މިއަހަރުގެ ތިންވަނަ ކުއާޓަރުގައި އެމްޓީސީސީއަށް 593 މިލިއަން ރުފިޔާގެ އާމްދަނީއެއް ލިބިއްޖެއެވެ. މިއަހަރުގެ ދެވަނަ ކުއާޓަރުގައިވެސް އެމްޓީސީސީއަށް އާމްދަނީގެ ގޮތުގައި ލިބިފައިވަނީ 593 މިލިއަން ރުފިޔާއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ، އެމްޓީސީސީން އާއްމުކޮށްފައިވާ އެކުންފުނީގެ މިއަހަރުގެ ތިންވަނަ ކުއާޓަރުގެ މާލީ ހިސާބުތައް ދައްކާގޮތުން ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި، 47.7 މިލިއަން ރުފިޔާ ލިބިފައިވެއެވެ. މިއީ މިއަހަރުގެ ދެވަނަ ކުއާޓަރުގައި ސާފު ފައިދާގެ ގޮތުގައި ލިބުނު 77.78 މިލިއަން ރުފިޔާއާއި އަޅާ ބަލާއިރު، 38 އިންސައްތަ ދަށް އަދަދެކެވެ. މިއަހަރުގެ ފުރަތަމަ ކުއާޓަރުގައި އެމްޓީސީސީއަށް ފައިދާގެ ގޮތުގައި ލިބިފައިވަނީ 75.31 މިލިއަން ރުފިޔާއެވެ.
އެމްޓީސީސީއަށް މިއަހަރުގެ ތިންވަނަ ކުއާޓަރުގައި ސާފު ފައިދާގެ ގޮތުގައި ލިބުނު އަދަދު ދަށްވެފައިވަނީ ޖުލައިމަހުގެތެރޭ ބޮޑު ޗުއްޓީއެއް އައުމާއި ގުޅިގެން އެކުންފުނީގެ ޓްރޭޑިންގ ސެގްމަންޓަށް އެކަމުގެ އަސަރުކުރުމުން ކަމަށް އެމްޓީސީސީން ހާމަކުރެއެވެ.
ދުނިޔޭގެ ބާޒާރުގައި ތަކެތީގެ އަގުތައް އުފުލެމުންދިޔުމާއި ގުޅިގެން ތަކެތި ގަތުމަށް ކުރަން ޖެހޭ ހޭދަވެސް އިތުރުވެފައިވާ ކަމަށް އެމްޓީސީސީން ހާމަކުރެއެވެ. އެގޮތުން ތެލުގެ އަގު އުފުލެމުންދިޔުމާއި ގުޅިގެން އެމްޓީސީސީގެ ކޮންސްޓްރަކްޝަން ސެގްމަންޓަށް އޭގެ އަސަރުކޮށް، އަހަރުގެ ފުރަތަމަ 2 ކުއާޓަރާއި އަޅާ ބަލާއިރު އެ ސެގްމަންޓުން ލިބުނު ފައިދާވަނީ ދަށްވެފައެވެ.
މި އަހަރުގެ ދެވަނަ ކުއާޓަރުގައި ޢުމްރާނީ ތަރައްޤީގެ ގިނަ މަޝްރޫއުތަކެއް ކާމިޔާބުކަމާއެކު އެމްޓީސީސީން ވަނީ ހިންގާފައެވެ. އެގޮތުން 112 މަޝްރޫއެއްގައި މަސައްކަތްކުރެވި، 8 މަޝްރޫއެއްގެ މަސައްކަތް ވަނީ ކާމިޔާބުކަމާއެކު ނިންމާލެވިފައެވެ. އަދި 11 ޕްރޮޖެކްޓެއްގެ މަސައްކަތް އެ ކުއަރޓަރުގައި ފަށާފައިވާކަމަށް އެމްޓީސީސީން ބުނެއެވެ.
ތިންވަނަ ކުއާޓަރުގެ މާލީ ހިސާބުތަކާއެކު، އަހަރުގެ ފުރަތަމަ 9 މަސްދުވަހުގެ ހިސާބުތައް ހާމަވެގެންގޮސްފައިވާއިރު، ފުރަތަމަ 9 މަސް ދުވަހުގެތެރޭ އެމްޓީސީސީއަށްވަނީ އާމްދަނީގެ ގޮތުގައި 1.74 ބިލިއަން ރުފިޔާ ލިބިފައެވެ. އަދި ޓެކްސްއަށް ކެނޑުމުގެ ކުރިން ސާފު ފައިދާގެ ގޮތުގައި 200 މިލިއަން ރުފިޔާ ވަނީ ލިބިފައެވެ.
އެމްޓީސީސީން މީގެކުރިން ބުނެފައިވަނީ މި އަހަރު ނިމޭއިރު، އެކުންފުންޏަށް އާމްދަނީގެ ގޮތުގައި 2.2 ބިލިއަން ރުފިޔާ ލިބޭނެ ކަމަށް ލަފާކުރެވޭ ކަމަށެވެ. އަދި ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި 300 މިލިއަން ރުފިޔާ ލިބޭނެ ކަމަށްވެސް ވަނީ ލަފާކޮށްފައެވެ.
އެމްޓީސީސީން ވަނީ މިދިޔަ އަހަރުތެރޭ ރެކޯޑު އަދަދެއްގެ ފައިދާއެއް ހޯދާފައެވެ. އެގޮތުން މިދިޔަ އަހަރު ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި 271.82 މިލިއަން ރުފިޔާ ވަނީ އެމްޓީސީސީއަށް ލިބިފައެވެ. މިއީ 2020ވަނަ އަހަރު ލިބުނު ފައިދާއަށްވުރެ %21 އިތުރު އަދަދެއްކަމަށް އެ ކުންފުނީގެ ތަފާސް ހިސާބުތަކުން ދައްކައެވެ.