ރަސްމީ ދަތުރުފުޅެއްގައި ޚާރިޖީ ވަޒީރު ޢަބްދުﷲ ޝާހިދު އިނގިރޭސި ވިލާތަށް ފުރާވަޑައިގެންފިއެވެ.
މި ދަތުރުފުޅާ ގުޅޭގޮތުން ފޮރިން މިނިސްޓްރީން ވިދާޅުވީ 5 ދުވަހުގެ މިދަތުރުފުޅުގައި އިނގިރޭސިވިލާތުގެ އާ ސަރުކާރުގެ އިސް ވެރިންނާ ބައްދަލު ކުރައްވާނެކަމަށެވެ. އަދި މި ބައްދަލުވުމުގައި ދެ ގައުމުގެ ގުޅުން ބަދަހި ކުރުމާ ގުޅޭގޮތުން މަޝްވަރާ ކުރަން ހަމަޖެހިފައިވާ ކަމަށް މިނިސްޓްރީން ވިދާޅުވެއެވެ.
ޝާހިދުގެ މިދަތުރުފުޅުގައި ރަސްމީ އެހެން ބައްދަލުވުންތައް ވެސް ބޭއްވުމަށް ހަމަޖެހިފައިވެއެވެ. އެގޮތުން އިނގިރޭސި ސަރުކާރުން ރާއްޖެ ހިމެނޭ ސަރަހައްދުގެ ކަންކަން ބެލުމަށް ކަނޑައަޅާފައި ހުންނަވާ އެންމެ އިސް މަންދޫބުގެ އިތުރުން ޖިންސީ އަނިޔާތައް ހުއްޓުވުމަށް އިނގިރޭސި ބޮޑުވަޒީރު ކަނޑައަޅުއްވާފައި ހުންނަވާ މަންދޫބާ ވެސް ބައްދަލުކުރައްވާނެއެވެ.
މި ދަތުރުގައި "ފިއުޗާ އޮފް މަލްޓިލަޓްރެލިޒަމް" އާ ބެހޭގޮތުން ތަގުރީރެއް ދެއްވުމަށްވެސް ހަމަޖެހިފައިވާ ކަމަށް މިނިސްޓްރީން ވިދާޅުވެއެވެ. އިނގިރޭސިވިލާތަށް ޝާހިދު ކުރައްވާ ދަތުރުފުޅު ނިންމަވާލެއްވުމަށްފަހު ރާއްޖެވަޑައިގަތުމަށް ހަމަޖެހިފައިވަނީ އަންނަ މަހުގެ 4 ވަނަ ދުވަހުއެވެ.