ސަރުކާރުން ހިންގާ މަޝްރޫޢުތަކަކީ، ގުޅިލާމެހިގެން ފުރިހަމަވާ ދެމެހެއްޓެނިވި މަޝްރޫޢުތަކެއް: ރައީސް
ރާއްޖެ ތަރައްޤީ ކުރުމަށް ސަރުކާރުން ހިންގާ މަޝްރޫޢު ތަކަކީ، އެއްކަންތައް އަނެއްކަމާ ގުޅިލާމެހިގެން ފުރިހަމަވާ ދެމެހެއްޓެނިވި ތަރައްޤީގެ މަޝްރޫޢުތަކެއް ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ޤައުމީ ފެރީގެ ނިޒާމް "ރާއްޖެ ޓްރާންސްޕޯޓް ލިންކް" ޒޯން 1 ގައި ރަސްމީ ގޮތުން އިފްތިތާހްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވީ ރަށްރަށުގެ ތަރައްޤީއަށް ޚާއްސަކޮށް އާރްޓީއެލްގެ ޚިދުމަތަށް ސަރުކާރުން ގެންނަ ބަދަލުތަކަކީ އިޖްތިމާޢީ، އިޤްތިޞާދީ، އަދި ޢުމްރާނީ އިންޤިލާބެއް ގެނުވާނެ ބަދަލުތަކެއްކަމަށެވެ. ރައީސް ވަނީ ހުރިހާ ރަށެއްގެ ކަރަންޓު ފޯރުކޮށްދިނުމާއި މަގުހެދުމާއި ބަނދަރުހެދުމާއި ފެނާ ނަރުދަމާގެ ޚިދުމަތަކީ ހަމަ އެކަނި އަސާސީ ޚިދުމަތެއްގެ ގޮތަކު ނުދެކޭކަން ފާހަގަ ކުރައްވާފައެވެ. އަދި އެޚިދުމަތްތައް ފުރިހަމަ ވުމަކީ، ޖަޒީރާ ދިރިއުޅުމަށް، އިޤްތިޞާދީ ތަނަވަސް ކަމުގެ ދިރުން ގެނުވާނެ އަސާސްކަން އެމަނިކުފާނު ފާހަގަކުރެއްވިއެވެ.
"ބިންދަތި ރަށް ރަށަށް، ޖުމްލަ 43 ހެކްޓަރުގެ ބިން އިތުރު ކުރުމުގެ، ތަފާތު މަޝްރޫޢުތައް މިސަރަހައްދުގައިވެސް، އެބަ ހިނގާ. އަދި ވަކިން ޚާއްޞަކޮށް މި ސަރަހައްދުގައި އޮތް އެންމެ ދިރުންހުރި އެއް އިޤްތިޞާދަކީ އިހަވަންދޫ، އިހަވަންދޫ އަށް ދިމާވެފައިވާ، ބަނދަރާ ބިމުގެ ދަތިކަން ހައްލުކޮށްދޭން ޖެހޭ މިދެންނެވި ދެމަޝްރޫޢު އިހަވަންދޫގާ އެދަނީ ހިނގަމުން އަދި އިރާދަކުރެއްވިއްޔާ، މިސަރަޙައްދުން މަސްގަންނަ މަރުކަޒުގެ މަސައްކަތް ، އަންނަ އަހަރު އިހަވަންދޫގާ ފެށޭނެ." ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވިއެވެ.
އާރްޓީއެލްގެ ޚިދުމަތަށް އަލިއަޅުވާލައްވާ ރައީސް ވިދާޅުވީ ރާއްޖޭގެ ހުރިހާ ރަށަކާ އަތޮޅަކަށް އަންނަންޖެހޭ އެބޮޑު ބަދަލު ފެށެނީ އާރުޓީއެލްގެ ވިއުގައިންކަމަށެވެ. މިއަދު ބޮޑު ތިލަދުންމައްޗަށް ގެނެވިފައިވާ މިބޮޑު ބަދަލު ރައްޔިތުން ބަލައިގެންފައިވާކަން ފާހަގަކުރައްވާ ރައީސް ވަނީ ކުރިއަށް އޮތް އަހަރުގެ ތެރޭގައި އާރުޓީއެލްގެ ޚިދުމަތް، މުޅިހުވަދޫގައި ދިނުމަށްޓަކައި ކުރަންޖެހޭ މަސައްކަތްތައް ފަށާފައިވާކަން ފާހަގަކުރައްވާފައެވެ. އަދި އާރްޓީއެލް އީކުއެޓަރ ހުރަސްކޮށް، ފުވައްމުލަކާ އައްޑޫ، އަދި ހުވަދޫ އެކުގާ ގުޅުވާލެވޭނެކަމަށާއި މުޅިރާއްޖޭގެ ހުރިހާ ރަށެއް ގުޅާލުމަށް ބޭނުންވާ އިތުރު 65 ފެރީ ބަނުމުގެ މަސައްކަތް ކުރަމުން އަންނަކަން ރައީސް ފާހަގަކުރެއްވިއެވެ.
"ރަށްތައް ގިނަޔަސް، އުޅަނދު ތަކުގެ އަދަދު މައްޗަސް، މިކަމުގާ ފަސްޖެހި ލަސްކުރެވޭކަށް ނެތް .ސަބަބަކީ ބޮޑުތިލަދުންމައްޗަށް ގެނެވުނު މިބޮޑު ބަދަލު، ހަމަހަމަ ކަމާއެކު، މުޅިރާއްޖެއަށް ނުގެނެސް، މާނަވީ ބަދަލެއް، ރާއްޖެއަށް އަންނާން ނެތުން. ރައްޔިތުން ފުދުންތެރި ވެވޭނީ ހެލިފެލިވެ ފުރާ ދުއްވިގެން ގޮސް އައިސް ވެވިގެން. އާރުޓީއެލްގެ ޖީބަށްލުއި، އަރާމު ބާރު ދުވެއްޔަކީ، އިޤްތިޞާދީ ޙަރަކާތް އެތައް ގުނައެއް އިތުރުވާނެ ކަމެއް" ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވިއެވެ.
ރައީސް ވިދާޅުވީ ސަރުކާރުން ދެކޭ ވިއަވަތި ރާއްޖެއަކީ ސަރުކާރުގެ ތަޞައްވުރާ އެއްގޮތަށް ހުރިހާ ރަށެއްގައި ވަޞީލަތްތައް ޤާއިމްކޮށް ހަމަހަމަކަމާއެކު ޚިދުމަތްތައް ތަޢާރަފްކޮށް ރައްޔިތުންނަށް އެޚިދުމަތްތައް ފޯރުކޮށްދިންނުންކަމަށެވެ. އަދި މިއަދު ތަންފީޛު ކުރަމުންމިދާ ސިޔާސަތުގެ ބޮޑު ބަދަލަށް، ބޮޑު ތިލަދުންމަތި ފުރޮޅާލަންޖެހޭތާ ކިތަންމެ އަހަރެއްގޮސްފައިވާކަން ރައީސްވަނީ ފާހަގަކުރައްވާފައެވެ.