މާލޭ ސަރަހައްދުގައި ޓެކްސީގެ ޚިދުމަތް ފޯރުކޮށްދޭ އަގުތަކަށް މިނިސްޓްރީ އޮފް ޓްރާންސްޕޯޓްް އެންޑް ސިވިލް އޭވިއޭޝަނުން ބަދަލުތަކެއް ގެނެސްފިއެވެ.
ޓްރާންސްޕޯޓް މިނިސްޓްރީން ވިދާޅުވީ، މި ބަދަލުތައް ގެނެސްފައިވަނީ ރާއްޖޭގެ ބާޒާރުގައި ތެލުގެ އަގު އުފުލުމާގުޅިގެންކަމަށެވެ.
ޓްރާންސްޕޯޓް މިނިސްޓްރީން އަގުތަކަށް ގެނައި ބަދަލާގުޅިގެން ކުރިން މާލެ އަދި ހުޅުމާލޭގެ އެތެރޭގެ ދަތުރުތަކަށް ނަގަމުންދިޔަ 25 ރުފިޔާ ވަނީ 30 ރުފިޔާ އަށް ބޮޑުކޮށްފައެވެ. މާލެއިން ހުޅުމާލެ އަދި ހުޅުމާލެއިން މާލެއަށް ޓެކްސީ ދަތުރުކުރެވޭނެ އެންމެ ބޮޑު އަގުގެގޮތުގައި ކުރިން ކަނޑައަޅާފައި އޮތީ 75 ރުފިޔާއެވެ. އެހެންނަމަވެސް މިހާރު މި އަގު ވަނީ 85 ރުފިޔާއަށް ބޮޑުކޮށްފައެވެ. އަދި މާލެއިން ހުޅުމާލޭ ދެވަނަ ފިޔަވައްސަށް އަދި ހުޅުމާލޭ ދެވަނަ ފިޔަވަހިން މާލެއަށް ދަތުރުކުރާނެ އަގެއްގެގޮތުގައި ކަނޑައަޅާފައިވަނީ 100 ރުފިޔާއެވެ.
މާލެއިން ހުޅުލެއަށް އަދި ހުޅުލެއިން މާލެއަށް ޓެކްސީ ދަތުރުކުރާ އަގަށްވެސް މިނިސްޓްރީން ވަނީ ބަދަލުގެނެސްފައެވެ. އެގޮތުން ކުރިން 60 ރުފިޔާ ނަގަމުންދިޔަ މި ދަތުރުތައް މިހާރު ވަނީ 70 ރުފިޔާއަށް ބޮޑުކޮށްފައެވެ.
އަގުތަކަށް ގެނެވުނު ބަދަލުތަކާއެކު ހުޅުމާލޭ ފުރަތަމަ ފިޔަވަހިން ހުޅުލެއަށް އަދި ހުޅުލެއިން ހުޅުމާލޭ ފުރަތަމަ ފިޔަވައްސަށް ކުރާ ދަތުރުތަކަށް ކަނޑައަޅާފައިވަނީ 80 ރުފިޔާއެވެ. އަދި ހުޅުމާލޭ ދެވަނަ ފިޔަވަހިން ހުޅުލެއަށް އަދި ހުޅުލެއިން ހުޅުމާލޭ ދެވަނަ ފިޔަވައްސަށް ކަނޑައަޅާފައިވަނީ ދަތުރަކަށް 85 ރުފިޔާއެވެ. މީގެ އިތުރުން ހުޅުމާލޭ ފުރަތަމަ ފިޔަވައްސާއި ދެވަނަ ފިޔަވައްސާ ދެމެދު ކުރާ ދަތުރުތަކުގެ އަގެއްގެގޮތުގައި ހަމަޖައްސާފައިވަނީ 40 ރުފިޔާއެވެ.
މާލޭ ސަރަޙައްދުގައި ޓެކްސީ ދަތުރުކުރާ އަގުތަކަށް ޓްރާންސްޕޯޓް މިނިސްޓްރީން މި ބަދަލުތައް ގެނެސްފައި މިވަނީ ބާޒާރުގައި ތެލުގެ އަގުތަކަށް އައި ބަދަލުތަކާ ގުޅިގެން ޓެކްސީ ދަތުރުތަކުގެ އަގުތަކަށް ބަދަލު ގެނައުމަށް ޓެކްސީ ޑްރައިވަރުން ޑިމާންޑްކުރަމުންދާ ދަނޑިވަޅެއްގައެވެ. އަދި އަގުތަކަށް ބަދަލުގެނައުމުގެ ކުރިން ޓްރާންސްޕޯޓް މިނިސްޓްރީން ވަނީ ޓެކްސީ ޑްރައިވަރުންނާއި މަޝްވަރާވެސްކޮށްފައެވެ.