދާޅުވީ، ރައްކާތެރިކަމުގެ ފިޔަވަޅެއްގެގޮތުން ރާއްޖޭގެ މާކެޓުން ބޭހުގެ ސާމްޕަލްތައް ނަގައި ޓެސްޓްކުރުމުގެ މަސައްކަތް ފަށާފައިވާކަމަށެވެ. އަދި ޕޯޓްސް އޮފް އެންޓްރީގައި މި ބާވަތުގެ ބޭސް އެތެރެކުރޭތޯ ބަލަމުންދާކަމަށެވެ.