އައިޖީއެމްއެޗުގައި ކާމިޔާބުކަމާއެކު ކިޑްނީ ތޮރުފައިގެން ހިލަ ނެގުމުގެ ބޮޑު އޮޕަރޭޝަނެއް

ކިޑްނީ ތޮރުފައިގެން ކުރާ ހިލަ ނެގުމުގެ ބޮޑު އޮޕަރޭޝަނެއް އިންދިރާ ގާނދީ މެމޯރިއަލް ހޮސްޕިޓަލް، އައި.ޖީ.އެމް.އެޗުގައި ކާމިޔާބުކަމާއެކު ކޮށްފިއެވެ.

މި އޮޕަރޭޝަން ކޮށްފައިވަނީ އައި.ޖީ.އެމް.އެޗްގެ ޔޫރޮލޮޖީ ޑިޕާޓްމަންޓުގެ ދިވެހި ޑޮކްޑަރުންގެ ޓީމަކުންނެވެ. މި ޓީމުގައި އިސްކޮށް ހަރަކާތްތެރިވެފައިވަނީ އައި.ޖީ.އެމް.އެޗްގެ ދެ ކޮންސަލްޓަންޓް ސަބްސްޕެޝަލިސްޓް އިން ޔޫރޮލޮޖީންކަމަށްވާ ޑރ. އިބްރާހީމް މިސްބާޙާއި، ޑރ. ޢަބްދުﷲ އަދްސަރެވެ.

އައި.ޖީ.އެމް.އެޗް ޔޫރޮލޮޖީގެ ދިވެހި ޑޮކްޓަރުންގެ ޓީމުން (ޑރ. އަބްދުﷲ އަދްސަރ އާއި ޑރ. އިބްރާހީމް މިސްބާހް) ކިޑްނީ ތޮރުފައިގެން ކުރާ ހިލަ ނެގުމުގެ ބޮޑު އޮޕަރޭޝަނެއް (PCNL) ކާމިޔާބު ކަމާއިއެކު މި ހޮސްޕިޓަލްގައި ކުރައްވައިފިއެވެ.

1/2 pic.twitter.com/cBSku1GsnW

— IGMH (@igmhmv) September 20, 2022

އައި.ޖީ.އެމް.އެޗުން ވިދާޅުވީ، މި އޮޕަރޭޝަން ކުރެވުނު ބަލި މީހާގެ ޙާލު މިހާރު ރަނގަޅުވަމުން އަންނަކަމަށެވެ. އޮޕަރޭޝަނާގުޅޭގޮތުން އެ ހޮސްޕިޓަލުން އާއްމުކޮށްފައިވާ ފޮޓޯތަކަށް ބަލާއިރު، މި އޮޕަރޭޝަންގެ ތެރެއިން ބަލި މީހާގެ ކިޑްނީ ތޮރުފާލައިގެން 15 ވަރަކަށް ހިލަކޮޅު ވަނީ ނަގާފައެވެ.

މި އޮޕަރޭޝަނަކީ ދިވެހި ޑޮކްޓަރުންގެ ޓީމެއް އަލަށް ރާއްޖޭގައި ކާމިޔާބުކަމާއެކު ކުރިއަށްގެންދިޔަ މިފަދަ ފުރަތަމަ އޮޕަރޭޝަންކަމަށް އައި.ޖީ.އެމް.އެޗުން ވިދާޅުވެއެވެ. އަދި މި އޮޕަރޭޝަން ކުރިއަށްގެންގޮސްފައިވަނީ ހޭނައްތާ ޑޮކްޓަރުންނާއި ތިއޭޓަރ ނަރުހުންގެ ބައިވެރިވުމާއެކުކަންވެސް އެ ހޮސްޕިޓަލުން ފާހަގަކުރައްވާފައިވެއެވެ.