މިނީ ބަހުގެ ޚިދުމަތް ދިނުމަށް ބޭނުންވާ 36 މިނީބަސް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީން މާލެ ގެނެސްފިއެވެ.
މާލޭގައި މިނީ ބަހުގެ ޚިދުމަތް ދިނުމަށް ސަރުކާރުން އެމް.ޓީ.ސީ.ސީއާއި ޙަވާލުކޮށްފައިވަނީ 2019 ވަނަ އަހަރުގެ ތެރޭގައެވެ. މާލޭ ސަރަހައްދުގެ އިތުރުން ރާއްޖޭގެ ދެކުނުން ލ. އަތޮޅު ގަމާއި ފޮނަދޫއާއި، އިސްދޫ ކަލައިދޫ، ފުވައްމުލައް ސިޓީ އަދި އައްޑޫ ސިޓީގައިވެސް މިނީ ބަހުގެ ޚިދުމަތް ތަޢާރަފުކުރުމަށް އެކުންފުނިން ދަނީ މަސައްކަތްކުރަމުންނެވެ.
މާލޭ ސަރަޙައްދުގައި ދަތުރުފަތުރުގެ ކަންކަން ހަރުދަނާކުރުމަށް ކުރަމުންދާ މަސައްކަތުގެ ތެރެއިން، މާލެއަށް މިނީ ބަހުގެ ޚިދުމަތް ތަޢާރަފުކުރުމަކީ މި ސަރުކާރުގެ މުހިއްމު ސިޔާސަތެކެވެ. މާލޭގައި މިނީ ބަހުގެ ޚިދުމަތް ދިނުމަށް އެމް.ޓީ.ސީ.ސީއާއި ޙަވާލުކޮށްފައިވާއިރު، އެކުންފުނިން ދަނީ އެ ޚިދުމަތް ފެށުމަށްޓަކާ ވާންޖެހޭ ތައްޔާރީތައް ވަމުންނެވެ.
The wait is over. Our Mini Bus fleet which includes 36 mini buses have now arrived and port clearance is ongoing. We will keep you updated every step of the way. #HappeningNow pic.twitter.com/gPaOdTZuc7
— MTCC Plc (@MTCCPlc) July 16, 2022
މި ޚިދުމަތް ދިނުމަށް ބޭނުންވާ 36 މިނީ ބަސް އެމް.ޓީ.ސީ.ސީން މިއަދު ރާއްޖެގެނެސްފައިވާއިރު، ޕޯޓް ކްލިއަރިންސްގެ މަސައްކަތް މިހާރު ކުރިއަށްދާކަމަށް އެކުންފުނިން ވަނީ ހާމަކުރައްވާފައެވެ.
މި ބަސްތަކުގެ ތެރެއިން މާލޭގައި ބޭނުންކުރާނީ 12 ބަހެވެ. އަދި ބާކީ ބަސްތައް ބޭނުންކުރާނީ ލ. އަތޮޅު ގަމާއި ފޮނަދޫއާއި، އިސްދޫ ކަލައިދޫ، ފުވައްމުލައް ސިޓީ އަދި އައްޑޫ ސިޓީގައި މިނީ ބަހުގެ ޚިދުމަތް ދިނުމަށެވެ. މި ހުރިހާ ބަސްތަކަކީވެސް ޑީސެލް ބަސްތަކެކެވެ.
މާލޭގައި މިނީ ބަހުގެ ޚިދުމަތް ފަށަންވާއިރަށް މާލޭގެ ޓްރެފިކަށް ބަލާ، މަގުތަކަށް ގެންނަންޖެހޭ ބަދަލުތައް ގެނައުމުގެ މަސައްކަތް ފުލުހުންނާއި، މާލޭ ސިޓީ ކައުންސިލާއި ގުޅިގެން އެމް.ޓީ.ސީ.ސީން ދަނީ ކުރަމުންނެވެ. އަދި ބަސް ޕޯލްތައް ނުވަތަ ބަސްހުއްޓިތައް ބަހައްޓާނެ ސަރަހައްދުތައް ކަނޑައެޅުމުގެ މަސައްކަތް ކުރާއިރު، މިއިން ކޮންމެ ސްޓޮޕަކަށް ކޮންމެ 10 މިނެޓަކުން މިނީ ބަސް ދަތުރުކުރާނެކަމަށް އެކުންފުނިން ވިދާޅުވިއެވެ.
Ceo @adamazim and team members of our management visited to check on the new mini bus fleet which arrived today. #TeamMTCC #RayyithungeKunfuni pic.twitter.com/PsIfwwiuwP
— MTCC Plc (@MTCCPlc) July 16, 2022
މިނީ ބަސްތައް ދަތުރުކުރާނެ ރޫޓްތައް ކަނޑައަޅާނީ މާލޭގެ މައި ބޮޑެތި މަގުތައް ހިމެނޭހެންކަމަށާއި، މިނީބަހުގެ ރޫޓާއި، އެމް.ޓީ.ސީ.ސީން މާލެއާއި ހުޅުމާލެއާއި ދެމެދުކުރާ ބަސްދަތުރުތަކުގެ ރޫޓާވެސް ގުޅުވާލާނެކަމަށްވެސް އެކުންފުނިން ހާމަކޮށްފައިވެއެވެ.
އެމް.ޓީ.ސީ.ސީން ގެނައި 36 މިނީ ބަހަކީ 20 މީހުންނާއި 25 މީހުންނާއި ދެމެދުގެ އަދަދަކަށް މީހުން އުފުލޭ ޖާގައިގެ ބަސްތަކެކެވެ. އަދި މި ބަސްތައްވެސް ޑިޒައިންކޮށްފައިވަނީ ޚާއްސަ އެހީއަށް ބޭނުންވާ މީހުންނަށްވެސް ފަސޭހައިން އަރައިފޭބޭގޮތަށެވެ.
މިނީ ބަހުގެ ޚިދުމަތް ފެށުމަށް ބޭނުންވާ 36 މިނީ ބަސް އެމް.ޓީ.ސީ.ސީން ރާއްޖެގެނެސްފައިވާއިރު، މާލެއިން ހުޅުމާލެއާއި ދެމެދު ކުރާ ބަސްދަތުރުތަކުގެ ފެންވަރު ރަނގަޅުކުރުމުގެގޮތުން އިތުރު ޑަބަލްޑެކް 15 ބަސް ރާއްޖެގެނެސް، މިހާރު އަންނަނީ ޚިދުމަތުގައި ބޭނުންކުރަމުންނެވެ.