1988 ވަނަ އަހަރުގެ އޯގަސްޓް މަހުގެ 1ވަނަ ދުވަހަކީ މާލޭގެ ރައްޔިތުންނަށް ކުރިމަތިވެފައި އޮތް ނުސާފު ފެނުގެ މައްސަލައަށް ހައްލު ހޯދައިދިނުމުގެ ގޮތުން މާލޭގައި ޤާއިމްކުރި އިސްކުރު ބަރިތަކަށް ސާފުބޯފެން ދޫކުރަން ފެށި ދުވަހެވެ. އެއީ ބޭރުން ލޯނު ހޯދައިގެން ސަރުކާރުން ހިންގި ފުރަތަމަ މަޝްރޫޢުވެސްމެއެވެ. އިސްކުރު ބަރިތަކުން ފެން ފޯރުކޮށްދޭން ފެށި ހިސާބުން އައިސް މިހާރު މިވަނީ މާލޭގައި ދިރިއުޅޭ ރައްޔިތުންނަށް ސާފު ބޯފެން ފޯރުކޮށްދޭން ފެށިތާ 34 އަހަރުވެފައެވެ،
1988ވަނަ އަހަރުގެ އޯގަސްޓް މަހުގެ 1ވަނަ ދުވަހު މާލޭގެ ދެކުނު ފަރާތު ހިއްކި ބިމުގައި ހަދާފައި ހުރި އުސް ކޮންކްރީޓް ތާނގީގައި ދިވެހި ދިދަ އާއި އެކި ކުލަތަކުގެ ދިދަ ފަތިދަމާފައި ހުއްޓެވެ. ތާނގީ ހަދާފައި ހުރި ޓަވަރާ ޖެހިގެން، ދެކުނު ފަރާތުގައި ހުރީ ފެން ކުންފުނީގެ އޮފީސް އިމާރާތެވެ. އޮގަސްޓް 1 ،1988 އެ ޒަމާނުގައި މާލޭގެ ރައްޔިތުންނަށް ކުރިމަތިވެފައި އޮތް ނުސާފު ފެނުގެ މައްސަލައަށް ވަގުތީ ޙައްލެއް ނަމަވެސް ހޯދައިދިނުމުގެ މަޝްރޫޢުއެއްގެ ނިމުން ފާހަގަކޮށް ރައްޔިތުންނަށް ސާފު ބޯފެން ފޯރުކޮށްދޭން ފެށިއެވެ.
އޭރުގެ ރައީސް އަލްއުސްތާޛް މައުމޫން ޢަބްދުލް ޤައްޔޫމް ފެންކުންފުނީގެ އެތެރޭގެ ބައެއް މަސައްކަތްތައްބައްލަވައިލައްވައި، ފެން ހޮޅީގެ ވޭލް ދޫކޮށްލެއްވުމާއެކު، މާލޭގެ އެކި ސަރަޙައްދުތަކުގައި ހުރި ފެން އިސްކުރު ބަރިތަކަށް ދާން ފެށީ ލޮނުން އުފެއްދި އެހެނަސް ބޯން ވެސް ރައްކާތެރި ފެނެވެ. އެ ފެން، އުސް ތާނގީ މެދުވެރިކޮށް، ހޮޅިތަކުން ފޮނުވާލުމުން އިސްކުރު ބަރިތަކާ ހަމައަށް ދިޔައިރު ހުރީ ކްލޮރިން ވެސް ކުރެވި، ފެނުގެ ސާފުތާހިރުކަން ކަށަވަރު ވެސް ވެފައެވެ.
ސާފު ފެން ފޯރުކޮށްދިނުމާއި މާލޭގެ އާ ނަރުދަމާއާއި ގޭގޭގައި ވާރޭ ފެން ރައްކާކުރާނެ ހާހަކަށް
ވުރެ ގިނަ ތާނގީ ހެދި މަޝްރޫޢުއަށް (11 މިލިއަން ޑޮލަރު )އޭރު ނަމަ ގާތްގަނޑަކަށް 78 މިލިއަން ރުފިޔާހޭދަކުރިއެވެ. އެއީ މިހާރު ނަމަ 170 މިލިއަން ރުފިޔާއެވެ. އޭގެ ތެރެއިން ގިނަ ފައިސާ ހަމަޖެއްސީ ބޭރު ޤައުމުތަކާއި ޖަމާޢަތްތަކުން ދިން ލޯނުންނެވެ.
1996ވަނަ އަހަރު އެމް.ޑަބްލިޔު.އެސް.ސީ އުފެދި، މާލޭގެ ގޭބީސީތަކަށް ސާފުބޯފެން ފޯރުކޮށްދޭތާ މިހާރު މިވަނީ 27 އަހަރު ވެގެން ގޮސްފައެވެ. މިހާރު އެމް.ޑަބްލިޔު.އެސް.ސީ އަކީ ފުޅާ ދާއިރާއެއްގައި ފެނާއި ނަރުދަމާގެ ޚިދުމަތްތައް ރާއްޖޭގައި ފޯރުކޮށްދޭ ކުންފުންޏެކެވެ. މިގޮތުން، ރާއްޖޭގެ ހުރިހާ ރަށެއްގައި ފެނާއި ނަރުދަމާ ނިޒާމް ގާއިމް ކުރުމަށް މިސަރުކާރުން ވެފައިވާ ވައުދު ފުއްދުމަށްޓަކައި ގިނަ މަސައްކަތްތަކެއް އެމް.ޑަބްލިޔު.އެސް.ސީ އަންނަނީ ކުރަމުންނެވެ. އެގޮތުން މިހާރު 4 ރަށެއްގެ ފެނާއި ނަރުދަމާ ނިޒާމްގެ މަސައްކަތް ނިމިފައިވާއިރު 31 ރަށެއްގައި އަންނަނީ ފެނާއި ނަރުދަމާ ނިޒާމް ގާއިމް ކުރުމުގެ މަސައްކަތް ކުރަމުންނެވެ.
އެމް.ޑަބްލިޔު.އެސް.ސީގެ އަމާޒަކީ ސާފު ބޯފެނާއި ރައްކާތެރި ނަރުދަމާ ނިޒާމެއް ރައްޔިތުންނަށް ފޯރުކޮށްދިނުމެވެ.