ރާއްޖޭގެ ރިސޯޓުތަކަށް ހުޅުވާލައިގެން ބާއްވާ އެންމެ ބޮޑު ފުޓްސަލް މުބާރާތް ކަމަށްވާ ރިސޯޓް ލީގު 2022 ގެ ބ. އަތޮޅު މުބާރާތުގައި ނޮޓިލަސް އާއި ރީތި ބީޗު ބައްދަލުކުރި މެޗު އެއްވަރުވިއިރު، ވައްކަރު މޯލްޑިވްސް އަތުން މިލައިދޫ ފަސޭހަ މޮޅެއް ހޯދައިފިއެވެ.
ފޯ ސީޒަންސް ލަނޑާގިރާވަރުގައި ކުރިޔަށްދާ މުބާރާތުގެ ގްރޫޕް އޭ ގައި ނޮޓިލަސް އާއި ރީތި ބީޗު ބަ އްދަލުކުރި މެޗު ނިމުނީ 3-3 ގެ ނަތީޖާއަކުންނެވެ. އަދި ގްރޫޕް ބީ ގައި ވައްކަރު އަތުން މިލައިދޫ މޮޅުވީ 5-1 ގެ ނަތީޖާއަކުންނެވެ.
ނޮޓިލަސް އާއި ރީތި ބީޗު ބައްދަލުކުރި މެޗުގައި ނޮޓިލަސްގެ ލަނޑުތައް ކާމިޔާބުކޮށްދިނީ އަބްދުލް ކަރީމް އަހުމަދާއި އަލީ ނިޒާމެވެ. މީގެތެރެއިން އަބްދުލް ކަރީމް އަހުމަދު ދެ ލަނޑު ޖެހިއެވެ. ރީތި ބީޗުގެ ތިން ލަނޑު ކާމިޔާބުކޮށްދިނީ ހަސަން ނާއިލް ދާވޫދާއި އަހުމަދު ޝާނިމްގެ އިތުރުން ރައްޔާން މުހައްމަދެވެ.
ވައްކަރު އަތުން މިލައިދޫ މޮޅުވި މެޗުގައި މިލައިދޫގެ ލަނޑުތައް ކާމިޔާބުކޮށްދިނީ އަލީ އަބްދުލް ހަކީމާއި އަލީ ނަސީރުގެ އިތުރުން މުހައްމަދު އަކުރަމާއި މުހައްމަދު ޝިރުފާނެވެ. މީގެތެރެއިން އަލީ އަބްދުލް ހަކީމް ވަނީ ދެ ލަނޑު ޖަހާފައެވެ.
ކޮވިޑުގެ ހާލަތާއި ގުޅިގެން ދެ އަހަރުގެ މެދުކެނޑުމަކަށް ފަހު ބ. އަތޮޅުގައި މި މުބާރާތް ކުރިޔަށްދަނީ ހަތް ޓީމު ދެ ގްރޫޕަކަށް ބަހާލައިގެންނެވެ. ގްރޫޕް އޭ ގައި ހިމެނޭ ޓީމުތަކަކީ ފޯ ސީޒަންސް، ރީތި ބީޗް، އަނަންތަރަ ކަހާވަށް ވިލާސް، ނޮޓިލަސް އެވެ. ގްރޫޕް ބީގަ ހިމެނެނީ ސޮނޭވާފުށި، މިލައިދޫ އަދި ވައްކަރެވެ.
މި ޒޯނުގައި މިހާތަަނަށް ތިން ފަހަރެއްގެ މަތިން ރިސޯޓް ލީގު ވަނީ ބާއްވާފައެވެ. އެއީ 2014، 2016 އަދި 2019 ގައެވެ. އެ ތިން ފަހަރުވެސް މުބާރާތުގެ ޗެމްޕިއަންކަން ހޯދާފައިވަނީ ސޮނޭވާ ފުއްޓެވެ. މިއަހަރުގެ މުބާރާތުގެ ފައިނަލް މެޗު ކުޅުމަށް ތާވަލުކޮށްފައި ވަނީ އަންނަ އަންގާރަ ދުވަހުގައެވެ.