ރާއްޖެ ޓްރާންސްޕޯޓް ލިންކުގެ މިނީ ބަހުން ކަރުދާސް ޓިކެޓް ވިއްކިނަމަވެސް، ފައިސާ މާރުކޮށް ނުދޭނެކަމަށާއި، ކަރުދާސް ޓިކެޓް ގަންނަން ބޭނުންވާ ފަރާތްތަކުން ޓިކެޓަށްވާ ފައިސާ ހަމައަށް ހިފައިގެން ދިއުމަށް އެމް.ޓީ.ސީ.ސީގެ ސީ.އީ.އޯ އާދަމް އާޒިމް ވިދާޅުވެއްޖެއެވެ.
އާރް.ޓީ.އެލްއިން މާލޭގައި ފޯރުކޮށްދޭ މިނީ ބަހުގެ ޚިދުމަތުން މާދަމާއިން ފެށިގެން އަގުނަގާގޮތަށް ނިންމާފައިވާއިރު، މި ޚިދުމަތަށް ކަނޑައަޅާފައިވާ އަގަކީ 7 ރުފިޔާއެވެ.
މިނީ ބަހުގެ ޚިދުމަތާގުޅޭގޮތުން މަޢުލޫމާތު ދިނުމަށް އެމް.ޓީ.ސީ.ސީން ބޭއްވި ނޫސްވެރިންގެ ބައްދަލުވުމުގައި އެކުންފުނީގެ ސީ.އީ.އޯ އާދަމް އާޒިމް ވިދާޅުވީ، މިނީ ބަހުން ހިލޭ ދަތުރުކޮށްދިނުމަށް ކަނޑައަޅާފައިވާ މުއްދަތު ނިމުމާއެކު އާރް.ޓީ.އެލް ޓްރެވަލް އެޕް ބޭނުންކޮށްގެން ކިޔު.އާރް ޓިކެޓް ގަނެގެން ދަތުރުކުރެވޭނެކަމަށެވެ. އަދި މި އެޕް ގޫގަލް ޕްލޭ ސްޓޯރާއި، އެޕަލް ސްޓޯރއިން ހިލޭ ޑައުންލޯޑްކުރެވޭނެކަމަށެވެ. މިގޮތަށް ޓިކެޓް ނަގަން އުނދަގޫވާ ފަރާތްތަކަށް ކަރުދާސް ޓިކެޓް ވިއްކުމާއި، އިތުރު ގޮތްތައް ފަހިކޮށްދިނުމަށް މަސައްކަތް ކުރަމުންދާކަމަށް އާޒިމް ވިދާޅުވިއެވެ.
އާޒިމް ވިދާޅުވީ، ބަހުން ކަރުދާސް ޓިކެޓް ވިއްކާގޮތަށް ނިންމާފައިވީ ނަމަވެސް، ބަހުގެ ތެރޭގައި ފައިސާ މާރުކުރެވޭނެ އިންތިޒާމް ހަމަޖެހިފައި ނުހުންނާނެކަމަށެވެ. މިގޮތަށް ނިންމީ ދުނިޔޭގެ ބެސްޓް ޕްރެކްޓިސްއަށް ބަލާ، ޚިދުމަތް ދިނުމަށް ނަގާ ވަގުތު ސަލާމަތްކުރުމަށާއި، ޝެޑިއުލަށް ބުރުއެރިޔަ ނުދިނުމަށްކަމަށް އާޒިމް ވިދާޅުވިއެވެ. އެހެންކަމުން ކަރުދާސް ޓިކެޓް ނަގައިގެން މިނީ ބަހުން ދަތުރުކުރަން ބޭނުންވާ ފަރާތްތަކުން ޓިކެޓުގެ ސީދާ އަގުކަމަށްވާ 7 ރުފިޔާ ހިފައިގެން ބަހަށް އެރުމަށް އާޒިމް ވަނީ އިލްތިމާސްކުރައްވާފައެވެ.
"10 ވަރަކަށް މީހުންނަށް އަޅުގަނޑުމެން ޗޭންޖު ދޭން އިންތިޒާމް ހަމަޖައްސައިފިކަމަށްވަންޏާމުން ބަސް ދަތުރެއް ގާތްގަނޑަކަށް ކޮންމެ ތަނެއްގައި 5 ވަރަކަށް މިނެޓަށް މަޑުކޮށްގެންނޫނިއްޔާ އެކަމެއް ނުކުރެވޭނެ. އޭރުން އަޅުގަނޑުމެން މިބުނާ ކޮންމެ 10 މިނެޓަކުން ސްޓޮޕަކަށް ބަހެއް އަންނާނެކަމުގެ ޔަޤީންކަން ގެއްލި، އެތައް ރައްޔިތުންނަކަށް އުނދަގޫތައް ކުރިމަތިވާނެ" އާޒިމް ވިދާޅުވިއެވެ.
Here is your chance to familiarize with the RTL Website, https://t.co/hhK9CnjHtb. Learn how to plan your trip and book your RTL Bus ticket using this website. We wish you all a very pleasant experience on your RTL journeys.#RTLBus #ConnectingRaajje pic.twitter.com/w4QhlANDxu
— MTCC Plc (@MTCCPlc) September 1, 2022
ކަރުދާސް ޓިކެޓް ވިއްކުމަށް ނިންމާފައިވަނީ ހަމައެކަނި އާރް.ޓީ.އެލް މާލޭ ބަހުގެ ޚިދުމަތަށެވެ. އަދި ކަރުދާސް ޓިކެޓްތައް ވިއްކާނީ ސީދާ ބަހުންކަމަށާއި، ޓަރމިނަލްތަކުން ކަރުދާސް ޓިކެޓް ލިބެން ނުހުންނާނެކަމަށް އެމް.ޓީ.ސީ.ސީން ވިދާޅުވެއެވެ. އާޒިމް ވިދާޅުވީ، ކަރުދާސް ޓިކެޓް ވިއްކުމުގެ އިތުރުން މިމަހުގެ ތެރޭގައި އީ.އެމް.ވީ ކާޑު ބޭނުންކުރެވޭނެ އިންތިޒާމް ހަމަޖެއްސުމުގެ މަސައްކަތް ކުރަމުންދާކަމަށާއި، މި ޚިދުމަތާއެކު ވިސާ، އެމެކްސް އަދި މާސްޓަރ ކާޑު ގެންގުޅުއްވާ ފަރާތްތަކަށް ޓެޕްކޮށްލައިގެން ޓިކެޓަށް ފައިސާ ދައްކާލެވޭނެކަމަށް އޭނާ ވިދާޅުވިއެވެ.
މީގެ އިތުރުން މިއަހަރުގެ ތެރޭގައި އާރް.ޓީ.އެލް ދަތުރު ކާޑެއް ލޯންޗުކުރުމަށްވެސް މަސައްކަތް ކުރަމުންދާކަމަށާއި، އޭރުން ވިސާ، އެމެކްސް ނުވަތަ މާސްޓަރ ކާޑު ނުގެންގުޅޭ ފަރާތްތަކަށްވެސް އާރް.ޓީ.އެލް ދަތުރު ކާޑަށް ފައިސާ އަޅައިގެން ޓިކެޓަށް ފަސޭހައިން ފައިސާ ދައްކާލެވޭނެކަމަށް އާޒިމް ވިދާޅުވިއެވެ. ހަމައެހެންމެ ބަހުން ގިނަ ދަތުރުތައް ކުރާ ފަރާތްތަކަށް ކޮންމެ ފަހަރަކު ވަކިން ޓިކެޓެއް ގަތުމުގެ ބަދަލުގައި ބަލްކުކޮށް ޓިކެޓް ގަނެވޭނެ ގޮތަށް އާރް.ޓީ.އެލް އެޕްލިކޭޝަނަށް ބަދަލުގެނެސްފައިވާކަމަށްވެސް އާޒިމް ވިދާޅުވިއެވެ.
އާރް.ޓީ.އެލްގެ މިނީ ބަހުގެ ޚިދުމަތަށް 7 ރުފިޔާ ނެގުމަށް އެމް.ޓީ.ސީ.ސީން ނިންމާފައިވާއިރު، 4 ކެޓެގަރީއަކަށް ހިލޭ މި ޚިދުމަތް ފޯރުކޮށްދިނުމަށް އެކުންފުނިން ވަނީ ނިންމާފައެވެ.
ބަހުގެ ޚިދުމަތް ހިލޭ ލިބޭނެ ފަަރާތްތައް:
* 65 އަހަރުން މަތީގެ މީހުން / އައި.ޑީ ކާޑު ދައްކާލުމުން ހިލޭ ދަތުރުކުރެވޭނެ
* 3 އަހަރުން ދަށުގެ ކުޑަކުދިން / އައި.ޑީ ކާޑު ދައްކާލުމުން ހިލޭ ދަތުރުކުރެވޭނެ
* ޚާއްސަ އެހީއަށް ބޭނުންވާ މީހުން / އެންސްޕާގެ ކާޑު ދައްކާލުމުން ހިލޭ ދަތުރުކުރޭނެ
* ސްކޫލް ދަރިވަރުންނަށް ޔުނިފޯމުގައި ހިލޭ ދަތުރުކުރެވޭނެ
މާލޭގައި އާރް.ޓީ.އެލް މިނީ ބަހުގެ ޚިދުމަތް އެމް.ޓީ.ސީ.ސީން ދޭން ފަށާފައިވަނީ މިދިޔަ ސެޕްޓެމްބަރުމަހުގެ 5 ވަނަ ދުވަހުއެވެ. އެފަހުން 4 ހަފްތާ ވަންދެން ހިލޭ މި ޚިދުމަތް ފޯރުކޮށްދީފައިވާއިރު، މި ޚިދުމަތް ވެފައިވަނީ އާންމުން ވަރަށް ބޮޑަށް ބަލައިގަތް ޚިދުމަތަކަށެވެ.
މިނީ ބަހުގެ ޚިދުމަތައް މާލޭގައި ބޭނުންކުރަމުން އަންނަނީ މައިގަނޑު 3 ރޫޓެކެވެ. އެއީ އޯކިޑް ރޫޓާއި، ސޯސަން ރޫޓުގެ އިތުރުން އަމީނީ ރޫޓެވެ. މި 3 ރޫޓު މެދުވެރިކޮށް ޖުމްލަ 40 ތަނަކަށް ބަސްތައް ހުއްޓާނެއެވެ. އަދި ކޮންމެ 10 މިނެޓަކުން ބަސް ދަތުރުކުރާގޮތަށް ޝެޑިއުލްކޮށްފައިވާއިރު، ކޮންމެ ދުވަހެއްގެ ހެނދުނު 5:45 އިން ފެށިގެން ދަންވަރު 12:15 އާއި ހަމައަށް މި ޚިދުމަތް ލިބިގެންދާނެއެވެ. މާލޭގައި މިނީ ބަހުގެ ޚިދުމަތުގައި ޖުމްލަ 18 ބަހެއް އެމް.ޓީ.ސީ.ސީން ދަނީ ބޭނުންކުރަމުންނެވެ.