ފަންނީ އުފެއްދުންތައް އާންމުކުރުމުގެ 14 ދުވަހުގެ ކުރިން ގިންތި ކުރަންޖެހޭގޮތަށް ގަވާއިދެއް އެކުލަވާލައިފި

ފަންނީ އުފެއްދުންތައް އާންމުކުރުމުގެ މަދުވެގެން 14 ދުވަހުގެ ކުރިން، ގިންތިކުރުމަށްފަހު ނޭޝެނަލް ބިއުރޯ އޮފް ކްލެސިފިކޭޝަނަށް ހުށަހަޅަންޖެހޭގޮތަށް ގަވާއިދެއް އެކުލަވާލައިފިއެވެ.

މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖުން އެކުލަވާލި މި ގަވާއިދުގައި ބަޔާންކޮށްފައިވާ ރާއްޖޭގައި އުފައްދާ ނުވަތަ ރާއްޖެއަށް އެތެރެކުރާ ފަންނީ އުފެއްދުންތައް އާންމުކުރުމުގެ މަދުވެގެން 14 ދުވަހުގެ ކުރިން އެ އުފެއްދުމަށް އާއްމުކުރާ ފަރާތަކުން އެ އުފެއްދުމެއް ގިންތިކޮށް ބިއުރޯއަށް ހުށަހަޅަންޖެހޭނެއެވެ.

މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖުން ވިދާޅުވީ، ފަންނީ އުފެއްދުންތައް ގިންތިކުރުމުގެ ގަވާއިދަކީ ރާއްޖޭގައި އުފައްދާ ނުވަތަ ރާއްޖެއަށް އެތެރެކުރާ ފަންނީ އުފެންދުންތައް އާންމުކުރާއިރު، އެ އުފެއްދުންތަކާ އެކަށީގެންވާ އުމުރުފުރާ ކަނޑައެޅުމާއި، ފަންނީ އުފެއްދުންތަކުގެ ޝަރުތުތައް ކަނޑައެޅުމާއި، ގިންތިތަކަށް ފެތޭގޮތަށް އާންމުކުރުމުގައި ޢަމަލުކުރާނެ މިންގަނޑުތަކާއި، އުސޫލުތައް ބަޔާންކުރުމަށްޓަކައި، އެކުލަވައިލައިފައިވާ ގަވާއިދެއްކަމަށެވެ.

މި ގަވާއިދުގައި ބަޔާންކޮށްފައިވާ އެއްވެސް ފަންނީ އުފެއްދުމެއް އާންމުކުރުމުގެ ކުރިން، އެ އުފެއްދުން އާންމުކުރާ ފަރާތުން، އެ އުފެއްދުމެއް ގިންތިކުރަންޖެހެއެވެ.

ގިންތި ކުރަންޖެހޭ ފަންނީ އުފެއްދުންތައް:

* ފިލްމު
* ސައުންޑް ރެކޯޑިންގ
* ވީޑިއޯ ގޭމް ނުވަތަ އިލެކްޓްރޯނިކް ގޭމް
* ފޮޓޯއާއި ކުރެހުން
* ޕަރފޯމިންގ އާޓްސް
* އަދަބީ އުފެއްދުން
* ރީ-ބްރޯޑްކާސްޓްކުރުމުގެ ޚިދުމަތްދޭ ފަރާތްތަކުން އާންމުކުރާ ޗެނަލްތައް
* އިޝްތިހާރު

ފަންނީ އުފެއްދުންތައް ގިންތިކުރުމުގައި ބަލާނެ މިންގަނޑުތައްވެސް މި ޤަވާއިދުގައި ހިމަނާފައިވެއެވެ. އަދި އެ މިންގަނޑުތަކަށް ބަލާ އެކަންތައްތައް އެ އުފެއްދުމެއްގައި ހިމެނިފައިވާ މިންވަރެއްގެ މައްޗަށް ބިނާކޮށް އެ އުފެއްދުމަކަށް އުމުރުފުރައެއް ކަނޑައަޅަންޖެހޭނެއެވެ.

ފަންނީ އުފެއްދުންތައް ގިންތިކުރުމުގައި ބަލާ މިންގަނޑުތައް:

* ހުށަހެޅޭ ފަންނުވެރި އުފެއްދުމެއްގެ މައުޟޫޢު
* އަނިޔާވެރިކަންހުރި މިންވަރު
* ޖިންސީ ޢަމަލު ހުރި މިންވަރު
* ތަޅާފޮޅުންހުރި މިންވަރު
* ބަހުރުވަ ބޭނުންކޮށްފައި ހުރިގޮތް
* ލޭ ފެންނަ މިންވަރު
* ހަށިގަނޑު ހާމަކުރެވޭ މިންވަރު
* ކުޑަކުދިންގެ ޙައްޤުތަކާ ޚިލާފުވާ މިންވަރު
* އެމީހަކީ ނުވަތަ އެ ބަޔަކީ މާ ދަށް ފެންވަރުގެ ނުވަތަ ނުބައި މީހެއްކަން ނުވަތަ ބައެއްކަން ދައްކާ މިންވަރު
* އިސްލާމީ ޝަރީޢަތާއި ރާއްޖޭގެ ޤާނޫނުން ކުށެއްކަމުގައި ކަނޑައަޅާކަމެއް، އެއީ ރަނގަޅު ކަމެއްގެ ގޮތުގައި ބުނާނަމަ، އެކަން
* ދީން ތަމްސީލުކޮށްދީފައިވާ ގޮތާއި ރާއްޖޭގައި އޮތް އިސްލާމީ އުސޫލުތަކާއި އާދަކާދަތަކާ އަޅައި ބެލުން
* ދިވެހި ޤައުމިއްޔަތަށް އުނިކަމެއް އިޙުސާސްވާ މިންވަރު

ފަންނީ އުފެއްދުމުގެ ގިންތި ކަމުގައި، ހުށަހެޅި ފަރާތުން ބަޔާންކޮށްފައިވާ ގިންތިއަށް މި ގަވާއިދުގައިވާ ގޮތުގެ މަތިން އެ އުފެއްދުމެއް ފެތޭނަމަ އެކަން ހުށަހެޅި ފަރާތަށް، އެ ހުށަހެޅުމެއް ބިއުރޯއަށް ލިބޭތާ 7 ދުވަހުގެ ތެރޭގައި ލިޔުމުން އަންގަންޖެހޭނެއެވެ. އަދި ހުށަހެޅި ގިންތިއަށް އެ އުފެއްދުމެއް ނުފެތޭނަމަ، އެ އުފެއްދުމެއް ފެތޭ ގިންތިއަކީ ކޮބައިކަންވެސް 7 ދުވަހުގެ ތެރޭގައި ލިޔުން އަންގަންޖެހޭނެއެވެ.

މި ގަވާއިދުގެ ދަށުން އިސްލާމްދީނާ ޚިލާފު، އަދި އިސްލާމްދީނަށް ފުރައްސާކުރުމުގެ ޢަމަލުތަކާ ބަހުރުވަ ނުވަތަ އެފަދަ ކަންކަމަށް ހިތްވަރުދިނުމުގެ އަމަލުތަކާ ބަހުރުވަ ނުވަތަ ދިވެހި ރައްޔިތުންގެ ދީނީ އެއްބައިވަންތަކަމަށް އުނިކަމެއް އަންނަ އަމަލުތަކާ ބަހުރުވަ ހިމެނޭ ކޮންޓެންޓް އާންމުކުރުމަކީ މަނާކަމެކެވެ. އަދި ޖިންސީ ގުނަވަންތައް ހާމަވާ މަންޒަރު ނުވަތަ ޖިންސީ ގުޅުން ހިންގާ މަންޒަރު ހިމެނޭ ކޮންޓެންޓު އާންމުކުރުމަކީވެސް މަނާކަމެކެވެ.

ހެރިޓޭޖް މިނިސްޓްރީން އެކުލަވާލި މި ގަވާއިދުގައި ފަންނީ އުފެއްދުންތަކުގެ ގިންތިތަކާ، ފަންނީ އުފެއްދުންތަކުގެ ޝަރުތުތަކާ، ގިންތި އަންގައިދޭ ނިޝާންތަކުގެ ތަފްސީލުވެސް ހިމަނާފައިވެއެވެ.

މި ގަވާއިދާ ޚިލާފަށް ކޮށްފައިވާ ޢަމަލެއްގެ ކުޑަބޮޑުމިނަށް ބަލައި 1000 ރުފިޔާއާއި 5000 ރުފިޔާއާއި ދެމެދުގެ އަދަދަކުން ޖޫރިމަނާކުރުމުގެ ބާރު ނޭޝެނަލް ބިއުރޯ އޮފް ކްލެސިފިކޭޝަނަށް ވަނީ ދީފައެވެ. އަދަބުގެ މިންވަރު ކަނޑައެޅުމުގައި، ކުށުގެ ބާވަތާއި، ކުށްކުރި ހާލަތާއި، ކުށްކުރި ފަރާތުން އެ ކުށަކަށް ޒިންމާވާންޖެހޭ މިންވަރަށް ބިއުރޯއިން ރިޢާޔަތްކުރާނެއެވެ.

ހެރިޓޭޖް މިނިސްޓްރީން ފަންނީ އުފެއްދުންތައް ގިންތިކުރުމުގެ ގަވާއިދު އެކުލަވާލާފައިވާއިރު. ރާއްޖޭގެ ބާޒާރަށް ނެރޭ ފަންނީ އުފެއްދުންތަކުގައި އެ އުފެއްދުމަކާ އެކަށީގެންވާ އުމުރުފުރާ ކަނޑައެޅޭ ގިންތިތަކަށް ފެތޭގޮތަށް އާއްމުކުރުމާ ގުޅޭ ބިލު ރައީސުލްޖުމްހޫރިއްޔާ އިބްރަހިމް މުޙައްމަދު ޞާލިޙް ތަސްދީޤުކުރައްވާފައިވަނީ 18 ޖުލައި 2022 ގައެވެ.