ހިޔާ ފްލެޓާއި، ގުޅީފަޅުން ފްލެޓް ހޯދުމަށް ފައިސާ ދެއްކި މީހުންގެ ތެރެއިން 150 އެއްހާ މީހުން ވިނަރެސް ފްލެޓްގެ އެއްބަސްވުމުގައި ސޮއި ކުރާ މަރުހަލާގައި އޮތްކަމަށް މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗައިން ވިދާޅުވެއްޖެއެވެ.
ހިޔާ ފްލެޓް ދޫކޮށްލަން ބޭނުންވި ފަރާތްތަކަށާއި، ގުޅިފަޅުން ފްލެޓް ހޯދުމަށް ފައިސާ ދެއްކި މީހުންނަށް ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ ވިނަރެސް ފްލެޓްއަށް އެދުމުގެ ފުރުޞަތު ހުޅުވާލިއެވެ.
ވިނަރެސް ހައުސިން މަޝްރޫޢުގެ ފްލެޓްތަކަކީ ދެން އެންމެ އަވަހަށް އާއްމުންނަށް ދޫކުރުމަށް ހަމަޖެހިފައިވާ ސަރުކާރުގެ ބޯހިޔާވަހިކަމުގެ މަޝްރޫޢުއެވެ. މި މަޝްރޫޢުގައި ހިމެނެނީ 1344 ފްލެޓެވެ. އެއީ 10 ޓަވަރެއެވެ.
މި މަޝްރޫޢުގައި މިހާރު ކުރަމުންދަނީ ފިނިޝިންގ މަސައްކަތްތަކެވެ. މިގޮތުން ފްލެޓްތަކުގެ 95 އިންސައްތަ މަސައްކަތް މިހާރު ވަނީ ނިންމާލާފައެވެ. މަޝްރޫޢުގެ ފްލެޓްތައް ވިއްކުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން މިހާރުވަނީ ހުޅުވާލާފައެވެ. ފްލެޓްގަތުމަށް އެދި ފޯމް ހުށައެޅުމަށް ހުޅުވާލާފައިވަނީ އަންނަ ސެޕްޓެމްބަރު މަހުގެ 15 ވަނަ ދުވަހާހަމަޔަށެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ޕްލޭނިން މިނިސްޓްރީގެ ސީނިއަރ އެގްޒެކިއުޓިވް ޑިރެކްޓަރ މުޙައްމަދު އާރިފް ވިދާޅުވީ، ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ ހިޔާ ފްލެޓްތަކުން ފްލެޓް ލިބުނު ފަރާތްތަކުގެ ތެރެއިން ވިނަރެސް ފްލެޓަށް ބަދަލުވާން ބޭނުންވި މީހުންނަށް ހުޅުވާލި ފުރުޞަތުގައި ގިނަ އަދަދެއްގެ ބަޔަކު ފޯމް ހުށައެޅިކަމަށެވެ. އަދި އެ މީހުންގެ ތެރެއިން މިހާރު ގާތްގަޑަކަށް 80 މީހުންނާއެކު އެއްބަސްވުމުގައި ސޮއިކުރާ މަރުހަލާގައި އޮތްކަމަށް އާރިފް ވިދާޅުވިއެވެ. މީގެ އިތުރުން ގުޅިފަޅުން ފްލެޓް ހޯދުމަށް ފައިސާ ދެއްކި މީހުންގެ ތެރެއިން 70 އެއްހާ މީހުންނާއެކު ވިނަރެސް ފްލެޓްގެ އެއްބަސްވުމުގައި ސޮއިކުރުމަށް ތައްޔާރުވަމުން އަންނަކަމަށެވެ.
އެޗްޑީސީގެ ސީނިއަރ ސޭލްސް އޮފިސަރ މާކެޓިން އެންޑް ސޭލް އާދަމް ވިޖުދާން ޢަބްދުﷲ ވިދާޅުވީ، ވިނަރެސް ފްލެޓްއާ ގުޅޭ މަޢުލޫމާތުތައް ފޯރުކޮށްދިނުމަށް ކުރަމުން އަންނަ މަސައްކަތުގެ ތެރެއިން މިހާތަނަށް 3000 އަށްވުރެ ގިނަ މީހުންނަށް މަޢުލޫމާތު ފޯރުކޯށްދީފައިވާކަމަށެވެ. އަދި ވިނަރެސް ފްލެޓްތައް 6000 އަށް ވުރެ ގިނަ މީހުންނަށް ބަލާލުމުގެ ފުރުޞަތު ދީފައިވާކަމަށާއި އެއީ ދުވާލެއްގެ މައްޗަށް 400 އެއްހާ މީހުންކަމަށް ވިޖުދާން ވިދާޅުވިއެވެ.
ވިނަރެސްގެ ފްލެޓްތައް ހަވާލުކުރާނީ ފްލެޓްތަކުގެ ހުރިހާ ފިނިޝިން މަސައްކަތްތައް ނިންމުމަށް ފަހުގައެވެ. މިއީ މުޅިންވެސް 3 ކޮޓަރީގެ އެޕަރޓްމަންޓްތަކެވެ. ފްލެޓުތަކުގެ ބޮޑުމިން އުޅެނީ 883 އަކަފޫޓާއި 1395 އަކަފޫޓާ ދެމެދުއެވެ.
މި މަޝްރޫޢުގެ ދަށުން ފްލެޓްތައް ތަރައްޤީކޮށްފައިވަނީ 4 ކޮންސެޕްޓަކަށެވެ. އެއީ އިނާ ވިއު، އައުޓާ ވިއު، މެރީނާ ވިއު އަދި ސްޓޭންޑާޑް ވިއު އެޕާޓްމެންޓްތަކެވެ. މެރީނާ ވިއު ފްލެޓްތަކުގައި ހިމެނެނީ 172 އެޕާޓްމަންޓެވެ. އައުޓާ ވިއުގައި 372 އެޕާޓްމެންޓް ހިމެނެއެވެ. އިނާ ވިއުގައި ހިމެނެނީ 352 އެޕާޓްމަންޓެވެ. އަދި ސްޓޭންޑާޑް ވިއުގައި 448 އެޕާޓްމެންޓް ހިމެނެއެވެ.
ވިނަރެސް މަޝްރޫއުގެ ދަށުން އިމާރާތް ކޮށްފައިވާ ކޮންމެ ޓަވަރެއްގައިވެސް ޕާކިންގ، ސެކިއުރިޓީ، ސީ.ސީ.ޓީ.ވީ، ފަޔަރ އެންޑް ސޭފްޓީ، ގާބޭޖް ޝޫޓް ހުންނާނެއެވެ. އަދި ކޮންމެ ޓަވަރެއްގައި ހަތަރު ލިފްޓުގެ ޚިދުމަތް ލިބެންހުންނާނެއެވެ. މިއިން ކޮންމެ ޓަވަރެއްގެވެސް ފުރަތަމަ 2 ފަންގިފިލާ ޚާއްސަކޮށްފައިވަނީ ކޮމަރޝަލް ސްޕޭސްގެގޮތުގައެވެ. އެހެންކަމުން މީހުން ދިރިއުޅޭ އެޕާޓްމަންޓްތައް ހުންނާނީ 3 ވަނަ ފަންގިފިލާއިން ފެށިގެން މައްޗަށެވެ.
ކޮމަރޝަލް ސްޕޭސްތަކުގައި ފިހާރަތަކާއި، އޮފީސްތަކާއި، ކެފޭ ރެސްޓޯރެންޓާއި، ޖިމްތަކާއި، އޭ.ޓީ.އެމް މި ސަރަޙައްދުގައި ޤާއިމުކުރެވިގެންދާނެއެވެ. އަދި ޑިމާންޑަށް ބަލާ އިތުރު ޚިދުމަތްތައްވެސް ތަޢާރަފުކުރެވޭނެކަމަށް އެޗް.ޑީ.ސީން ވިދާޅުވެއެވެ.