ފަތުރުވެރިކަމަށް 50 : ސަރުކާރުން ވިޔަފާރިނުކޮށް، ވިޔަފާރިވެރިން ކުރިއެރުވުމުގެ ސިޔާސަތު ކުރިއަށް
ފަތުރުވެރިކަމަށް 50 އަހަރު ފުރިގެންދާއިރު، ފަތުރުވެރިކަމުގެ ސިނާއަތް ރާއްޖޭގައި ފެށުމަށް އެތައް ބަޔަކު އަގު ނުކުރެވޭނެ އެތަކެއް މަސައްކަތަކެއް ކޮށްދީފައިވެއެވެ. އަދި ރާއްޖޭގެ ފަތުރުވެރިކަމަށް ލިބިފައިމިވާ އަދި ލިބެމުންދާ ކުރިއެރުންތަކުގެ އަސްލަކީވެސް އޭރު އެފަރާތްތަކުން ކުރި ބުރަ މަސައްކަތްކަން ޔަޤީނެވެ.
1972 ވަނަ އަހަރު ރާއްޖެއަށް ފަތުރުވެރިކަން ތައާރަފްވެގެން ދިޔައިރު އެ ސިނާއަތް ރާއްޖޭގައި ކާމިޔާބުކަމާއެކު ހިނގައިގަނެދާނެ ކަމާމެދެ އޮތީ ސުވާލު އުފެދިފައެވެ. ރާއްޖޭގައި ފަތުރުވެރިކަން ކުރިއަރައިގެންދާނެ ކަމަށް ޔޫއެންޑީޕީންވެސް ލަފާދީފައެއް ނުވެއެވެ.
އޭގެ ސަބަބަކަށްވީ ސިނާޢަތް ފެށުމަށް ބޭނުންވާ ޢުމްރާނީ އެއްވެސް ވަސީލަތެއް ނެތުމާއި، ރާއްޖޭގެ ރަށްތައް ވަކި ވަކި ޖަޒީރާ ރަށްތަކެއްގެގޮތުގައި އޮތުމެވެ. އެހެންނަމަވެސް މިފަދަ ގޮތަކަށް ލަފާދީފައިވީ ނަމަވެސް، މިކަމަކީ ރާއްޖޭގައި ކުރެވިދާނެ ކަމެއްގެ ގޮތުގައި ދެކުނު ފަރާތްތަކެއް ތިއްބެވެ. އާދައިގެ ގޮތަކަށް ނަމަވެސް ރާއްޖޭގައި ފަތުރުވެރިކަން ފަށައިގަތެވެ.
ފާއިތުވީ 50 އަހަރުތެރޭ ރާއްޖޭގެ ފަތުރުވެރިކަމުގެ ސިނާއަތް މިވަނީ ބޮޑެތި ކުރިއެރުންތަކެއް ހޯދާފައި، ބްރޭންޑެއްގެ ގޮތުގައި ރާއްޖެ އިސްތިހާރުވެ، ދުނިޔެއަށް ރާއްޖެ މިވަނީ ވަރަށް ބޮޑަށް މަޝްރޫހު ވެފައެވެ. ރާއްޖޭގައި މިހާރު ސަތޭކަ އަށްވުރެ ގިނަ ރިސޯޓް އޮތް އިރު، ބައިނަލްއަޤްވާމީ މަތީ ފަންތީގެ އެތައް އެވޯރޑްތަކެއް ރާއްޖޭއަށާއި، ރާއްޖޭގެ ރިސޯޓްތަކަށް ދަނީ ލިބެމުންނެވެ.
ރާއްޖޭގެ ފަތުރުވެރިކަމުގެ ސިނާއަތް ކުރިއަރައިގެން ދިޔަ މައިގަނޑު އެއް ސަބަބަކީ ރާއްޖޭގެ ސަރުކާރުން ފަތުރުވެރިކަމުގެ ސިނާއަތް ކުރިއެރުވުން ޕްރައިވެޓް ސެކްޓަރއަށް ދޫކޮށްލާފައި އޮތް އޮތުމެވެ. ރާއްޖޭގެ ފަތުރުވެރިކަމުގެ އެކި ޕްރޮޑަކްޓްސްތައް އުފަންވެފައިވާއިރު، މީގެ ސަބަބުން ދިވެހި ވިޔަފާރިތަކަށް ވަނީ އެތަކެއް ކުރިއެރުންތަކެއް ލިބިފައެވެ.
ސަރުކާރުން ފަތުރުވެރިކަމުގައި ހަރަކާތްތެރިވަނީ އެހީތެރިއެއްގެ ގޮތުގައެވެ. އެގޮތުން ފަތުރުވެރިކަން ދުނިޔޭގެ ބާޒާރުގައި ޕްރޮމޯޓުކޮށްދިނުމަށް ގިނަ މަސައްކަތްތަކެއް ދަނީ ކުރަމުންނެވެ. އަދި ރާއްޖޭގައި އިންވެސްޓުކުރާ ފަރާތްތަކަށް ރާއްޖެއަކީ ފަހި މާހައުލަކަށް ހަދައިދިނުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ގަވާއިދުދަކާއި ގާނޫނުތަކަށް ވަނީ ހެޔޮ ބަދަލުތަކެއް ގެނެސްފައެވެ.
"އިންވެސްޓަރުންނަށް އެބަޖެހޭ ގެރެންޓީ، ޔަޤީންކަން ލިބެން، އެމީހުންނަށް އެހެން ޤައުމުތަކުގައިވެސް އިންވެސްޓުކުރެވިދާނެ، އެހެންވީމަ އެމީހުންގެ އިތުބާރު ވަރުގަދަކުރަންޖެހޭ، ގަވާއިދުތަކަށް ބޮޑެތި ބަދަލުތަކެއް ގެނެވިފައިވަނީ، ފަހި ވާގޮތަށް ކަންތައްތައް ބައްޓަން ކުރަނީ، މި ސިނާއަތަކީ ސެލްފް ރެގިއުލޭޓަރީ ސިނާއަތެއް، މިއީ ޕްރައިވެޓު ސެކްޓަރގެ އަމިއްލަ އިނިޝިއޭޓިވްއިން މިހާ ހިސާބަށް އައިސަ މި އޮތީ" ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވިއެވެ.
ރާއްޖޭގެ ފަތުރުވެރިކަމުގައި ހަރަކާތްތެރިވާ ފަރާތްތަކުންވެސް ފާހަގަކުރާ އެއް ކަމަކީ ރާއްޖޭގެ ފަތުރުވެރިކަން މިހާބޮޑަށް ކުރިއަރައިގެން ދިޔައީ އަމިއްލަ ފަރާތްތަކަށް މި ދާއިރާ ކުރިއެރުވުމުގެ މިނިވަންކަން ސަރުކާރުން ދީފައި އޮތުމެވެ.
މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ، މަޓީގެ ޗެއަރމަން އަދި ރާއްޖެއަށް ފަތުރުވެރިކަން ތަޢާރަފްކުރުމުގައި އެންމެ އިސް ދައުރެއް އަދާކުރެއްވި މުހައްމަދު އުމަރު މަނިކު ވިދާޅުވީ ރާއްޖޭގެ ފަތުރުވެރިކަން މިހާބޮޑަށް ކުރިއަރައިގެން އައުމުގެ އެންމެ ބޮޑު އެއް ސަބަބަކީ މި ދާއިރާއަށް ސަރުކާރުގެ ނުފޫޒު ކުޑަވެ، އަމިއްލަ ފަރާތްތަކަށް ދާއިރާގެ ކަންކަން ދޫކޮށްލާފައި އޮތުމުންކަމަށެވެ.
"ސަރުކާރުވާން ޖެހޭނީ ރެގިއުލޭޓަރީ ބޮޑީއަކަށް، ތަރައްޤީކުރުމުގެ މަސައްކަތް ދޫކޮށްފައި އޮންނަން ޖެހޭނީ އަމިއްލަ ފަރާތްތަކަށް، ސަރުކާރަކީ މިކަމުން ޓެކްސްގެ ގޮތުގައި އާމްދަނީ ހޯދާ ފަރާތްތަކަށް ވާން ޖެހެނީ، ރާއްޖޭގައި މިފަދަ މާހައުލެއް އޮތީމަ ފަތުރުވެރިކަން މިހާ ބޮޑަށް ކުރިއަރައިގެން އައީ" އުމަރު މަނިކު ވިދާޅުވިއެވެ.
އެމްޔޫ މަނިކު ވިދާޅުވީ ފަތުރުވެރިކަން ކުރިއަރާނީ ކަންތައްތައް ފަސޭހަކޮށްދިނުމުންކަމަށާއި ސަރުކާރު ވާންޖެހޭނީ އެފަދަ ފަރާތަކަށްކަމަށް އުމަރު މަނިކު ވިދާޅުވިއެވެ.
މިހާރުގެ ހެލްތު މިނިސްޓަރު އަދި ޓޫރިޒަމް ދާއިރާ ފެއްޓެވުމުގައި އިސްކޮށް ހަރަކާތްތެރިވެ ވަޑައިގެންނެވި އަހުމަދު ނަސީމުވެސް ވަނީ މިކަން ފާހަގަކުރައްވާފައެވެ. އެގޮތުން ސަރުކާރުތަކުން އަމިއްލަ ފަރާތްތަކަށް މި ސިނާއަތް ކުރިއެރުވުމަށް ދޫކޮށްލާފައި އޮތުމަކީ މި ސިނާއަތް މިހާ ބޮޑަށް ކުރިއަރައިގެން ދިޔަ ސަބަބު ކަމަށް ނަސީމް ވިދާޅުވިއެވެ.
"ވެރިކަން ކުރެއްވި ހުރިހާ ފަރާތްތަކުންވެސް މިކަމަށް މާބޮޑަށް އިންޓަރފިއާ ނުކުރައްވާ ޓޫރިޒަމް އިންޑަސްޓްރީގެ ބޭފުޅުން ކުރިއަށް ގެންދިޔުމަށް ޖާގަ ދެއްވީތީ، ޝުކުރު ދަަންނަވަން، މިހާރު ރައީސް ޞޯލިހުގެ ސަރުކާރުން ހުރިހާ ކަމަކަށް މަޝްވަރާކުރައްވާ، އެ މަޝްވަރާގެ އަލީގައި ނޫނީ ޑިސިޝަނެއް ނުނަންގަވާ، މިއީ ބޭނުންވާ ކަހަލަ ސަރުކާރަކީ، ބޭނުންވާ ކަހަލަ މީޑަރަކީ،" ނަސީމް ވިދާޅުވިއެވެ.
މި ދާއިރާގައި ހަރަކާތްތެރިވާ ފަރާތްތަކުގެ ޝުޢޫރުތައްވެސް ހުރީ މިހެންނެވެ. އަދި މިދާއިރާއަށް އައިސްފައިވާ އަދި އަންނަމުންދާ ކުރިއެރުންތަކުންވެސް ސަރުކާރުން ގެންގުޅޭ ސިޔާސަތުތަކުގެ ކާމިޔާބީތައް ދަނީ ފެންނަމުންނެވެ.
ރާއްޖެއަކީ ގިނަ ބަޔަކު އިންވެސްޓުކުރަން ޝައުގުވެރިވާ މަންޒިލަކަށް މިވަނީ ވެފައެވެ. އަދި ތަފާތު އެކި ފަންތީގެ ތަފާތު އެކި ކަހަލަ ފަތުރުވެރިކަމުގެ ޕްރޮޑަކްޓްތައް ފަތުރުވެރިކަމުގެ ސިނާއަތަށް އިތުރުވަމުންދާއިރު، ރާއްޖޭގެ ފަތުރުވެރިކަމުގެ ސިނާއަތުގެ ކުރިމަގު ފެންނަނީ ވަރަށް އުޖާލާކޮށެެވެ. މީގެ އެންމެ ބޮޑު ސިއްރަކީ ސަރުކާރުން މި ވިޔަފާރީގެ ތެރެއަށް ވަދެ، ނުފޫޒު ފޯރުވުމުގައި މިނިވަން ވިޔަފާރީގެ މާހައުލެއްގައި ވިޔަފާރިތައް ކުރިއަށްދިއުމަށް ސަރުކާރުން ދެއްވާ ޖާގަކަމަށް ތަޖުރިބާކާރުން ދެކެއެވެ.