ރާއްޖެއަށް އެތެރެކުރަން އުޅުނު ގިނަ އަދަދެއްގެ މަސްތުވާތަކެއްޗާއި، އެތަކެތި އެތެރެކުރަން އުޅުނު ދެ މީހަކު ކަސްޓަމްސްއިން އަތުލައިގެންފިއެވެ. މި ދެ މީހުންވެސް މަސްތުވާތަކެތި ރާއްޖެ އެތެރެކުރަން އުޅެފައިވަނީ ދިރުވާލައިގެން ހަށިގަނޑުގެ އެތެރޭގައި ފޮރުވައިގެންނެވެ.
މޯލްޑިވްސް ކަސްޓަމްސް ސަރވިސްއިން ވިދާޅުވީ، މިތަކެތި އަތުލައިގަނެފައިވަނީ ޖޫން 28 ވަނަ ދުވަހު ވައިގެމަގުން އިތިއޯޕިއާއިން ރާއްޖެއައި 2 މީހެއްގެ އަތުންކަމަށެވެ. އަދި އެ 2 މީހުންގެ އަމަލުތައް ހުރިގޮތުން، ދިރުވާލައިގެން އެތެރެހަށީގައި މަސްތުވާތަކެތި ގެނެސްފައިވާކަމާއިމެދު ކަސްޓަމަސްގެ އޮފިސަރުންނަށް ޝައްކު ކުރެވިގެން ބަލާ ފާސްކޮށް އިތުރަށް ސްކޭންކުރުމުން، ފަސިންޖަރިންގެ އެތެރެހަށިން "ފޮރިން ބޮޑީސް" ފެނިފައިވާކަމަށެވެ. މި ފޮރިން ބޮޑީސްތަކުގެ ތެރޭގައި މަސްތުވާތަކެތީގެ ބާވަތެއްކަމަށްވާ ކޮކެއިން ރައްކާކޮށްފައިވާކަމަށް ޝައްކުކުރެވޭކަމަށް ކަސްޓަމްސްއިން ވިދާޅުވެއެވެ.
މި 2 މީހުންގެ އެތެރެހަށިން ފޮރިން ބޮޑީސްގެ ގޮތުގައި ޖުމްލަ 220 ބުލެޓް ނަގާފައިވާއިރު، މިތަކެތީގެ ޖުމްލަ ބަރުދަނުގައި ޕެކިންގއާއެކު 2.328 ކިލޯގްރާމް ހުރިކަމަށް ކަސްޓަމްސްއިން ވިދާޅުވެއެވެ. އަދި މިތަކެތީގެ މަގުމަތީ އަގު 8،100،000.00 (އަށް މިލިއަން އެއްލައްކަ) ރުފިޔާއަށް އަރަށެވެ.
މިމައްސަލާގައި ޝާމިލުވާ މީހުންނާއި، އަތުލައިގަނެވުނު މަސްތުވާތަކެތިކަމަށް ޝައްކުކުރެވޭ ތަކެތި އިތުރަށް ތަޙުޤީޤުކުރުމަށްޓަކާ ފުލުހުންނާއި ހަވާލުކޮށްފައިވާކަމަށް ކަސްޓަމްސް އިން ވިދާޅުވިއެވެ.
މަސްތުވާތަކެތި އެތެރެވުން ހުއްޓުވުމަށްޓަކައި، މިދިޔަ ޖެނުއަރީ މަހު ކަސްޓަމްސް އިންވަނީ ކުރެވެމުންދާ މަސައްކަތްތައް ހަރުދަނާކޮށް، އިތުރަށް ފުޅާކުރުމަށް ސްޕެޝަލް އޮޕަރޭޝަންގެ ޓެކްނިކަލް ޓީމެއް ތަޢާރަފްކޮށް މާލެެއާއި ރީޖަނަލް ކަސްޓަމްސް ތަކުގައި ހަރަކާތްތެރިވާން ފަށާފައެވެ. އަދި މަސްތުވާތަކެތި އެތެރެވާ ދޮރުތައް ބަންދުކޮށް މިކަމަށް އާއްމުން ހޭލުންތެރިކުރުވުމުގެ ގޮތުން "ދޮރުވާނު"ގެ ނަމުގައި ޚާއްސަ ޑްރަގް ކެމްޕޭނެއްވެސް ދާދިފަހުން ކަސްޓަމްސްއިން ވަނީ ފަށާފައެވެ.