މުއްދަތު ހަމަވާ ތާރީޚު ބަދަލުކޮށްގެން ޕާކިސްތާނުގެ ބްރޭންޑެއްގެ ބާސްމަތީ ހަނޑޫ ވިއްކާތީ، ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީން ވިދާޅުވެއްޖެއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ، އެމް.އެފް.ޑީ.އޭއިން ނެރުނު ބަޔާނެއްގައި ވިދާޅުވީ، ޕާކިސްތާނުގެ އުފެއްދުމެއްކަމަށްވާ އަލް ޤަމަރް ގޯލްޑް ޕްރީމިއަމް އެރޯމެޓިކް ބާސްމަތީ ހަނޑޫގެ މުއްދަތު ހަމަވެފައިވާ 5 ކިލޯގްރާމުގެ ޕެކެޓް، މުއްދަތު ހަމަވާ ތާރީޚު ބަދަލުކޮށްގެން ވިއްކަމުންދާކަން އެ އޮތޯރިޓީން ކުރި އިންސްޕެކްޝަނަކުން ފާހަގަކުރެވިފައިވާކަމަށެވެ. އަދި އެ ޕެކެޓުގައިވާ މުއްދަތު ހަމަވާ ތާރީޚު ހަމަވުމުން، އޭގެ މަތީގައި ސްޓިކާއެއް ހަރުކޮށް އެ ތާރީޚަށް ބަދަލުގެނެސްފައިވާކަން އެތޯރިޓީން ބެލި ބެލުމުން ހާމަވެފައިވާކަމަށެވެ.
މުއްދަތު ހަމަވެފައިވާ ކާބޯތަކެތި ވިއްކުމަކީ އޭގެ ސަބަބުން ކާބޯތަކެތީގެ ރައްކާތެރިކަމާ ފެންވަރު ގެއްލި އާއްމު ޞިއްޙަތަށް ނުރައްކާވުމުގެ ފުރުޞަތު އޮތްކަމެއްކަމަށް އެމް.އެފް.ޑީ.އޭއިން ވިދާޅުވިއެވެ. އެހެންކަމުން މުއްދަތު ހަމަވާ ތާރީޚު ބަދަލުކޮށްގެން ކާބޯތަކެތި އެތެރެ ނުކުރުމަށާއި ނުވިއްކުމަށާއި، ބޭނުން ނުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީން ވަނީ އަންގަވާފައެވެ.