ޤަތަރުގެ މުއާސަލާތީ ޚިދުމަތްދޭ ކުންފުނި އުރީދޫއިން މިޔަންމާގައި ހިންގާ ވިޔަފާރި ވިއްކާލަން ނިންމައިފިއެވެ.
މިޔަންމާ ވިޔަފާރި ވިއްކާލަން އުޅޭކަން އުރީދޫއިން މިހާރު ވަނީ މިޔަންމާގެ ރެގިއުލޭޓަރ، ޕޯސްޓް އެންޑް ޓެލެކޮމިޔުނިކޭޝަން ޑިޕާޓްމަންޓް (ޕީޑީޓީ) އަށް އަންގާފައެވެ.
މި ވިޔަފާރި ގަންނަން ބޭނުންވާ ކުންފުނިތަކުގެ ތެރޭގައި މިޔަންމާގެ ޔަންގް އިންވެސްޓްމެންޓް ގްރޫޕް އަދި ސިންގަޕޫރުގެ ނެޓްވޯކް އިންފްރާސްޓްރަކްޗާރ ކުންފުނި ކަމްޕާނާ ގްރޫޕް އަދި ސްކައި ނެޓް ހިމެނެއެވެ. މިކަމާއި ގުޅިގެން އުރީދޫއިންނާއި މިޔަންމާއިން އަދި އެހެން އެއްވެސް ކުންފުންޏަކުންވެސް ވަކި އެއްޗެއް ބުނެފައެއްނުވެއެވެ.
އުރީދޫގެ މިޔަންމާ ވިޔަފާރި ވިއްކާލަން ނިންމުމާއިއެކު އުރީދޫ ވާނީ މިޔަންމާގެ ވިޔަފާރި ވިއްކާލާ، މިޔަންމާއިން ބޭރު ޤައުމަކުން ހިންގާ ކޮމިޔުނިކޭޝަން ޚިދުމަތްދޭ އެންމެ ފަހު ކުންފުންޏަށެވެ.
އުރީދޫ އަކީ މިޔަންމާގައި 3 ވަނައަށް އެންމެ ބޮޑު ކޮމިޔުނިކޭޝަން ޚިދުމަތް ދޭ ކުންފުންޏެވެ. މިދިޔަ އަހަރު މިޔަންމާގައި ހިންގަން ފަށާފައިވާ އަސްކަރީ ހަމަނުޖެހުންގަނޑުގެ ކުރިން 2020 ވަނަ އަހަރު އުރީދޫ ބޭނުންކުރާ މީހުންގެ އަދަދު ވަނީ 15 މިލިއަނަށް އަރާފައެވެ. ނަމަވެސް ފަހުން މިއަދަދު ވަނީ 9 މިލިއަނަށް ވެއްޓިފައެވެ. މިއާއިއެކު މިޔަންމާގެ އުރީދޫ ވިޔަފާރީގެ އާމްދަނީއަށް ލިބިފައިވަނީ 330 މިލިއަން އެމެރިކާ ޑޮލަރެވެ.
މިޔަންމާގައި މިދިޔަ އަހަރުން ފެށިގެން ހިންގާ އަސްކަރީ ވެރިކަމުގެ ސަބަބުން މީގެކުރިން އޭޝިއާގެ އެންމެ އަވަސް މުވާސަލަތީ ޚިދުމަތް ދޭ މިޔަންމާގެ މުއާސަލާތީ ޚިދުމަތުގެ ދާއިރާއަށް ވަނީ ވަރަށް ބޮޑަށް އަސަރުކޮށްފައެވެ. މިދިޔަ އަހަރު އެއްކޮށް ކަހަލަ ގޮތަކަށް މިޔަންމާގައި މުއާސަލާތީ ޚިދުމަތް ބޭނުންކުރުމުގައި އެކަށައަޅާފައިވާ ހަރުކަށި އުސޫލުތަކެއް ސަބަބުން އެޤައުމުގެ ބައެއް ސަރަހަދުތަކަށް މޮބައިލް ޑާޓާގެ ޚިދުމަތް އެއްގޮތަކަށްވެސް ނުލިބެއެވެ.