އިޓަލީގައި ހަކަތަ އިމްޕޯޓް ކުރުމަށް ކުރާ ޚަރަދު މިއަހަރު އިތުރުވެ ގާތްގަނޑަކަށް 99.5 ބިލިއަން އެމެރިކާ ޑޮލަރަށް އަރާނެ ކަމަށް އެ ގައުމުގެ އިޤްތިޞާދާއި ބެހޭ ވަޒީރު ވިދާޅުވެއްޖެއެވެ. ޔޫރަޕަށް މިހާރު ކުރިމަތިވެފައިވާ ހަކަތައިގެ ދަތިކަމުގެ ސަބަބުން އިޓަލީއަށް ލިބޭ ގެއްލުން އިތުރުވެގެންދާނެއެވެ.
މިދިޔަ ހޮނިހިރު ދުވަހު ބޭއްވި ބިޒްނަސް ފޯރަމްގައި ވާހަކަ ދައްކަވަމުން އިޤްތިޞާދާއިބެހޭ ވަޒީރު ޑެނިއެލް ފްރާންކޯ ވިދާޅުވީ އިޓަލީގެ ދަރަނި ބޮޑުވުމުން އިޤްތިޞާދީ ކުރިއެރުން ހޯދުމަށް ޖާގަ ކުޑަވެފައިވާ ކަމަށެވެ.
އޭނާ އިތުރަށް ވިދާޅުވީ ހަކަތައިގެ ބޮޑެތި ބިލްތަކާ ކުރިމަތިލާން ކުންފުނިތަކާއި ކޮންސިއުމަރުންނަށް އެހީތެރިވެދިނުމަށްޓަކައި އަޅާ ފިޔަވަޅުތައް އަންނަ ހަފްތާގައި ފާސްކުރާނެ ކަމަށެވެ. ރަޝިއާއިން ޔޫރަޕަށް ގޭސް ފޯރުކޮށްދޭ މިންވަރު މަދުވުމާއި ގުޅިގެން، ގޭހުގެ އަގު އުފުލި ކަރަންޓުގެ އަގު އުފުލިފައިވާ މި ދަނޑިވަޅުގައި ޔޫރަޕްގެ ހަކަތައިގެ މާކެޓްގެ މަސައްކަތް ކުރިއަށްދާ ގޮތަށް އަލިއަޅުވާލުމަކީ، މުހިންމު ކަމެއް ކަމަށް ފްރާންކޯ ވިދާޅުވިއެވެ. އަދި މުހިންމީ ގޭހާއި ހަކަތަގެ އަގު ދެމެހެއްޓެނިވި މިންވަރަށް ގެނައުން ފްރާންކޯ ވިދާޅުވިއެވެ.
އިޓަލީގައި ސާފު ހަކަތަ އިމްޕޯޓް ކުރުމަށް 2021 ވަނަ އަހަރު 43 ބިލިއަން ޔޫރޯ ވަނީ ޚަރަދުވެފައެވެ. 2022 ވަނަ އަހަރު ގާތްގަނޑަކަށް 60 ބިލިއަން ޔޫރޯ އިތުރުވާނެ ކަމަށް ލަފާކުރެވޭ ކަމަށް ފްރާންކޯ ވިދާޅުވިއެވެ. އެއީ ޖުމްލަ ޑޮމެސްޓިކް ޕްރޮޑަކްޓްގެ ގާތްގަނޑަކަށް %3 އެވެ.