ވޭތުވެދިޔަ އަހަރު އެކަނިވެސް އެކަނިވެރި މައިންނާއި ބަފައިންނަށް 62 މިލިޔަނަށް ވުރެ ގިނަ ރުފިޔާ ޚަރަދުކޮށްފައިވާ ކަމަށް ނޭޝަނަލް ސޯޝަލް ޕްރޮޓެކްޝަން އޮތޯރިޓީން ހާމަކޮށްފިއެވެ.
2019 ވަނަ އަހަރު ވަޒީރުންގެ މަޖިލީހުން ވަނީ އެކަނިވެރި މައިންނާއި ބަފައިންނަށް މަހެއްގެ މައްޗަށް ޢާއިލާއަކަށް އެންމެ ގިނަވެގެން ދެވޭ ޢަދަދު 10،000 ރުފިޔާއަށް އިތުރުކުރުމަށް ނިންމަވާފައެވެ. މީގެކުރިން އެހީގެ މިންވަރު ކަނޑައަޅާފައި ވަނީ ކުދިންގެ މައްޗަށް ބިނާކޮށް، ކޮންމެ ކުއްޖަކަށް 1000 ރުފިޔާ ހިސާބު ކުރުމަށްފަހު މަހެއްގެ މައްޗަށް ޢާއިލާއަކަށް އެންމެ ގިނަވެގެން 3000 ރުފިޔާ ލިބޭގޮތަށެވެ.
"ވިއަވަތި ރާއްޖެ" ކޮންފަރެންސްގައި އެންސްޕާއިން ހުށައެޅި ޕްރެޒެންޓޭޝަންގައި ވާގޮތުން އެކި ކަހަލަ އެހީތެރިކަމަށް އެދި 2021 ވަނަ އަހަރުގެ ނިޔަލަށް އެންސްޕާގައި 9646 މީހަކު ރަޖިސްޓްރީކޮށްފައިވެއެވެ. އެއީ 4041 އަންހެނުންނާއި 5605 ފިރިހެނުންނެވެ.
އެންސްޕާގެ ތަފާސްހިސާބުތަކަށް ބަލާއިރު ފަޤީރު ހާލަތުގައި ދިރިއުޅޭ އަދި އެކަނިވެރި މައިންނާއި ބަފައިންނަށްދޭ މާލީ އެހީތެރިކަން ހޯދުމަށްޓަކައި 2021 ވަނަ އަހަރުގެ ނިޔަލަށް 3067 މީހުން ވަނީ ރަޖިސްޓްރީކޮށްފައެވެ. އޭގެ ތެރޭގައި 98 އިންސައްތައަކީ މައިންނެވެ. އަދި 2 އިންސައްތަ އަކީ ބަފައިންނެވެ. ކުދިންގެ ޢަދަދަށް ބަލާނަމަ އެއީ 5290 ކުދިންނެވެ. ދެކުނުގެ 7 އަތޮޅުގެ ތެރެއިން އެކަނިވެރި މައިން ނުވަތަ ބަފައިން އެންމެ ގިނައިން ތިބީ އައްޑޫ ސިޓީގައެވެ. އެ ސިޓީގައި މިފަދަ ބެލެނިވެރިންގެ ގޮތުގައި 249 މީހުން އެބަތިއްބެވެ. އެއީ 446 ކުދިންނެވެ.
ދެން އެންމެ ގިނައިން އެކަނިވެރި ބެލެނިވެރިން ތިބީ ލ.އަތޮޅުގައެވެ. އެއީ 191 ބެލެނިވެރިންނެވެ. އެބެލެނިވެރިންގެ 326 ދަރިން އެބަތިއްބެވެ. މީގެ އިތުރުން ގދ. އަތޮޅުގައި މިފަދަ 180 ބެލެނިވެރިން ތިބިއިރު އެމީހުން ބަލަންޖެހޭ 328 ކުދިން އެބަތިއްބެވެ. ފުވައްމުލައް ސިޓީގައި އެކނިވެރި ބެލެނިވެރިންގެ ގޮތުގައި 148 މީހުން ތިބި އިރު އެމީހުން ބަލާ 278 ކުދިން އެބަތިއްބެވެ.
އެކަނިވެރި މައިންނާއި ބަފައިންނަށް އެހީތެރިވުމުގެ ގޮތުން ސަރުކާރުން ކުރި ޚަރަދުތައް މިދިޔަ 3 އަހަރުގެ ތެރޭގައި އެންމެ ގިނައީ މިދިޔަ އަހަރުއެވެ. އެގޮތުން 2018 ވަނަ އަހަރު މިފަދަ މީހުންނަށް 51.5 މިލިޔަން ޚަރަދުކުރި އިރު މިދިޔަ އަހަރު ޚަރަދުކޮށްފައިވަނީ 62.6 މިލިޔަން ރުފިޔާއެވެ.
މީގެ އިތުރަށް ބޭސްފަރުވާ ކުރުމަށްޓަކައި 2021 ވަނަ އަހަރު ވަނީ 6590 މީހަކަށް އެހީތެރިކަން ފޯރުކޮށްދީފައެވެ. މި އެހީތެރިކަން އެންމެ ގިނައިން ފޯރުކޮށްދިނީ އައްޑޫސިޓީގެ ރައްޔިތުންނަށްށެވެ. އެގޮތުން އެ ސިޓީގެ 548 މީހަކަށް އެހީތެރިކަން ފޯރުކޮށްދިނެވެ. އަދި ގދ. އަތޮޅުގެ 389 މީހަކަށް އެހީތެރިކަން ފޯރުކޮށްދީފައިވާއިރު ގއ. އަތޮޅުގެ 295 މީހަކަށް ވަނީ އެހީތެރިކަން ފޯރުކޮށްދީފައެވެ.
މީގެ ތެރެއިން އެންމެ ބޮޑު އެހީތެރިކަމެއް ފޯރުކޮށްދީފައިވަނީ ރާއްޖެއިން ބޭރުން ކުރާ ބޭސްފަރުވާއަށެވެ. އެގޮތުން 3725 މީހަކަށް ބޭސްފަރުވާގެ އެހީތެރިކަން ފޯރުކޮށްދިނެވެ. އަދި ރާއްޖޭގައި ތިބެގެން ބޭސް ފަރުވާގެ ޚިދުމަތަށް 1589 މީހަކަށް އެހީތެރިކަން ފޯރުކޮށްދިނެވެ.