5000 އަށް ވުރެ ބޮޑު އާބާދީއެއް އޮތް ދުވާފަރުގައި އާބާދީ އިތުރުވެ، ބިން ވަނީ މުޅިން ފުރިފައެވެ. ދުވާފަރަށް ބިން އިތުރުކުރުމުގެ އެންމެ ބޮޑު ބޭނުމަކީވެސް ރަށުގެ ބޯހިޔާވަހިކަމުގެ މައްސަލައަށް ޙައްލު ހޯދައިދިނުމެވެ. ބިން ހިއްކުމުގެ މަސައްކަތް ނިންމާލާފައިވާއިރު މިހާރު ކުރިއަށްދަނީ އެ ބިން ބޭނުން ކުރާނެ ޕްލޭން ތައްޔާރުކުރުމުގެ މަސައްކަތްތަކެކެވެ.
ބިމުގެ ދަތިކަމަކީ މީހުން ދިރިއުޅޭ ރަށްރަށް މިވަގުތު ދިމާވެފައިވާ ބޮޑެތި މައްސަލަތަކުގެ ތެރެއިން އެންމެ ބޮޑު އެއް މަައްސަލައެވެ. ޚާއްސަކޮށް އާބާދީ ބޮޑެތި ރަށްރަށަށް ދިމާވެފައިވާ މި މައްސަލައިގެ ސަބަބުން އެއް އާއިލާއެއް އެއް ގެއެއްގެ ތެރޭގައި ދަތިހާލުގައި އުޅެންޖެހޭ ފަހަރު އާދެއެވެ. މިގޮތަށް ދިމާވާ ސަބަބުތަކުގެ ތެރޭގައި ބޯހިޔާވަހިކަމަށް ޚަރަދުކުރާވަރުގެ ތަނަވަސްކަން ނެތުމާއި ބިން ފުރިފައި އޮތުމުގެ ސަބަބުން ބޯހިޔާވަހިކަމަށް ގޯތި ދޫކުރާނެ ޖާގައެއް ނެތުން ހިމެނެއެވެ.
ރަށުގެ ބިން ކުޑަވުމުގެ ސަބަބުން މިކަމުގެ އަސަރު ކުރަނީ ހަމައެކަނި ބޯހިޔާވަހިކަމަށް އެކަންޏެއް ނޫނެވެ. ބިން ނެތުމުގެ ސަބަބުން ވިޔަފާރިތަކަށާއި ޖުމްލަ ގޮތެއްގައި އެރަށެއްގެ އިޤްތިޞާދަށްވެސް ނުސީދާ ގޮތުންނަމަވެސް އަންނަނީ އަސަރުކުރަމުންނެވެ. އެހެން ރަށްރަށެކޭ އެއްގޮތަށް ރ.ދުވާފަރަށްވެސް ދިމާވެފައިވާ މައްސަލަތަކުގެ ތެރޭގައި އެރަށުގެ ބިން ފުރިފައި އޮތުން ހިމެނެއެވެ.
ދުވާފަރުގައި މީހުން އާބާދުވީތާ 13 އަހަރަށް ވުރެ ގިނަދުވަސްވެފައިވާއިރު މިހާތަނަށްވެސް އެރަށުން އަލަށް ގޯތި ދޫކޮށްފައެއް ނެތެވެ. މިއާއެކު ރަށުގެ ރައްޔިތުންނަށް ވަނީ ބޯހިޔާވަހިކަމުގެ ދަތިތަކާ ކުރިމަތިލާންޖެހިފައެވެ. އެރަށަށް ދިމާވެފައިވާ ދުވަސްވީ މި ބޮޑު މައްސަލައަށް ހައްލެއް ހޯއްދަވައިދެއްވުމަށް އަދުގެ ސަރުކާރުން ކުރެއްވި މަސައްކަތުގެ ދަށުން މިހާރު ވަނީ އެރަށުން 22.2 ހެކްޓަރުގެ ބިން މިދިޔަ އަހަރުގެ ޖޫންމަހު އެއްކޮށް ނިންމާލާފައެވެ. 5000 އިން މަތީގެ އާބާދީއެއް އޮތް ދުވާފަރުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް މިއާއެކު ހައްލެއް ލިބިގެންދާނެއެވެ.
ދުވާފަރު ކައުންސިލްގެ ރައީސް ހަސަން ހަކީމް ވިދާޅުވީ އެރަށުގެ ބިމުގެ ދަތިކަން ހައްލުކުރުމަށްޓަކައި ބިން ހިއްކާފައިވުމުގެ ސަބަބުން އެ ބިން ބޭނުންކުރާނެ ގޮތާއި ޖުމުލަ ގޮތެއްގައި ރަށުގެ ލޭންޑް ޔޫސް ޕްލޭން ކުރަހާ ނިމުމަކާއި ގާތަށް އައިސްފައިވާކަމަށެވެ. އަދި ހިއްކި ސަރަޙައްދު ބޭނުންކުރާއިރު އެންމެ ބޮޑު އިސްކަމެއް ދީފައިވާނީ ރަށުގެ ރައްޔިތުންގެ ބޯހިޔާވަހިކަމަށް ގޯތި ދޫކުރުމަށްކަމަށް ހަކީމް ވިދާޅުވިއެވެ. އަދި އެ ރަށަކީ މަސްވެރި ރަށެއް ކަމަށްވުމުން އެކަމަށް ޚާއްސަކޮށްގެން ޕްލޭންތައް ހެދުމަށް ވަނީ ނިންމާފައެވެ. ބިން ހިއްކުމާއެކު ރަށަށް އިޖްތިމާއީ ގޮތުންނާއި އިޤްތިޞާދީ ކަންކަމަށް ވަރަށްބޮޑު ހައްލެއް ލިބޭނެކަމަށް ހަކީމް ފާހަގަކުރެއްވިއެވެ.
ރ.ދުވާފަރަކީ 2004 ވަނަ އަހަރުގެ ޑިސެމްބަރުމަހު ކުރިމަތިވި ސުނާމީ ކާރިޘާއާ ގުޅިގެން ރ.ކަނދޮޅުދޫގެ ބޮޑުބައެއް ގިރުމާ ގުޅިގެން، އެރަށުގެ މީހުން އާބާދުވުމަށް ތަރައްޤީ ކޮށްފައިވާ ރަށެކެވެ. އިންޓަނޭޝަނަލް ފެޑެރޭޝަން އޮފް ރެޑްކްރަސެންޓް(އައި.އެފް.އާރް.ސީ) އާއި ދިވެހި ސަރުކާރުން ގުޅިގެން ތަރައްޤީކޮށްފައިވާ ދުވާފަރަށް، ރ.ކަނދޮޅުދޫ މީހުން ބަދަލުކޮށްފައިވަނީ 2008 ވަނަ އަހަރުގެ ޑިސެންބަރު މަހުއެވެ.