ރާއްޖޭގައި ކުރިއަށްގެންދާ ބޯހިމެނުމުގެ މަސައްކަތަށް މަޢުލޫމާތު ނެގުމަށްޓަކައި ލިސްޓް އެކުލަވާލުމުގެ މަސައްކަތް ފަށާފައިވަނީ އިއްޔެއެވެ.
އިއްޔެ އެ މަސައްކަތް ފަށާފައިވަނީ ހެނދުނު 11 ޖެހިއިރުގައެވެ. މޯލްޑިވްސް ބިއުރޯ އޮފް ސްޓެޓިސްޓިކްސްއިން ވިދާޅުވީ ލިސްޓިންގެ މަސައްކަތަށް ރައްޔިތުންގެ ފަރާތުން އެއްބާރުލުން ލިބޭކަމަށެވެ.
ޕީއެސްއެމްނިއުސްއަށް މަޢުލޫމާތުދެއްވަމުން ސްޓެޓިސްޓީޝަން ފާޠިމަތު ރިޔާޒާ ވިދާޅުވީ ބޯހިމެނުމަށްޓަކައި ލިސްޓް އެކުލަވާލުމުގެ މަސައްކަތްތައް މާލޭގެ 4 ސަރަޙައްދަކަށް ބަހާލާފައިވަކަމަށެވެ. މިގޮތުން ގަލޮޅުގައި 117 ބަޔަކަށް ބަހާލައިގެން އެ މަސައްކަތް ކުރިއަށްގެންދިޔުމަށް ހަމަޖެހިފައިވާކަމަށެވެ. އަދި ހެންވޭރު 130 ބަޔަކަށާއި މައްޗަންގޯޅިވެސް 130 ބަޔަކަށް ވަނީ ބަހާލާފައެވެ. މީގެ އިތުރުން މާފަންނު 200 ބަޔަކަށް ބަހާލައިގެން މަޢުލޫމާތު ނެގުމަށް ހަމަޖެހިފައިވާކަމަށް ރިޔާޒާ ވިދާޅުވިއެވެ. ރިޔާޒާ ވިދާޅުވީ ވިލިމާލޭގައި 27 ޓީމް ހަރަކާތްތެރިވާނެކަމަށާއި ހުޅުމާލޭގައި 100އަށް ވުރެ ގިނަ ޓީމް ޙަރަކާތްތެރިވާނެކަމަށެވެ.
ސްޓެޓިސްޓިކް ބިއުރޯއިން ވިދަޅުވީ ބޯހިމެނުމުގެ މަސައްކަތަށް ރައްޔިތުންގެ ފަރާތުން އެއްބާރުލުން ލިބެމުން އަންނަކަމަށެވެ. މިގޮތުން ގޭގައި ގެތަކުގައި ނޫޅޭ ވަގުތުތަކާއި އުޅޭނެ ވަގުތުތައް ބޯހިމެނުމުގެ މަސައްކަތުގައި ހަރަކާތްތެރިވާ ކުދިންނަށް އަންގަމުން އަންނަކަމަށެވެ. އަދި ރަށްރަށުންވެސް ބޯހިމެނުމުގެ މަސައްކަތަށް އެއްބާރުލުން ލިބެމުން އަންނަކަމަށެވެ.
ބޯހިމެނުމަކީ ކޮންމެ ދިހަ އަހަރަކުން އެއްއަހަރު ކުރިއަށް ގެންދަން ޖެހޭ މަސައްކަތެކެވެ. މިއީ ރާއްޖޭގެ އާބާދީއާއި ދިރިއުޅުމުގެ ޙާލަތު ދެނެގަތުމަށް ކުރިއަށްގެންދާ އެންމެ ބޮޑު މަސައްކަތެވެ. މިފަހަރުގެ ބޯހިމެނުމުގައި ރާއްޖޭގެ އިޤްތިޞާދީ ޙާލަތު ދެނެގަތުމަށް މަޢުލޫމާތު އެއްކުރުންވެސް ކުރިއަށްދާނެއެވެ.
ސްޓެޓްސް ބިއުރޯއިންވަނީ ލިސްޓް އެކުލަވާލުމަށް ޓީމްތަކުން ދާއިރު އެކަމަށް ފަސޭހަކުރުމުގެ ގޮތުން، ގޭގެއާއި އަދި މަސައްކަތް ހިނގާ ތަންތަނަކީ ކޮބައިކަން އެނގޭގޮތަށް ނަން ޖަހާފައި ނުވަތަ ނަން ބޯޑު ހަރުކުރުމަށް އެދިފައެވެ. އަދި ބައިބަޔަށް ހުންނަ ތަންތަނުގައި، އެޕަރޓްމަންޓް ނަންބަރު އިނގޭނެހެން ބެހެއްޓުމަށްވަނީ އެދިފައެވެ. އަތޮޅުތަކުގެ ރަށްރަށުގައިވެސް މިގޮތަށް ޢަމަލުކުރުމަށް ސްޓެޓްސް ބިއުރޯއިން އަންގަވައެވެ.
ބޯހިމެނުމުގެ މަސައްކަތުގައި ރަށްރަށުގައި ދިރިއުޅޭ ދިވެހިންނާ ބިދޭސީންގެ އަދަދުތަކާއި، އާބާދީ އިތުރުވާ މިންވަރާ، ހިޖުރަކުރުން، އުމުރުފުރާތަކަށް އަންނަ ބަދަލު، މަސައްކަތުގެ އާބާދީ، ރަށްރަށުގެ އިޤްތިޞާދީ އަދި އިޖުތިމާއީ ޙާލަތު ދެނެގަންނާނެއެވެ.
ބޯހިމެނުމާ ގުޅުންހުރި މަސައްކަތްތައް ހޯމަ ދުވަހުން ފަށައިގެން، މިމަހުގެ 25ވަނަ ދުވަހުގެ ނިޔަލަށް ކުރިއަށްދާނެއެވެ.