ދުނިޔޭގެ އެކި ގައުމުތަކުގައި މަރުކަޒީ ބޭންކުތަކުން އިންޓަރެސްޓް ރޭޓް މަތިކުރަމުންދާނަމަ އަންނަ އަހަރު ދުނިޔޭގެ އިގްތިސާދު ރިސެޝަނަކަށް ހިނަގައިދާނެ ކަމަށް ވޯލްޑް ބޭންކުން ބުނެފިއެވެ.
ވޭތުވެދިޔަ ފަސް ގަރުނުގެ ތެރޭގައިވެސް އިންޓަރެސްޓު ރޭޓު މަތިނުކުރާހާ މިންވަރަށް މަރުކަޒީ ބޭންކުތަކުން ވަނީ އެ ރޭޓު ބޮޑުކޮށްފައިކަމަށް ވޯލްޑް ބޭންކުން ބުނެއެވެ.
އިންޓަރެސްޓު ރޭޓު މަތިކުރުމުން ލޯނުގެ އަގު އުފުލެއެވެ. އިންޓަރެސްޓު ރޭޓު މަތިކުރަނީ އުފުލޭ އަގުތައް ތިރިކުރަން ނަމަވެސް އެކަމުގެ ސަބަބުން ލޯނުތަކަށް ވެސް ޚަރަދު ބޮޑުވެ، އިގްތިސާދީ ދުވެލި މަޑުޖެހެއެވެ.
ރޭޓު މަތިވާނަމަ ރިސެޝަނަކަށް ހިނގައިދާނެކަމަށް ވޯލްޑް ބޭންކުން ބުނެފައިމިވަނީ އަންނަ ހަފްތާގައި ބާއްވަން ހަމަޖެހިފައިވާ އެމެރިކާގެ ފެޑެރަލް ރިޒާވާއި ބޭންކް އޮފް އިނގިރޭސިވިލާތުގެ މާލީ އުސޫލުތަކާބެހޭ ބައްދަލުވުމުގެ ކުރިންނެވެ. މި ބައްދަލުވުމުގައި އިތުރަށް އިންޓަރެސްޓު ރޭޓު މަތިކުރާނެކަމަށް ވަނީ ބެލެވިފައެވެ.
ވޯލްޑް ބޭންކުން ބުނިގޮތުގައި 1970ވަނަ އަހަރު ކުރިމަތިވި ރިސެޝަނަށްފަހު ދުނިޔޭގެ އިގްތިސާދީ ދުވެލި ވަނީ ވަރަށް ބޮޑަށް މަޑުޖެހިފައެވެ. މިގޮތުން ދިރާސާއަކުން ދައްކާ ގޮތުގައި ދުނިޔޭގެ އެންމެ ބޮޑު ތިން އިގްތިސާދު ކަމަށްވާ އެމެރިކާ، ޗައިނާ އަދި ޔޫރަޕް ސަރަހައްދުގެ އިގްތިސާދު ވަނީ ވަރަށް ބޮޑަށް މަޑުޖެހިފައެވެ. މި ހާލަތުގައި ކުރިއަށް އޮތް އަހަރު ދުވަހުގެ ތެރޭގައި ދުނިޔޭގެ އިގްތިސާދަށް މެދުމިނުގެ އަސަރުތަކެއް ކުރި ނަމަވެސް ވެސް ރިސެޝަނަށް ހުށަހެޅިދާނެ ކަމަށް އެ ދިރާސާގައިވެއެވެ.
ފާއިތުވި މަސްތަކުގެ ތެރޭގައި އެމެރިކާ އާއި އިނގިރޭސިވިލާތުގެ އިންފްލޭޝަން ރޭޓު ވަނީ ވޭތުވެދިޔަ 40 އަހަރު ދުވަހުވެސް ނުދާހާ މައްޗަށް ގޮސްފައެވެ. މިއީ ކޯވިޑުގެ ބަލިމަޑުކަމުގެ ސަބަބުން އަޅާފައިވާ ފިޔަވަޅުތަކަށް ލުއި ދިނުމާއި، ރަޝިއާ ޔުކްރެއިން ހަނގުރާމައިގެ ސަބަބުން ހަކަތައާއި ތެލާއި ކާބޯތަކެތީގެ އަގު އުފުލި، ޑިމާންޑް އިތުރުވުމުން ދިމާވި ކަމެކެވެ.
ތަކެތީގެ އަގު އުފުލުމުން މަރުކަޒީ ބޭންކުގެ ސިޔާސަތު ކަނޑައަޅާ ފަރާތްތަކުން ވަނީ ގޭބިސީތަކާއި ވިޔަފާރިތަކުގެ ޑިމާންޑް ކޮންޓްރޯލްކުރުމަށް އިންޓަރެސްޓް ރޭޓް މަތިކޮށްފައެވެ. ނަމަވެސް ބޮޑެތި ރޭޓްތައް އިތުރުކުރުމުން އިގްތިސާދީ ދުވެލި މަޑުޖެހި ރިސެޝަންގެ ނުރައްކާ އިތުރުވެގެންދެއެވެ.
އެމެރިކާގެ ސަބްޕްރައިމް މޯގޭޖް ކްރައިސިސްއެއްގެ ސަބަބުން 2007ވަނަ އަހަރު ދުނިޔެއަށް ވަނީ މާލީ ދަތިކަމާއި ކުރިމަތިލާންޖެހިފައެވެ. މި ކްރައިސިސްގެ ސަބަބުން 2008ވަނަ އަހަރުގެ ސެޕްޓެމްބަރު މަހު ލެހްމަން ބްރަދާސްގެ އިންވެސްޓްމަންޓް ބޭންކުވެސް ވަނީ ބަގުރޫޓުވެފައެވެ.
އޭގެ މަހެއްހާ ދުވަސް ފަހުން ފެޑް އިން ވަނީ ޔޫރަޕިއަން ސެންޓްރަލް ބޭންކާއި ކެނެޑާ، ސްވިޑެން އަދި ސްވިޒަލޭންޑްގެ މަރުކަޒީ ބޭންކުތަކާ ގުޅިގެން މުހިއްމު އިންޓަރެސްޓް ރޭޓްތައް ދަށްކޮށްފައެވެ.