ކުރިއަށްއޮތް 20 އަހަރު ދުވަހުގެ ތެރޭގައި މަތިންދާބޯޓަށް އޮންނަ ޑިމާންޑް ދަށްވާނެކަމަށް އެމެރިކާގެ މަތިންދާބޯޓު އުފައްދާ ކުންފުނި ބޮއިންއިން ލަފާކޮށްފިއެވެ.
ބޯޓުތަކަށް އޮންނަ ޑިމާންޑު ދަށްވިނަމަވެސް އެކުންފުނިން އުފައްދާ ބޯޓުތައް ޤައުމުތަކަށް ފޯރުކޮށްދިނުމުގައި ލަސްވުމެއް ނާންނާނެކަމަށް އުންމީދުކުރާކަމަށްވެސް ބޮއިންއިން ބުނެއެވެ.
ކުރިއަށްއޮތް 20 އަހަރު ދުވަހުގެ ތެރޭގައި މުޅި ދުނިޔެއަށް ބޭނުންވާނީ 41170 ބޯޓުކަމަށް ބޮއިންއިން ލަފާކުރެއެވެ. މީގެތެރެއިން ދެބައިކުޅައެއްބައި ބޯޓުތަކަކީ ރިޕްލޭސްމެންޓް ބޯޓުތައްކަމަށާއި އަދި މީގެތެރެއިން %75 ބޯޓަކީ ސިންގަލް އައިލް އެއާކްރާފްޓް ބޯޓުކަމަށްވެސް އެ ކުންފުނިން ބުނެއެވެ. ވޭތުވެދިޔަ 20 އަހަރު އެ ކުންފުނިން ވަނީ 43610 ބޯޓު އުފައްދާފައެވެ.
ބޯޓު ބޭނުންވާނެކަމަށް ލަފާކޮށްފައިވާ އަދަދުން ރަޝިއާއަށް ބޭނުންވާނެކަމަށް ލަފާކުރާ 1540 ބޯޓު ވަނީ އުނިކޮށްފައެވެ. ސަބަބަކީ ރަޝިއާ ޔުކްރެއިން ހަނގުރާމައިގެ ސަބަބުން ބޯޓު އުފައްދާ ފަރާތްތަކަށް ރަޝިއާއަށް ބޯޓު ވިއްކޭނެ ވަކި ވަގުތެއް ނޭނގޭތީއެވެ.
ކުރިއަށްއޮތް 10 އަހަރު ތެރޭގައި މުޅިދުނިޔެއަށް ބޭނުންވާނެކަމަށް ބޮއިންއިން ލަފާކޮށްފައިވާ ބޯޓުގެ އަދަދަކީ 19575 ބޯޓެވެ. ބޮއިންއިން ވަނީ އެމީހުންގެ ޕެސެންޖާ ޓްރެފިކްވެސް %4 އިން %3.8 އަށް ދަށްވާނެކަމަށް ލަފާކޮށްފައެވެ. ނަމަވެސް ކާގޯ %41 އަށް މިއަހަރު ކުރިއަރާނެކަމަށް ވަނީ ލަފާކޮށްފައެވެ. މިދިޔަ އަހަރު މި އަދަދު ހުރީ %4.1 ގައެވެ. މީގެއިތުރުން ބޮއިންއިން ފްރޭޓަރ ބޯޓުތައް 2041 ގައި %80 އަށް އިތުރުވާނެކަމަށް ވަނީ ލަފާކޮށްފައެވެ.