ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް މާދަމާ ބަހުރައިނަށް ފުރާވަޑައިގަތުމަށް ހަމަޖެހިފައިވާކަމަށް ރައީސުލްޖުމްހޫރިއްޔާގެ އޮފީހުން ވިދާޅުވެއްޖެއެވެ.
ރައީސް އޮފީހުން ވިދާޅުވީ، މިމިހުގެ 5 ވަނަ ދުވަހުން ފެށިގެން މިމަހުގެ 8 ވަނަ ދުވަހަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ބަހުރައިނަށް ޒިޔާރަތްކުރައްވާނެ ކަމަށެވެ. ރައީސްގެ ދެކަނބަލުންގެ މި ދަތުރުފުޅަކީ ބަހުރައިނުގެ ރަސްގެފާނު ހަމަދު ބިން ޢީސާ އަލް ޚަލީފާގެ ދަޢުވަތަކަށް ކުރައްވާ ރަސްމީ ދަތުރުފުޅެކެވެ.
ބަހުރައިނަށް ކުރައްވާ މި ދަތުރުފުޅުގައި ދެޤައުމުގެ ދެމެދުގައި މަތީ ފެންވަރުގެ އެއްބަސްވުންތަކެއް ގައި ސޮއިކުރެއްވުމަށް ހަމަޖެހިފައިވާކަމަށާއި، މި އެއްބަސްވުންތަކުގެ ސަބަބުން ރާއްޖެއާއި ބަހުރައިންއާ ދެމެދު އޮތް ރަހުމަތްތެރިކަމުގެ ގުޅުން އިތުރަށް ބަދަހިވެގެންދާނެ ކަމަށް ރައީސް އޮފީހުން ވިދާޅުވެއެވެ.
ރައީސުލް ޖުމްހޫރިއްޔާ އެންމެފަހުން ބޭރަށް ވަޑައިގެންފައިވަނީ އިނގިރޭސިވިލާތުގެ ރާނީ އެލިޒެބެތު 2ވަނައިގެ ޖަނާޒާގައި ބައިވެރިވެވަޑައިގަތުމަށް އިނގިރޭސިވިލާތަށެވެ. އެ ޤައުމަށް ރައީސް ވަޑައިގަތީ މިިދިޔަ މަހުގައެވެ.