ރަޝިއާއާއި ޔުކްރެއިން ހަނގުރާމަ ފެށިތާ 3 މަސް ދުވަސްތެރޭގައި އިންޑިއާއި ޗައިނާއަށް ތެލާއި ގޭސް ވިއްކައިންގެ 24 ބިލިއަން އެމެރިކާ ޑޮލަރުގެ އާމްދަނީއެއް ރަޝިއާއަށް ލިބިއްޖެއެވެ.
މެއިމަހުގެ ނިޔަލަށް ރަޝިއާއިން ތެލާއި ގޭސް ގަތުމަށް ޗައިނާއިން ވަނީ 18.9 ބިލިއަން އެމެރިކާ ޑޮލަރު ހޭދަކޮށްފައެވެ. ހަމަ އެ މުއްދަތުގެ ތެރޭގައި ރަޝިއާއިން ތެލާއި ގޭސް ގަތުމަށް އިންޑިއާއިން ވަނީ 5.1 ބިލިއަން އެމެރިކާ ޑޮލަރު ހޭދަކޮށްފައެވެ. އަދި މިއީ އޭގެ ކުރީ އަހަރާއި އަޅާބަލާއިރު ފަސް ގުނަ އިތުރު އަދަދެކެވެ.
2021 ވަނަ އަހަރާއި އަޅާބަލާއިރު މި ދެ ޤައުމަށް ތެލާއި ގޭސް ވިއްކައިގެން އިތުރު 13 ބިލިއަން އެމެރިކާ ޑޮލަރު ރަޝިއާއަށް ވަނީ ލިބިފައެވެ.
އިންޑިއާއި ޗައިނާއިން ރަޝިއާގެ ތެލާއި ގޭސް ގަންނަން މިހާބޮޑު އަދަދުތަކެއް ހޭދަކުރުމުގެ ސަބަބުން ރަޝިއާއިން ތެޔޮ އެކްސްޕޯޓުކުރުން ހުޅަނގުގެ ޤައުމުތަކުން ހުއްޓާލާފައި އޮތްއޮތުމުގެ އަސަރެއް ރަޝިއާއަށް މާބޮޑަށް ނުކުރާނެއެވެ.
ރަޝިއާ ޔުކްރެއިން ހަނގުރާމައިގެ ސަބަބުން ރަޝިއާއާއި ދެކޮޅަށް ހުޅަނގުން ވަނީ ދަތިކުރުމުގެ ގިނަ ފިޔަވަޅުތަކެއް އަޅާފައެވެ. މިގޮތުން ރަޝިއާއިން ތެޔޮ އެކްސްޕޯޓުކުރުން ޔޫރަޕް އިއްތިހާދުން ވަނީ މަނާކޮށްފައެވެ.
ޗައިނާއާއި އިންޑިއާ ދެ ޤައުމާއިއެކުވެސް ރަޝިޔާއިން ބާއްވާ ވިޔަފާރީގެ ގުޅުމަކީ ވަރަށް ހަރުދަނާ ގުޅުމެކެވެ. މި ގުޅުން ވަރުގަދަ ކުރުމުގެ ގޮތުން ރަޝިއާގެ ތެލާއި ގޭހުން މި ދެ ޤައުމަށް ޑިސްކައުންޓު ދިނުމުގެ އިތުރުން ދެ ޤައުމުގެ އަމިއްލަ ފައިސާވެސް ރަޝިއާއިން ބަލައިގަނެއެވެ.