ވަރަށް އަވަހަށް ވިލިމާލޭގައި ހައުސިންގ މަޝްރޫޢެއް ކުރިއަށްގެންދިއުމަށް ތައްޔާރުވަމުންދާކަމަށް ސްޓެލްކޯގެ މެނޭޖިންގ ޑިރެކްޓަރ އަޙްމަދު ޝަރީފު ވިދާޅުވެއްޖެއެވެ. ޝަރީފު މިހެން ވިދާޅުވީ، ސްޓެލްކޯގެ މެނޭޖްމަންޓުން އެކުންފުނީގެ މުވައްޒަފުންނާއެކު ބޭއްވި ބައްދަލުވުމެއްގައެވެ.
ސްޓެލްކޯގެ މެނޭޖިންގ ޑިރެކްޓަރ އަޙްމަދު ޝަރީފު ވިދާޅުވީ، ވިލިމާލޭގައި ވަރަށް އަވަހަށް ހައުސިންގ މަޝްރޫޢެއް ފެށުމަށް އެކުންފުނިން ތައްޔާރުވަމުންދާކަމަށެވެ. އަދި އެކަން ކުންފުނީގެ ބޯޑުން ފާސްކުރުމަށް ކުރަންޖެހޭ ކަންކަން ކުރަމުންދާކަމަށް ޝަރީފް ވިދާޅުވިއެވެ.
"މިފަހަރު ހައުސިންގ އަޅުގަނޑުމެން އަމާޒުކުރާނީ ވިލިމާލެއަށް. އެހެންވީމަ އެތަނުގައި އަޅުގަނޑުމެންގެ ހައުސިންގ ޕްރޮގްރާމެއް ފެށްޓޭތޯ މަސައްކަތް ކުރަމުން މިދަނީ. އިރާދަކުރެއްވިއްޔާ މިކަން ކާމިޔާބުވާނެ. ބްރިޖް އެޅުމަށްފަހު މާލެއެކޭ ހުޅުމާލެއެކޭ ވިލިމާލެއެކޭ އަނެއްހެން މާ ބޮޑު ތަފާތެއް ނޯންނާނެ. ވިލިމާލެ ކައިރިވެފައި މަޑުމައިތިރިވެސްވާނެ، މާ ހިތްފަސޭހަވާނެ" ޝަރީފް ވިދާޅުވިއެވެ.
ސްޓެލްކޯގެ މެނޭޖިންގ ޑިރެކްޓަރ އަޙްމަދު ޝަރީފު ވިދާޅުވީ، ކުންފުންޏަށް އަބަދުވެސް މުހިއްމުވާނީ މުވައްޒަފުންގެ މަސްލަޙަތު ކަމަށާއި، މަސައްކަތު މާހައުލަކީ މުވައްޒަފުންނަށް ފަސޭހަ އަދި ހިތްހަމަޖެހޭފަދަ މާހައުލަކަށް ހެދުމަށް ކުންފުނީގެ ބޯޑުން އިސްކަމެއްދޭކަމަށެވެ. އަދި މުވައްޒަފުންނަށް ލުއިގޮތްތައް ހޯދައިދިނުމަށް ކުންފުނީގެ ބޯޑުން މަސައްކަތް ކުރަމުންދާކަމަށް ޝަރީފް ވިދާޅުވިއެވެ.
ވިލިމާލޭގައި ސްޓެލްކޯއިން ހައުސިންގ މަޝްރޫޢެއް ފެށުމަށް ތައްޔާރުވަމުންދާއިރު، އެކުންފުނިން ހުޅުމާލޭ ދެވަނަ ފިޔަވަހީގައި ތަރައްޤީކުރާ 360 ފްލެޓު ހިމެނޭ 15 ބުރީގެ 2 ޓަވަރުގެ މަސައްކަތް މިހާރުވަނީ ގާތްގަނޑަކަށް ނިމިފައެވެ. އަދި އަންނަމަހުގެ 6 ވަނަ ދުވަހު ފްލެޓް ލިބުން މުވައްޒަފުންނަށް، އެތަންތަން ދޫކުރާނެކަން ޝަރީފް ވަނީ ހާމަކުރައްވާފައެވެ.
މި ފްލެޓްތަކުގެ ތެރޭގައި ހިމެނެނީ 1 ކޮޓަރީގެ 72 އެޕާޓްމަންޓާއި، އަދި 2 ކޮޓަރިއާއި މެއިޑް ރޫމް ހިމެނޭ 288 އެޕާޓްމަންޓެވެ. 1 ކޮޓަރީގެ އެޕާޓްމަންޓަކަށް މަހު ކުލީގެ ގޮތުގައި ދައްކަންޖެހޭނީ 5622 ރުފިޔާއެވެ. އަދި އަދި 2 ކޮޓަރިއާއި މެއިޑް ރޫމް ހިމެނޭ ފްލެޓްތަކަށް ދައްކަންޖެހޭ މިންވަރު އުޅެނީ 10،356 ރުފިޔާއާއި 10،652 ރުފިޔާއާއި ދެމެދުގައެވެ. މެއިންޓެނެންސް ފީގެ ގޮތުގައި އިތުރު 1000 ރުފިޔާ ދައްކަންޖެހޭނެއެވެ. ނަމަވެސް މެއިންޓެނެންސް ފީ ނަގަން ފަށާނީ އެއް އަހަރު ފަހުންނެވެ. އަދި ސްޓެލްކޯގެ ހިޔާ ފްލެޓްތަކުން ކުލި ނެގުމަށް އެކުންފުނިން ނިންމާފައިވަނީ އަންނަ އަހަރުން ފެށިގެންނެވެ.