ކޮރަޕްޝަނާމެދު ޢާންމުން ދެކޭގޮތް ބެެލުމުގެ ޤައުމީ ދިރާސާއެއް ކުރިއަށްގެންދިއުމުގެ އެއްބަސްވުމެއްގައި އޭސީސީއިން ވިލާ ކޮލެޖާއެކު ސޮއިކޮށްފިއެވެ.
މި އެއްބަސްވުމުގައި ސޮއިކޮށްފައިވަނީ، އެކަމަށް ޚާއްޞަކޮށްގެން އޭސީސީގައި މިއަދު ބޭއްވި ރަސްމިއްޔާތެއްގައެވެ.
ކޮރަޕްޝަނާމެދު އާންމުން ދެކޭގޮތް ދެނެގަތުމުގެ ގޮތުން ދިވެހިރާއްޖޭގައި ކުރެވޭ ފުރަތަމަ ދިރާސާގެ މަސައްކަތުގެ އެއްބަސްވުމުގައި ވިލާ ކޮލެޖުގެ ފަރާތުން ސޮއިކުރެއްވީ އެކޮލެޖްގެ ރެކްޓަރ ޑރ.އަހްމަދު އަންވަރެވެ. އަދި އޭސީސީގެ ފަރާތުން ސޮއިކުރެއްވީ ކޮމިޝަނުގެ ސެކްރެޓަރީ ޖެނަރަލް މުޙައްމަދު ސަލީމެވެ.
މި ދިރާސާއަކީ ކޮރަޕްޝަނާމެދު ޢާންމުން ދެކޭގޮތް ދެނެގަތުމުގެ އިތުރަށް ފާއިތުވި 5 އަހަރުގެ ތެރޭގައި ކޮރަޕްޝަންގެ ޓްރެންޑާއި އެކަމާ ގުޅުންހުރި ކަންކަން ދެނެގަނެ އިތުރަށް ދިރާސާކުރުމުގެ މަޤުޞަދުގައި ކުރިއަށްގެންދާ ދިރާސާއެކެވެ.
މިރަސްމިއްޔާތުގައި އޭސީސީގެ މެންބަރު ޝިޔާމާ މުޙައްމަދު ދެއްކެވި ވާހަކަފުޅުގައި ތޯތޯ ވާހަކަތަކުގެ މައްޗަށް ބުރަވުމުގެ ސަޤާފަތް ދޫކޮށްލައި ޢިލްމީ ހަޤީޤަތާ ކުރިމަތިލާންޖެހޭކަމުގައި ވިދާޅުވިއެވެ.
އަދި އެއްމަގުން ކަންކުރާން ނުތިބެ ހުރިހައި ދިމާލެއްގެ ހިންގުން ދީލާލާން ޖެހިފައިވާކަމަށާ، މިއަދު މި ފެށުނު މަސައްކަތާއެކު ހެދިގެންދާ ދިރާސާގެ އަލީގައި ކޮރަޕްޝަނާ ދެކޮޅަށް ކުރާ މަސައްކަތަކީ "އެވިޑެންސް ބޭސްޑް" މަސައްކަތަކަށް ހެދުމަށް އޭސީސީގެ ހިންގުން ބައްޓަންކުރާނެކަމުގެ ޔަގީކަން މެންބަރު ޝިޔާމާ ދެއްވިއެވެ.
މިރަސްމިއްޔާތުގައި ވިލާ ކޮލެޖްގެ ރެކްޓަރ ޑރ.އަހްމަދު އަންވަރު ވިދާޅުވީ ކޮރަޕްޝަންފަދަ ނޭދެވޭ ކަންކަން ހުއްޓުވުމަށް ކުރެވޭ މަސައްކަތްތަކުގައި އާންމުން ބައިވެރިކޮށް އެމީހުންގެ ޚިޔާލު ހޯދުމަކީ މުހިންމުކަމެއްކަމަށާ، މިފަދަ ދިރާސާއެއް ކުރިއަށްގެންދިއުމުގައި ބައިވެރިވެވުމަކީ ވިލާކޮލެޖުގެ ރިސަރޗްގެ މަސައްކަތްތަކަށްވެސް ލިބިގެންދާނެ އިތުރު ކުރިއެރުމެއްކަމަށެވެ.
އޭސީސީއަކީ ކޮރަޕްޝަނާ ގުޅޭ މައްސަލަތައް ތަހުގީގުކުރުމުގެ އިތުރުން ދައުލަތުގެ ނަޒާހަތްތެރިކަން ކުރިއެރުވުމާއި ކޮރަޕްޝަންގެ އަމަލުތަކުން ސަލާމަތްވެފައިވާ މުޖުތަމައެއް ހޯދުމަށް މަތިކޮށްފައިވާ ކޮމިޝަންއެކެވެ. އެގޮތުން އޭސީސީގެ މައްޗަށް ލާޒިމްކޮށްފައިވާ ކަންކަމުގެ ތެރޭގައި ކޮރަޕްޝަން ހުއްޓުވުމަށްޓަކައި ދިރާސާކޮށް އެފަދަ ދިރާސާތަކުގެ އަލީގައި ފެންނަ ކަންކަމުގެ މައްޗަށް ރިއާޔަތްކޮށް ކޮރަޕްޓް ވިޔަނުދިނުމަށް އެޅިދާނެ ފިޔަވަޅުތަކާ ގުޅޭ ގޮތުން ކަމާބެހޭ ފަރާތްތަކަށް ލަފާދިނުން ހިމެނެއެވެ.