މިއަހަރުގެ ދެވަނަ ކުއާޓަރުގައި ފަތުރުވެރިކަމުގެ ސިނާއަތް ފިޔަވައި، ރާއްޖޭގެ އިޤްތިސާދުގެ މައިގަނޑު އެހެން ހުރިހާ ސިނާއަތްތަކަށް ކުރިއެރުން ލިބިފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ހާމަކޮށްފިއެވެ.
އެމްއެމްއޭއިން މިކަން ހާމަކޮށްފައިވަނީ، ކޮންމެ ތިންމަހަކުން ނެރޭ ކުއާޓަލީ ބިޒްނަސް ސާވޭ ރިޕޯޓުގައެވެ. އެމްއެމްއޭގެ ކުއާޓަލީ ބިޒްނަސް ސާވޭ ރިޕޯޓަކީ ރާއްޖޭގެ އިޤްތިސާދުގެ މިހާރުގެ ހާލަތާއި ކުރިއަށްއޮތް ކުއާޓަރގައި އަތުވެދާނެކަމަށް ލަފާކުރެވޭ ބަދަލުތަކާ ގުޅޭގޮތުން، ނެރޭ ރިޕޯޓެކެވެ. މި ރިޕޯޓު ނެރެނީ އިގްތިސާދުގައި ހިމެނޭ މުހިންމު ދާއިރާތައް ކަމަށްވާ ފަތުރުވެރިކަމާއި ޢިމާރާތްކުރުމާއި ދަތުރުފަތުރާއި މުއާސަލާތީ ޚިދުމަތްތަކާއި ހޯލްސޭލް އަދި ރީޓެއިލް ސިނާއަތުގައި ހަރަކާތްތެރިވާ ބޮޑެތި ވިޔަފާރިތަކާ ސުވާލުކޮށް މައުލޫމާތު އޮޅުން ފިލުވުމަށް ކުރިއަށްގެންދާ ސަރވޭއަކަށްފަހުއެވެ.
މިއަހަރުގެ ދެވަނަ ކުއާޓަރުގައި ބިޒްނަސް ސާވޭ ރިޕޯޓުގައިވާގޮތުގައި ފަތުރުވެރިކަމުގެ ސިނާއަތް ފިޔަވައި ރާއްޖޭގެ އިޤްތިސާދުގެ މައިގަނޑު ސިނާއަތްތައްކަމަށްވާ ކޮންސްޓްރަކްޝަން ސިނާއަތް، ހޯލްސޭލް އަދި ރީޓެއިލް ވިޔަފާރި، ޓްރާންސްޕޯޓް އަދި ކޮމިއުނިކޭޝަންގެ ދާއިރާއަށް ވަނީ ކުރިއެރުން ލިބިފައެވެ.
އެމްއެމްއޭގެ ސަރވޭގައި ބައިވެރިވެފައިވާ ފަތުރުވެރިކަމުގެ ސިނާއަތުގައި ހަރަކާތްތެރިވާ ވިޔަފާރިވެރިންވަނީ، މިއަހަރުގެ ދެވަނަ ކުއާޓަރުގައި، އާމްދަނީ އާއި ރިސޯޓު ބުކިންތައްވެސް ދެވަނަ ކުއާޓަރުގައި ވަރަށް ބޮޑަށް ދަށަށް ގޮސްފައިވާ ކަން ފާހަގަކުރައްވާފައެވެ. އެހެންނަމަވެސް އޮފް ޕީކް ސީސަން ޖުލައިގައި ނިމުމާއެކު، ކުރިއަށްމިދާ ކުއާޓަރުގައި ފަތުރުވެރިކަމުގެ ދާއިރާއަށް ކުރިއެރުން ލިބޭނެ ކަމަށްވެސް ވިޔަފާރިވެރިން ލަފާކުރެއެވެ.
ކުއާޓަލީ ބިޒްނަސް ސާވޭ ރިޕޯޓުގައިވާގޮތުގައި، މިއަހަރުގެ ދެވަނަ ކުއާޓަރުގައި ވަޒީފާގެ ގިނަ ފުރުސަތުތަކެއް އެ ކުއާޓަރުގެތެރޭގައި ވަނީ އުފައްދާފައެވެ.
2013ވަނަ އަހަރުން ފެށިގެން ކޮންމެ އަހަރަކު ހަތަރު ފަހަރު އެމްއެމްއޭއިން އާންމުކުރާ ބިޒްނަސް ސާވޭގެ މަގްސަދަކީ ކުރުމުއްދަތުގައި އިގްތިސާދަށް އަންނަމުންދާ އަދި އަތުވެދާނެކަމަށް ލަފާކުރެވޭ ބަދަލުތައް އަވަސް މުއްދަތެއްގެ ތެރޭގައި ދެނެގަނެ، ސިޔާސަތުތައް ކަނޑައެޅުމުގައި އެހީތެރިވެދިނުންކަމަށް އެމްއެމްއޭއިން ވިދާޅުވެއެވެ.