މޮރޮކޯއިން ރާއްޖެއަށް ކޮންމެ އަހަރަކު ދިނުމަށް ހަމަޖެހިފައިވާ 20 ސްކޮލަރޝިޕަށް އެދުމުގެ ފުރުޞަތު މިނިސްޓްރީ އޮފް ހަޔަރ އެޑިއުކޭޝަނުން ހުޅުވާލައިފިއެވެ.
މި ސްކޮލަރޝިޕްތަކަށް އެދުމުގެ ފުރުޞަތު ވަނީ މިމަހުގެ 13 ވަނަ ދުވަހާ ހަމަޔަށް ހުޅުވާލާފައެވެ.
މި ފުރުޞަތުގެ ދަށުން މޮރޮކޯގެ ޔުނިވަރސިޓީތަކުގައި ބެޗްލަރސް، މާސްޓަރސް ޑިގްރީ، ޕީ.އެޗް.ޑީ ގެ އެކި ކޯސްތަކަށް ކިޔެވުމުގެ ފުރުޞަތު ލިބިގެންދާނެއެވެ. މިލެވެލްގެ ކޯސްތަކަށް އެދުމުގައި ތަޢުލީމީ ގޮތުން އެކި ޝަރުތުތައް ކަނޑައަޅާފައިވާއިރު ތަޢުލީމު ހާސިލުކުރުމަށް ސަރުކާރުން ނުވަތަ ސަރުކާރު މެދުވެރިވެގެން އެހީ ލިބިފައިވާނަމަ އެންމެފަހުގެ އެހީއަށްފަހު، މިމަހުގެ 13 ވަނަ ދުވަހާ ހަމަޔަށް ރާއްޖެއަށް ޚިދުމަތްކޮށްފައިވާ މީހުންނަށް ވާންޖެހެއެވެ. މީގެ އިތުރަށް ހަޔަރ އެޑިއުކޭޝަން މިނިސްޓްރީން ނުވަތަ ކުރިން ޑިޕާޓްމަންޓް އޮފް ހަޔަރ އެޑިޔުކޭޝަން މެދުވެރިވެގެން ކިޔެވުމަށް ލޯނެއް ނަގާފައިވާނަމަ ޑީފޯލްޓެއް ނެތި އެލޯނެއް ގަވާއިދުން ދައްކަމުންދާ ފަރާތެއްކަމުގައި ވާންޖެހޭނެކަމަށްވެސް މިނިސްޓްރީން ވިދާޅުވެއެވެ. އަދި ބޭނުންވާ ކޯހަކީ މިހާރު ފުރިހަމަކޮށްފައިވާ ކޯހަކަށްވުރެ މަތީ ފެންވަރުގެ ކޯހަކަށްވުމާއި ކޯހާއި އެއް ފެންވަރެއްގެ ކޯހެއް ދައުލަތުގެ ޚަރަދުގައި މިހާރު ފުރިހަމަ ކުރަމުންދާ މީހަކު ކަމުގައިވެސް ނުވުންވެސް ކޯހުގެ ޝަރުތުތަކުގެ ތެރޭގައި ހިމެނެއެވެ.
މިކޯސްތަކުގައި ފްރެންޗް ބަހުން ކިޔަވައިދިނުމަށް ހަމަޖެހިފައިވުމާއެކު މިކޯހުގެ ފައިނަލް ސިލެކްޝަން ހެދުމަށް ހަމަޖެހިފައިވަނީ ކެންޑިޑޭޓުން ހުށައަޅާ ޔުނިވަރސިޓީގެ ފަރާތުންނެވެ. އަދި މިކޯސްތައް ކިޔަވައިދޭން ފެށުމުގެ ކުރިން ފްރެންޗް ބަސް ކިޔަވައިދިނުމަށްވަނީ ހަމަޖެހިފައެވެ.
މިކޯސްތަކުގައި އިސްލާމިކް ސްޓަޑީސް ނުވަތަ ޢަރަބި ބަހާއި ލިޓްރޭޗަރގެ ކޯސްތަކަށް ކުރިމަތިލާ މީހުންނަށް ޢަރަބި ބަސް އެނގުން ލާޒިމް ކަމަށް ހަޔަރަ އެޑިއުކޭޝަން މިނިސްޓްރީން ވިދާޅުވެއެވެ. މިސްކޮލަރޝިޕްގެ ދަށުން ކޯސް ފީ ވަނީ ހިލޭހަމަޖެހިފައެވެ. އަދި އެލަވަންސްގެ ގޮތުގައި ކޮންމެ މަހަކު 750 ދިރްހަމް ކޯސް އިންތިޒާމް ކުރާ ފަރާތުން ހަމަޖައްސައިދޭނެއެވެ. ނަމަވެސް ރެޖިސްޓްރޭޝަންފީ، ޓްރާންސްޕޯޓް ފަދަ އިތުރު ޚަރަދުތައް ހަމަޖައްސަން ޖެހެނީ ކޯހުގައި ކިޔަވާ ފަރާތްތަކުން އަމިއްލައަށެވެ.
މޮރޮކޯ ސަރުކާރުން ދިވެހި ޒުވާނުންނަށް ޚާއްސަކޮށްގެން އެޤައުމުގެ ޔުނިވަރސިޓީތަކާއި، ސަރުކާރުގެ އިންސްޓިޓިއުޝަންތަކުން މަތީ ތަޢުލީމު ހާސިލްކުރުމަށްޓަކައި ކޮންމެ އަހަރަކު ދެމުންގެންދާ ސްކޮލަރޝިޕް 20 އަށް އިތުރުކޮށްފައިވަނީ މިނިސްޓަރ އޮފް ފޮރިން އެފެއާޒް އަބްދުﷲ ޝާހިދު 2019 އަހަރުގެ ނޮވެމްބަރުމަހުގެ ތެރޭގައި މޮރޮކޯއަށް ކުރެއްވި ރަސްމީ ދަތުރުފުޅުގައި އެޤައުމުގެ ސަރުކާރާއެކު ކުރެއްވި މަޝްވަރާތަކުގެ ނިންމުންތަކާއި ގުޅިގެންނެވެ. މޮރޮކޯ ސަރުކާރުން މީގެކުރިން ރާއްޖެ ދެމުން އައިސްފައިވަނީ އަހަރަކު 5 ސްކޮލަރޝިޕެވެ.