މަތިންދާ ބޯޓު އުފައްދާ އެމެރިކާގެ ކުންފުނި ބޮއިންގް އާއި އެމެރިކާގެ ހަތިޔާރު އުފައްދާ ކުންފުނި ރޭތިއަން ޓެކްނޮލިޖީސްގެ އިސްވެރިންނަށް ދަތިކުރުމުގެ ފިޔަވަޅު އަޅަން ޗައިނާއިން ނިންމާފައިވާކަމަށް ޗައިނާގެ ހާރިޖީ ވުޒާރާގެ ތަރުޖަމާނު ވިދާޅުވެއްޖެއެވެ.
ބޮއިންގް ޑިފެންސް، ސްޕޭސް، އެންޑް ސެކިއުރިޓީގެ ސީއީއޯ ޓެޑް ކޮލްބަޓް އާއި ރޭތިއަން ޓެކްނޮލޮޖީސް ކޯޕްގެ ވެރިޔާ ގްރެގޯރީ ހޭސްއަށް ފިޔަވަޅު އަޅަން ޗައިނާއިން ނިންމީ ޓައިވާނަށް އަސްކަރީ ސާމާނު ވިއްކުމަށް އެމެރިކާގެ ސްޓޭޓް ޑިޕާޓްމަންޓުން ސެޕްޓެމްބަރުމަހުގެ ދެވަނަ ދުވަހު ރުހުން ދިނުމާއި ގުޅިގެންނެވެ.
އެމެރިކާއިން ޓައިވާނަށް ވިއްކާފައިވާ ހަތިޔާރުތަކުގެ ތެރޭގައި 60 އެންޓި ޝިޕް މިސައިލް އާއި 100 އެއާ ޓު އެއާ މިސައިލް ހިމެނޭއިރު، އޭގެ ތެރެއިން އެކި ޕްރިންސިޕަލް ކޮންޓްރެކްޓަރުންނަކީ ބޮއިންގް ކޯގެ ޑިވިޝަނެއް ކަމަށްވާ ބޮއިންގް ޑިފެންސް އާއި ރޭތިއަން ޓެކްނޮލޮޖީސްއެވެ.
ކޮލްބަޓް އާއި ހޭސްއަށް ދަތިކުރުމުގެ ފިޔަވަޅު އަޅާނީ "ޗައިނާގެ އިސްތިގުލާލާއި ސަލާމަތީ މަސްލަހަތު ހިމާޔަތް ކުރުމަށް"ކަމަށް ފޮރިން މިނިސްޓްރީގެ ތަރުޖަމާނު މައޯ ނިންގް ވިދާޅުވިއެވެ.
އެ ދަތިކުރުމުގެ ފިޔަވަޅުތަކުގެ ސަބަބުން ކުރިމަތިވާނެ ކަންކަމާއި އެކަންކަން ތަންފީޒުކުރާނެ ގޮތަކާ ބެހޭގޮތުން މައޯ އިތުރު ތަފްސީލެއް ނުދެއްވައެވެ. އެއިން އެއްވެސް ކުންފުންޏަކުން ޗައިނާއަށް ދިފާއީ އުފެއްދުންތައް ނުވިއްކައެވެ. ނަމަވެސް، އެ ދެ ކުންފުނީގެވެސް ވަރުގަދަ އޭވިއޭޝަން ވިޔަފާރިތަކެއް ޗައިނާގައި އެބަހުއްޓެވެ.
އެމެރިކާގެ ޑިފެންސް ޕްރޮކިއުމަންޓް ގަވާއިދުތަކުގައި އާންމުކޮށް ޗައިނާއިން އުފައްދާ ކޮންޓެންޓް މަނާކޮށްފައިވާތީ ދަތިކުރުމުގެ ފިޔަވަޅުތަކުގެ ސަބަބުން އެމެރިކާގެ އަސްކަރިއްޔާއަށް އެއްވެސް އަސަރެއް ނުކުރާނެއެވެ.
އެމެރިކާގެ އަސްކަރީ ހެޑްކުއާޓާރު ދަ ޕެންޓަގަނުން ޓައިވާނަށް ހަތިޔާރު ވިއްކާނެކަން އިއުލާންކުރީ އެމެރިކާގެ ރައްޔިތުންގެ މަޖިލީހުގެ ރައީސް ނޭންސީ ޕެލޯސީ މިދޔަމަހު ޓައިވާނަށް ކުރެއްވި ދަތުރުފުޅާ ގުޅިގެން ޗައިނާއިން ޓައިވާނުގެ ވަށައިގެން އަސްކަރީ ޑްރިލްތަކެއް ކުރިއަށް ގެންދިއުމުންނެވެ.
ޗައިނާއިން މީގެ ކުރިންވެސް ވަނީ ރޭތިއަން އާއި ބޮއިންގް ޑިފެންސް އާއި ޓައިވާނަށް ހަތިޔާރު ވިއްކުމުގައި ހަރަކާތްތެރިވާ ވަކި ވަކި ފަރުދުންނަށް ދަތިކުރުމުގެ ފިޔަވަޅު އަޅާފައެވެ.
މިކަމާއި ބެހޭގޮތުން ރޭތިއަންއިން އެއްވެސް ވާހަކައެއް ނުދައްކައެވެ. ބޮއިންގް އިން ބުނީ ޖިއޮޕޮލިޓިކަލް ކަންބޮޑުވުންތަކާއި ހެދި ޑެލިވަރީ ކުރުން ލަސްވުމުން ޗައިނާގެ އެއާލައިންތަކަށް ހާއްސަކޮށްފައިވާ ބައެއް މަތިންދާބޯޓުތައް އަލުން މާކެޓަށް ނެރެން ރާވާފައިވާ ކަމަށެވެ.
2021 ވަނަ އަހަރުގެ ޑިސެމްބަރުމަހު ޗައިނާއިން ވަނީ ބޮއިންގްގެ 737 މެކްސް މަތިންދާބޯޓު އަލުން ޚިދުމަތަށް ގެނައުމަށް ހުއްދަ ދީފައެވެ. އޭގެކުރިން ބޮއިންގް އެއާލައިންގައި ހިނގި ދެ އެކްސިޑެންޓެއްގެ ސަބަބުން އެ އެއާލައިންގެ ބޯޓުތައް ޗައިނާއިން ވަނީ ގްރައުންޑުކޮށްފައެވެ. މި އެކްސިޑެންޓުތަކުގައި 346 މީހުން ވަނީ މަރުވެފައެވެ.
ހުއްދަ ލިބުނުނަމަވެސް ޗައިނާގެ އެއާލައިންތަކުން މެކްސް އުދުހުންތައް ފަށާފައެއް ނުވެއެވެ. އަލުން ނުފަށާ، އާ މެކްސް މަތިންދާބޯޓު ޑެލިވަރީކުރުންވެސް ބަލައިގެންފައެއް ނުވެއެވެ.
މެކްސް ގްރައުންޑް ކުރުމުގެ ކުރިން ބޮއިންގްއިން އަހަރަކު އުފައްދާ ބޯޓުތަކުގެ ތިންބައިކުޅަ އެއްބައި ވިއްކަމުން ދިޔައީ ޗައިނާއަށެވެ.
ރޭތިއަންއިން ޗައިނާއަށް ވިއްކަނީ އެ ކުންފުނީގެ ޔުނައިޓެޑް ޓެކްނޮލޮޖީސްގެ އިންޖީނު ވިޔަފާރި މެދުވެރިކޮށެވެ.
ޗައިނާގެ ކޮމިއުނިސްޓް ޕާޓީން ގަބޫލު ކުރަނީ، ޓައިވާނަކީ އަމިއްލަ ވެރިކަމެއް ކުރާ ޑިމޮކްރެސީއެއްކަމަށް ވިޔަސް އެއީ ޗައިނާގެ ބައެއް ކަމަށެވެ. ނަމަވެސް، އެ ގައުމުގެ މައްޗަށް އެއްވެސް އިރެއްގައި ޗައިނާއިން ވެރިކަން ކޮށްފައެއްނުވެއެވެ.
އެމެރިކާއިން ޓައިވާނަށް ހަތިޔާރު ވިއްކަން ނިންމުމުން ޓައިވާނުން ބުނީ އެ ނިންމުމަށް ވަރަށް ބޮޑަށް މަރުހަބާ ކިޔާ ކަމަށާއި ޓައިވާންގެ ސަލާމަތާއި ރައްކާތެރިކަމަށް އެމެރިކާއިން ވެފައިވާ ވައުދުތައް ތަންފީޒު ކުރުމުގައި ދެމިއޮތްކަމަށްޓަކައި އެމެރިކާ ސަރުކާރަށް ޝުކުރު އަދާކުރާ ކަމަށެވެ.