ރިޔާސީ ދައުރު ނިމުމުގެ ކުރިން ހަނިމާދޫ އެއަރޕޯޓް ތަރައްޤީކޮށް ނިންމާލުމަކީ ޢަމާޒެއް: ފައްޔާޒް
ހިނގަމުންމިދާ ރިޔާސީ ދައުރު ނިމުމުގެ ކުރިން ހަނިމާދޫ އިންޓަރނޭޝަނަލް އެއަރޕޯޓް ތަރައްޤީ ކުރުމުގެ މަސައްކަތް ނިންމާލުމަށް މަސައްކަތް ކުރައްވާނެކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް އަލްއުސްތާޛް ފައްޔާޒް އިސްމާއިލް ވިދާޅުވެއްޖެއެވެ.
މިނިސްޓަރ ފައްޔާޒު މިހެން ވިދާޅުވީ ބޮޑު ތިލަދުންމައްޗަށް އިޤްތިޞާދީ ބޮޑު އިންޤިލާބެއް ގެނުވާނެ، ހދ.ހަނިމާދޫ އިންޓަނޭޝަން އެއަރޕޯޓް ތަރައްގީކުރުމަށް އިންޑިއާގެ ޖޭއެމްސީ ޕްރޮޖެކްޓްސްއާ ހަވާލުކުރުމަށް ބޭއްވި ރަސްމިއްޔާތުގައެވެ.
ހދ.ހަނިމާދޫ އިންޓަނޭޝަން އެއަރޕޯޓް ތަރައްގީކުރުމުގެ މަޝްރޫޢުގެ އެއްބަސްވުމުގައި ރީޖަނަލް އެއާޕޯޓްސް ކޮމްޕެނީން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ މުހައްމަދު ރިޒްވީއެވެ. އަދި އިންޑިއާގެ ޖޭއެމްސީ ޕްރޮޖެކްޓްސްއިން ސޮއިކުރެއްވީ އެ ކުންފުނީގެ ނައިބްރައީސްކޭ އެސް ރެޑީއެވެ.
މި މަޝްރޫއުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއިލް ވިދާޅުވީ ހަނިމާދޫ އިންޓަނޭޝަން އެއަރޕޯޓް ތަރައްގީކުރުމުގެ މަސައްކަތް ކުރިއަށް ގެންދިޔުމަށްޓަކައި 2018 ވަނަ އަހަރު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް އިންތިޚާބްވި ދުވަހުން ފެށިގެން މަސައްކަތް ފެއްޓެވިކަމަށެވެ. މިގޮތުން އޭރު އިންޑިއާ ސަރުކާރާއެކު މަޝްވަރާތައްކޮށް އިންޑިއާގެ އެހީގައި މި މަސައްކަތް ކުރެވޭނެކަމުގެ ޔަޤީންކަން ލިބުނުކަން މިނިސްޓަރ ފާހަގަކުރެއްވިއެވެ.
މިނިސްޓަރ ފައްޔާޒް ވިދާޅުވީ ހަނިމާދޫ އެއަރޕޯޓް ތަރައްޤީކުރުމުގެ މަޝްރޫޢޫއާއެކު މިހާރުވެސް އިންވެސްޓަރުންގެ ޝައުގުވެރިކަން ތިލަދުންމައްޗަށް އިތުރުވަމުން އަންނަކަމަށެވެ. އަދި ކުރިއަށް އޮތް ދެތިން މަހުގެ ތެރޭގައި އެއަޕޯޓް ތަރައްޤީކުރުމުގެ ޢަމަލީ މަސައްކަތް ފަށްޓަވާނެކަން މިނިސްޓަރ ފާހަގަކުރެއްވިއެވެ. އެއަރޕޯޓް ތަރައްޤީކުރުމުގެ މަޝްރޫޢޫއާއެކު އެ ސަރަޙައްދުގައި ގެސްޓްހައުސްތައް އިތުރުވެ، ފަތުރުވެރިކަން ކުރިއަރައިގެންދާނެކަން ފާހަގަކުރައްވާ މިނިސްޓަރ ވިދާޅުވީ ބޮޑު ކަންނެލީގެ މަސްވެރިކަން ކުރާ ފަރާތްތަކުން މަސް ބޭރުކުރުމަށް ކުރަންޖެހޭ ޚަރަދުވެސް ކުޑަވެގެންދާނެކަމަށެވެ.
"މިހާރުވެސް ބޮޑު ތިލަދުންމަތީގެ ފަތުރުވެރިކަމަށް އިންވެސްޓަރުންގެ ޝައުޤުވެރިކަން އިތުރުވޭ. ކުރިއަށް އޮތް ދެތިން މަހުގެ ތެރޭގައި އެތަނުގައި ޢަމަލީ މަސައްކަތް ފެށުމުން މިއީ ބަދަލުކޮށް ލެވޭނެކަމެއްކަމަށް ނުދެކެވޭ." މިނިސްޓަރ އޮފް އިކޮނަމިކް ޑިވެލޮޕްމަންޓް ފައްޔާޒް އިސްމާއިލް ވިދާޅުވިއެވެ.
ބޮޑު ތިލަދުންމައްޗަށް އިޤްތިޞާދީ ބޮޑު އިންޤިލާބެއް ގެނުވާނެ، ހދ.ހަނިމާދޫ އިންޓަނޭޝަން އެއަރޕޯޓް ތަރައްގީކުރުމުގެ މަސައްކަތާއެކު އެ ސަރަޙައްދުގެ ރައްޔިތުންނަށް ބޮޑެތި ލުއިތަކެއް ލިބިގެންދާނެކަން އެ ސަރަޙައްދުގެ ރައްޔިތުން ޤަބޫލުކުރެއެވެ. ޚާއްސަގޮތެއްގައި ވަޒީފާގެ ފުރުޞަތުތައް އިތުރުވުމާއި ރާއްޖެއިން ބޭރަށް މިހާރު ކުރަން ޖެހޭ ދަތުރުތަކަށް ލުއި ލިބިގެންދާނެކަން ރައްޔިތުން ފާހަގަކުރެއެވެ.
މި މަޝްރޫޢޫއަކީ ބޮޑު ތިލަދުންމަތީގެ ރައްޔިތުން އެތަކެއް ދުވަހެއް ވަންދެން ކުރި އިންތިޒާރުގެ ފޮނި ނިމުން ގެނުވާނެ މަޝްރޫޢުއެކެވެ.
ހަނިމާދޫ އެއަރޕޯޓް ތަރައްޤީކުރުމުގެ މަޝްރޫޢުގެ ދަށުން 2.46 ކިލޯމީޓަރުގެ އައު ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭނެ ޖާގައިގެ ޓަރމިނަލެއް ޢިމާރާތްކުރެވޭނެއެވެ.
މިމަޝްރޫޢު ނިމުމުން ބައިނަލްއަޤްވާމީ ދަތުރުތަކުގައި ބޭނުންކުރާ އެއަރބަސް A320 އާއި ބޮއިންގ 737 މަރުކާގެ ބޯޓުތަކަށް މި އެއަރޕޯޓުން ޚިދުމަތް ދެވޭނެކަމަށް އިކޮނޮމިކް މިނިސްޓްރީން ވިދާޅުވެއެވެ. އަދި މެދުއިރުމައްޗާއި، ދެކުނު އޭޝިއާ އާއި، ދެކުނު އިރުމަތީ އޭޝިއާ އާއި އިރުމަތީ އެފްރިކާގެ ގައުމުތަކުން ސިދާ ފްލައިޓްތައް ހަނިމާދޫ އަށް އޮޕަރޭޓްކުރުމުގެ ގާބިލުކަން ލިބިގެންދާނެއެވެ. އަދި ބައިނަލްއަޤްވާމީ ދަތުރުތައް ފުޅާކުރުމަށް ބޭނުންވާ އެހެނިހެން ވަސީލަތްތައްވެސް ޤާއިމުވެގެންދާނެކަމަށް އިކޮނޮމިކް މިނިސްޓްރީން ވިދާޅުވެއެވެ.
ހަނިމާދޫ އެއަރޕޯޓަކީ ރާއްޖޭގެ އެންމެ ދުވަސްވީ އެއް ޑޮމެސްޓިކް އެއާޕޯޓަށްވާއިރު މިއެއާޕޯޓަކީ 2012ވަނަ އަހަރުން ފެށިގެން އެކި ވެރިކަންތަކުގައި ތަރައްޤީކުރާނެކަމުގެ ކުލަހުވަފެން ދެއްކި އެއާޕޯޓެކެވެ. ނަމަވެސް ޢަމަލީގޮތުން އެއާޕޯޓުގެ މަސައްކަތް ކުރެވިގެންދިޔަ ތަނެއް ފެނިފައި ނުވެއެވެ. ނަމެއްގައި އިންޓަރނޭޝަނަލްވުން ފިޔަވައި އެއާޕޯޓަށް އައި އެއްވެސް ކުރިއެރުމެއް ނެތެވެ.