ހުޅުމާލެ ދެވަނަ ފިޔަވަހީގައި ތަރައްޤީކުރި ފުރަތަމަ ސްކޫލު ހުޅުވާ، އެ ސްކޫލްގައި ކިޔަވައިދޭން ފަށައިފިއެވެ. މި ސްކޫލް ހުޅުއްވައިދެއްވީ .އެކަމަށްޓަކައި އެ ސްކޫލްގައި ބޭއްވި ޚާއްސަ އެ ސެމްބްލީގައި ރައީސުލްޖުމްހޫރިއްޔާގެ ނާއިބް ފައިޞަލް ނަޞީމްއެވެ.
ހުޅުމާލެ ދެވަނަ ފިޔަވަހީގައި ހުޅުވި “ކާމިލް ދީދީ ޕްރައިމަރީ ސްކޫލް" ނިސްބަތްވެވަޑައިގަންނަވަނީ ދިވެހިރާއްޖޭގައި އެކުލަވާލެވުނު ފުރަތަމަ ޤާނޫނު އަސާސީގެ ދަށުން އައްޔަންކުރެވުނު ފުރަތަމަ ވަޒީރުލް މަޢާރިފް އަލްއުސްތާޛް އަޙްމަދު ކާމިލްދީދީއަށެވެ.
މި ސްކޫލްއަކީ އެލްކޭޖީން ފެށިގެން ގްރޭޑް 6 އާ ހަމަޔަށް ކިޔަވައިދޭނެ ސްކޫލްއެކެވެ. މި ސްކޫލުގައި ފައުންޑޭޝަން ކްލާސްތައް 4 ދަންފަޅިއަކަށް އަދި ގްރޭޑް 1 ން 6 އަކަށް 2 ދަންފަޅިއަށް ކިޔަވައިދިނުމަށް ވަނީ ހަމަޖެހިފައެވެ.
824 ދަރިވަރުންގެ ޖާގައިގެ މި ސްކޫލުގައި ދަރިވަރުންނަށް ކިޔަވައިދިނުމަށްޓަކައި 47 މުދައްރިސުން ހަރަކާތްތެރިވާނެއެވެ. އަދި 8 އިދާރީ މުވައްޒަފުންނާއި، 10 މަސައްކަތު މީހުންނާއެކު ޖުމްލަ 65 މުވައްޒިފުން މި ސްކޫލްގައި މަސައްކަތްކުރައްވާނެކަމަށް އެޑިއުކޭޝަން މިނިސްޓްރީން ވިދާޅުވެއެވެ.
ކާމިލް ދީދީ ޕްރައިމަރީ ސްކޫލް ހުޅުވުމަށް ބޭއްވި ރަސްމިއްޔާތުގައި މިނިސްޓަރ އޮފް އެޑިއުކޭޝަން ޑރ.ޢާއިޝަތު ޢަލީ ވަނީ މި ސްކޫލާއެކު، ހުޅުމާލޭގެ ދެވަނަ ފިޔަވަހީގައި އާބާދުވީ ރައްޔިތުންނަށް ވަރަށް ބޮޑު ފަސޭހައެއް ވެގެންދާނެކަން ފާހަގަކުރައްވާފައެވެ. މިނިސްޓަރ ވިދާޅުވީ މިއަހަރު ތެރޭ “ކާމިލް ދީދީ ޕްރައިމަރީ“ ސްކޫލާއި، އިންވެގެން ހުރި ޕްރީ ސްކޫލްވެސް ހުޅުވިގެންދާނެކަމަށެވެ. އަދި މި ދިރާސީ އަހަރުގެ ދެވަނަ ޓާމުގައި ހުޅުމާލޭގެ ދެވަނަ ފިޔަވަހީގައި ދިރިއުޅޭ ދަރިވަރުންނަށް ޚާއްސަ ޞަލާހުއްދީން ސްކޫލުގައިވެސް ކިޔަވައިދޭން ފަށްޓަވާނެކަމަށް މިނިސްޓަރ ވިދާޅުވިއެވެ. އެ ސްކޫލަކީ އެލްކޭޖީން ފެށިގެން ގްރޭޑް 10އަކާއި ހަމައަށް ކިޔަވައިދެނެ ސްކޫލެކެވެ. އަދި އެ ސްކޫލު ހުޅުވުމުން ހުޅުމާލޭ ދެވަނަ ފިޔަވަހީގައި ދިރިއުޅޭ ބެލެނިވެރިންނަށް އިތުރު ލުޔެއް ލިބިގެންދާނެކަން މިނިސްޓަރ ފާހަގަކުރައްވިއެވެ.
"ޅަފުރައިގައި ކަންކަން ހޯދާ ދެނެގަންނަން ކުދިން ވަރަށް ޝައުޤުވެރިވޭ. އަދި އެކުދިން ކަންކަން ދަސްކުރާލެންވެސް ވަރަށް އަވަސް. އެހެންކަމުން ދަރިވަރުންގެ ފަށާތަޢުލީމު މަރުހަލާއަކީ ފައްސި ތަޖްރިބާތަކެއް ދަރިވަރުންނަށް ލިއްބައިދޭ މަރުހަލާއަކަށް ހެދުން މުހިއްމު. މި ސްކޫލާގުޅޭ ދަރިވަރުންގެ ބެލެނިވެރިންނަށް އަޅުގަނޑުމެން ޔަޤީންކަން އަރުވަން ބޭނުމީ މިއަދު މިތާ މިތިބި ކުދިން ފަށާ ދަތުރުގައި، 2ވަނަ މަންމައިންގެ ގޮތުގައި އަދި ބައްޕައިންގެ ގޮތުގައި އަޅުގަނޑުމެން ތިބޭނެކަން. މި ތުއްތު ކުދިންނަށް އުޅުންތަކާއި ގުޅުންތައް ތަރުތީބުކުރުމަށް ދަސްކޮށްދޭނެކަން. އަދި މި ދަރިވަރުން ސާނަވީ މަރުހަލާއަށް ފުރިހަމައަށް ތައްޔާރުކޮށްދޭނެކަން.” މިނިސްޓަރ އޮފް އެޑިއުކޭޝަން ޑރ. ޢާއިޝަތު އަލީ ވިދާޅުވިއެވެ.
“ކާމިލްދީދީ ޕްރައިމަރީ ސްކޫލް" ތަރައްޤީކޮށްފައިވަނީ ހިޔާ ޓަވަރު 3އާއި 4ގެ ކުރިމަތީއޮތް ހުސް ބިމުގައެވެ. މި ސްކޫލްގެ އެންމެބޮޑު ބޭނުމަކީވެސް ހިޔާ ފްލެޓަށް ބަދަލުވި، ޢާއިލާތަކުގެ ކުދިންނަށް ފަސޭހައިން ކިޔެވަން ދެވޭނެ މަގު ފަހިކޮށްދިނުމެވެ.
މި ސްކޫލްގެ މަސައްކަތް އެސްޖޭ ކޮންސްޓްރަކްޝަނާ ޙާވާލުކޮށް، ޢަމަލީ މަސައްކަތް ފެށީ މިއަހަރުގެ އޭޕްރިލް އެއްވަނަ ދުވަހުއެވެ. ކާމިލް ދީދީ ޕްރައިމަރީ ސްކޫލަކީ 824 ކުދިންގެ ޖާގައިގެ ސްކޫލެވެ. ސްކޫލްގައި 24 ކްލާސްރޫމް ވަނީ ތަރައްޤީކޮށްފައެވެ. ކާމިލް ދީދީ ޕްރައިމަރީ ސްކޫލަށް، މިއަހަރުގެ ދިރާސީ އާ އަހަރާއެކު ވަނީ ކުދިން ނަގާފައެވެ. ނަމަވެސް ސްކޫލްގެ މަސައްކަތްތައް ނުނިމޭތީ އެކުދިން، މި ފާއިތު އެއް މަސް ދުވަހު ކިޔަވަން ގޮސްފައިވަނީ ހުޅުމާލެ ފުރަތަމަ ފިޔަވަހީގެ ސްކޫލްތަކަށެވެ.
އެޑިއުކޭޝަން މިނިސްޓަރީން އަންނަނީ ހުޅުމާލޭގެ ފުރަތަމަ ފިޔަވަހީގައި ސީއެޗްއެސްސީގެ އާ އިމާރާތާއި، ކުވެއިތުގެ އަލް ޖެރީ ހޯލްޑިން ގްރޫޕުން ހަދަމުންދާ އަޖިއަލް ބައިލިންގުއަލް ސްކޫލް އެޅުމުގެމަސައްކަތްވެސް ކުރަމުންނެވެ.