ކޯވިޑުގެ ބަލިމަޑުކަމުގެ ސަބަބުން ދަތުރުފަތުރުކުރުމަށް އޮތް ހުރަސްތައް އުވާލުމުން ޖަރުމަނުވިލާތުގެ ދައުލަތުގެ އެއަރލައިން ލުފްތަންސާއިން އަންނަ އަހަރު ގާތްގަނޑަކަށް 20000 އެއްހާ މުވައްޒަފުން އިތުރުކުރަން ނިންމާފައިވާ ކަމަށް އެ އެއަރލައިންގެ ޗީފް އެގްޒެކެޓިވް ކާސްޓެން ސްޕޯރް ވިދާޅުވެއްޖެއެވެ.
ކޯވިޑުގެ ބަލިމަޑުކަމުގެ ސަބަބުން ދުނިޔޭގެ އެކި ކަންކޮޅުތަކުގައި ވައިގެ ދަތުރުފަތުރުތައް ކުރުން މުޅިންހެން ހުއްޓުނެވެ. މިއާއެކު ލުފްތަންސާގެ ޖުމްލަ މުވައްޒަފުންގެ އަދަދު ވަނީ 100000 އަށް ކުޑަވެފައެވެ. މުވައްޒަފުން މަދުވެގެން އެ އެއަރލައިނަށް ވަނީ އޮޕަރޭޝަނަލް ދަތިތަކާވެސް ކުރިމަތިލާން ޖެހިފައެވެ.
އަލަށް އިތުރުކުރާ 20000 މުވައްޒަފުންގެ ތެރެއިން 12000 މުވައްޒަފުންގެ މަގާމަކީ މުޅިން އާ މަގާމުތަކަށް ވާނެ ކަމަށް ލުފްތަންސާގެ ތަރުޖަމާނަކު ވިދާޅުވިއެވެ. އޭނާ އިތުރަށް ވިދާޅުވިގޮތުގައި ގާތްގަނޑަކަށް 8،000 މަގާމަކީ ކުންފުނި ދޫކޮށްފައިވާ ދާ މީހުންގެ މަގާމެވެ.
ހޯމަ ދުވަހުގެ ރޭ ބޭއްވި ނިއުސް ބްރީފިންގައި އެއަރލައިންގެ ޗީފް އެގްޒެކެޓިވް ކާސްޓެން ސްޕޯރް ވިދާޅުވީ ޖުލައި އަދި އޮގަސްޓް މަހަކީ ލުފްތަންސާއަށް ވަރަށް ރަނގަޅު ދުވަސްތަކެއް ކަމަށެވެ.