މާލޭގައި އަލަށް ތަޢާރަފްކުރި މިނީ ބަހުގެ ޚިދުމަތަކީ ބައިބޯ މާލޭގައި ދިރިއުޅޭ ރައްޔިތުންނަށް ތަސައްލީއަކަށް ވާނެކަމަށާ، އެޚިދުމަތް އިތުރަށް ތަރައްގީވާނެކަމަށް ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
މާލޭގައި މިނީ ބަހުގެ ޚިދުމަތް ފެށުމާ ގުޅިގެން ރައީސް ކުރެއްވި ޓުވީޓެއްގައި ވަނީ އާންމު ދަތުރުފަތުރުގެ ނިޒާމު ހަރުދަނާކުރަން ސަރުކާރުން ވައުދުވެފައިވާގޮތަށް މާލޭގައި މިނީބަހުގެ ޚިދުމަތް ފެށުމީ ލިބުނު ކުރިއެރުމެއްކަމަށެވެ.
ވަށައިޖެހޭ އާންމު ދަތުރުފަތުރުގެ ނިޒާމެއްގެ ތެރެއިން @RTLnetwork މިނީ ބަހުގެ ޚިދުމަތް ފެށިގެން ދިޔުމަކީ، މިނިޒާމު ފުރިހަމަކުރުމުގައި ލިބުނު ކުރިއެރުމެއް. ބައިބޯ މާލޭގައި ދިރިއުޅޭ ރައްޔިތުންނަށް ލިބޭ ތަސައްލީއަކަށް މިޚިދުމަތްވެ އިތުރަށް ތަރައްޤީވެގެންދާނެ. pic.twitter.com/sObx6HEMao
— Ibrahim Mohamed Solih (@ibusolih) September 5, 2022
މިގޮތުން ވަށައިޖެހޭ އާންމު ދަތުރުފަތުރުގެ ނިޒާމެއްގެ ތެރެއިން މިނީ ބަހުގެ ޚިދުމަތް ފެށިގެން ދިޔުމަކީ، މިނިޒާމު ފުރިހަމަކުރުމުގައި ލިބުނު ކުރިއެރުމެއްކަމަށް ރައީސް ވިދާޅުވިއެވެ.
މިނީ ބަހުގެ ޚިދުމަތް ހޯދަން ފުރަތަމަ ދެ ހަފުތާގައި އެއްވެސް އަގެއް ދައްކާކަށް ނުޖެހޭނެއެވެ. އެއަށްފަހު، ދަތުރަކަށް ނަގަން ނިންމާފައި ވަނީ 7 ރުފިޔާއެވެ. ޢެމްޓީސީސީން ވިދާޅުވީ ފުރަތަމަ ދުވަހު 700 އަށްވުރެ ގިނަ މީހުން ބަހުގެ ޚިދުމަތް ހޯދާފައިވާކަމަށެވެ.
ބަހުގަައި ސްކޫލްތަކުގެ ދަރިވަރުންނާއި، ޢުމުރުން 65 އަހަރުން މަތީގެ މީހުންނާއި، ތިން އަހަރުން ދަށުގެ ކުދިންނާއި ޚާއްސަ އެހީއަށް ބޭނުންވާ މީހުންނަށް މުޅިން ހިލޭ ދަތުރު ކުރެވޭނެއެވެ.