އަޒަރުބައިޖާނުން ގޭސް އިމްޕޯޓުކުރާ މިންވަރު 2027 ގައި ދެގުނައަށް އިތުރުކުރުމުގެ އެއްބަސްވުމެއްގައި ޔޫރަޕިއަން ކޮމިޝަން (އީޔޫ) އިން ސޮއިކޮށްފިއެވެ. މި އެއްބަސްވުމުގެ ދަށުން އަޒަރުބައިޖާނުން އަހަރަކު މަދުވެގެން 20 ބިލިއަން ކިޔުބިކް މީޓަރުގެ ގޭސް އީޔޫއަށް އިމްޕޯޓުކުރާނެއެވެ.
އީޔޫ ކޮމިޝަންގެ ރައީސް އުރުސަލާ ވޮންޑަ ލެޔެން ވިދާޅުވީ، ރަޝިއާ އިން ގޭސް އިޕްމޯޓުކުރުން މަދުކުރުމުށް އަޒަރުބައިޖާނަކީ އީޔޫގެ ވަރަށް މުހިންމު ބައިވެރިއެކެވެ. އަދި އަޒަރުބައިޖާނުން ދެގުނައަށް ގޭސް އިމްޕޯޓުކުރަން ނިންމީ ރަޝިއާއިން ގޭސް އިމްޕޯޓުކުރުން މުޅިހެން ހުއްޓާލަން ނިންމާފައިވާތީ ކަމަށްވެސް އޭނާ ވިދާޅުވިއެވެ.
އަޒަރުބައިޖާނަކީ ގޭސް އިމްޕޯޓުކުރުމުގައި އަބަދުވެސް ބަރޯސާވެވޭނެ ޤައުމެއްކަމަށްވެސް އެއްބަސްވުމުގައި ސޮއި ކުރުމަށްފަހު ދެ ފަރާތް ގުޅިގެން ބޭއްވި ނޫސްވެރިންގެ ބައްދަލުވުމުގައި އުރުސަލާ ވަނީ ވިދާޅުވެފައެވެ. އަދި ޓްރާންސް އައިޑްރިއޭޓިކް ޕައިޕްލައިން މެދުވެރިކޮށް މިހާރުވެސް އަހަރު 8 ބިލިއަން ކިޔުބިކް މީޓަރަށްވުރެ ގިނައިން ގޭސް އިމްޕޯޓުކުރާ ކަމަށާއި، 2027 އަންނަންވާއިރަށް މި އަދަދު 20 ބިލިއަން ކިޔުބިކް މީޓަރަށް ފުޅާކުރުމަށް ނިންމާފައިވާކަމަށް އުރުސަލާ ވިދާޅުވިއެވެ.
އަންނަ އަހަރު އަޒަރުބައިޖާނުން އީޔޫއަށް ގޭސް އިމްޕޯޓުކުރާ މިންވަރު 12 ބިލިއަން ކިޔުބިކް މީޓަރު އިމްޕޯޓުކުރަން ވަނީ ނިންމާފައެވެ. މީގެ ސަބަބުން ރަޝިއާއިން އިމްޕޯޓުކުރުން މަދުކުރާ ބަޔަށް ހަމަހަމަވާނެކަމަށް އުރުސަލާ ވަނީ ވިދާޅުވެފައެވެ.
ރަޝިއާ ޔުކްރެއިން ހަނގުރާމަ ފެށިފަހުން ގޭހަކީ ރަޝިއާ އާއި ޔޫރަޕާއި ދެމެދު ގެންގުޅޭ ހަތިޔާރަކަށް ވަނީ ވެފައެވެ. އީޔޫއިން ވަނީ ރަޝިއާ އިން އުފައްދާ ތެޔޮ އިމްޕޯޓުކުރުން މިދިޔަ މެއި މަހު މަނާކޮށްފައެވެ. މީގެ ސަބަބުން ތެލުގެ އަގު ވަނީ ބޮޑުތަނުން އުފުލިފައެވެ.