ތެލުގެ އަގު ދަށްވުމުން އޮގަސްޓްމަހު އިނގިރޭސިވިލާތުގެ ކޮންސިއުމަރ ޕްރައިސް އިންފްލޭޝަން، ސީޕީއައި ދަށްވެއްޖެކަމަށް އެ ޤައުމުގެ ރަސްމީ ތަފާސް ހިސާބުތަކުން ދައްކައިފިއެވެ.
އިނގިރޭސިވިލާތުގެ އިންފްލޭޝަން ވަނީ ވޭތުވެދިޔަ 40 އަހަރު ދުވަހުގެ ތެރޭގައި މައްޗަށް ނުދާ މިންވަރަށް މައްޗަށް ގޮސްފައެވެ. އިންފްލޭޝަން ދަށްވުމުގެ ސަބަބުން ގޭބިސީތަކަށާއި، މަރުކަޒީ ބޭންކަށް ކޮންމެވެސް ވަރެއްގެ ލުޔެއް ވަނީ ލިބިފައެވެ. ކޮންސިއުމަރ ޕްރައިސް އިންފްލޭޝަން، ސީޕީއައި އޮގަސްޓުމަހު ވަނީ %9.9 އަށް ވެއްޓިފައެވެ. މިއީ ރޮއިޓަރސް ޕޯލްގައި އިޤްތިޞާދީ މާހިރުން ލަފާކުރި ވަރަށްވުރެ މާ ދަށް އަދަދެކެވެ. ޖުލައިމަހު އިންފްލޭޝަން ރޭޓު ހުރީ %10.1 ގައެވެ.
ޖުލައި މަހުން އޮގަސްޓްމަހުގެ ނިޔަލަށް ނޮން ސީޒަނަލް އެޑްޖަސްޓް ސީޕީއައި ވަނީ %0.5 މައްޗަށް ގޮސްފައެވެ.
ވެހިކަލްތަކުގެ ތެލާއި ލުބްރިކަންޓްގެ އަގުތައް އޮގަސްޓް މަހު %6.8 އަށް ދަށްވެފައިވާއިރު، މިއީ 2020 ވަނަ އަހަރުގެ އޭޕްރީލް މަހުގެ ފަހުން ތެލުގެ އަގު އެންމެ ބޮޑަށް ވެއްޓުނު ފަހަރެވެ. މެޓީރިއަލްސް އާއި ހަކަތަގެ އިންޕުޓް އަގުތައް މަހު މަހުން މަހަށް ބަލާއިރު އޮގަސްޓުމަހު ވަނީ %1.2 އަށް ދަށްވެފައެވެ. އަދި ފެކްޓްރީ ވިއްކާ އަގުތައްވެސް މި މަހާ އަޅާބަލާއިރު ވަނީ ކުޑަކޮށް ދަށަށް ގޮސްފައެވެ.
ކުރިއަރާފައިވާ ބޮޑެތި އިގްތިސާދުތަކުގެ ތެރެއިން އިނގިރޭސިވިލާތް އަދިވެސް އަންނަނީ އިންފްލޭޝަންގެ ސަބަބުން ގޮންޖެހުންތަކާއި ކުރިމަތިލަމުންނެވެ. އަދި މަރުކަޒީ ބޭންކުން އިންޓަރެސްޓު ރޭޓު އަންނަ ހަފްތާ މަތިކުރާނެ ކަމަށްވެސް ވިޔަފާރިއާބެހޭ ބައެއް ފަރާތްތަކުން ބުނެއެވެ.